भांगरभूंय | प्रतिनिधी
गाझियाबाद, खबरां संस्था: उत्तर प्रदेशच्या गाझियाबादांत एक धक्को दिवपी घडणूक घडली. ५५ वर्सां पिरायेच्या भारत सिंह हाणें आपले बायलेचो गळो दाबून खून केलो. मागीर तिची कूड चार दीस घरांतूच दवरली. एक दीस सोर्याच्या नेटार हें शेजार्यांक सांगिल्ल्यान हें प्रकरण भायर सरलें.
मजगतीं, आरोपी भारत सिंह हाका पुलिसांनी ताब्यांत घेतलो. ताका न्यायालयान १० दिसांची पुलीस बंदखण आयकयल्या.
मेळिल्ले म्हायती प्रमाण, मरण आयिल्ले बायलेचें नांव सुनिता. ती भारत सिंहाची दुसरी बायल. तिचेंय हें दुसरें लग्न. तीं दोगांय दोन वर्सां आदीं एकामेकांच्या संपर्कांत आयिल्लीं. भारत सिंह हाणें दुसरें लग्न केल्ल्याचें समजतकच पयली बायल ताचे कडेन पयशे मागपाक लागली. ह्या कारणा वयल्यान भारत सिंह आनी सुनिता हांचे मदीं वाद सुरू जालो. निमाणें भारतान रागान सुनिताचो खून केलो.
शेजार्यांक खून केल्ल्याचें सांगलें
सुनिताचो खून केले उपरांत भारतान तिची कूड चार दीस घरांतूच लिपोवन दवरली. सोर्याच्या नेटार ताणें ही गजाल शेजार्यांक सांगली. तशेंच इमारतींत घाण आयिल्ल्यान शेजार्यांनी हे विशीं पुलिसांक म्हायती दिली. पुलिसांनी तपास केल्या उपरांत सुनिताची कूड सांपडली. पुलिसांच्या म्हणण्या प्रमाण सुनिता हिचो खून तीन ते चार दिसां आदीं जाला आसतलो.
मेळिल्ले म्हायती प्रमाण, सुनिताच्या पयल्या घोवाक २०१२ वर्सा मरण आयिल्लें. जाल्यार भारत हाचो पयले बायले कडेन घटस्फोट जाल्लो. २८ फेब्रुवारीक भारतान सुनिता हिचो खून केल्ल्याचें लोक म्हणटात. भारत सोर्याच्या दुकानांत काम करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
