भांगरभूंय | प्रतिनिधी
फाटल्या वर्सा ऑक्टोबरांत हमासान इझ्रायलाचेर हल्लो करून 1200 परस चड इझ्रायली नागरिकांक मारले आनी 251 नागरिकांचें अपहरण केलें. हमासाच्या ह्या हल्ल्याक जाप दितना इझ्रायलान गाझा पट्टेचेर हल्लो करून अक्षरशा तो वाठार मातये भरवण करून उडयलो. इझ्रायलाच्या हल्ल्यांत 42 हजारां परस चड नागरिकांक मरण आयलां आनी 12 हजारां परस चड हमास आतंकवादी मेले. एक वर्स जाले उपरांत लेगीत तांचे मदलो संघर्श सोंपूंकना. इझ्रायल- हमास झुजा उपरांत फकत एका वर्सा उपरांत इझ्रायलान लेबनानाचेर हल्लो केलो. थंयचे हिजबोला आतंकवादी संघटनेचो मुखेली हसन नसरल्ला हाका ह्या हल्ल्यांत मरण आयलें. ताचे आदीं इझ्रायलान पेजर आनी वॉकी टॉकी वापरून लेबनानाचेर हल्लो केल्लो. हल्लो करपाचें कारण म्हळ्यार लेबनानान हमासाक दिल्लो अर्थीक आनी लश्करी आदार. हिजबोलान इझ्रायल- हमास झुजांत हमासाक फकत अर्थीक आनी लश्करी आदार दिलो ना, पूण प्रत्यक्ष झुजांतय वांटो घेतलो. देखून इझ्रायलान लेबनानाचेर हल्लो करून हिजबोलाक धडो शिकयलो.
ह्या संघर्शांत उडी मारून इराणान संवसाराची काळजी वाडयली. कारण इस्लामी जगांतलो इराण हो सगळ्यांत म्हत्वाचो देश. इझ्रायल- इराण संघर्श संवसाराक नवो न्हय. 1980 च्या दशकांत दोनूय देशां मदीं सतत झुजाचीं स्फुलिंगां दिसतालीं. इराणान इझ्रायलाचेर हल्लो करून 200 परस चड क्षेपणास्त्रां उडयलीं. अर्थांत, इझ्रायलान ह्या हल्ल्याचो येसस्वीपणान प्रतिकार केलो.
फुडल्या काळांत इझ्रायलाचेर इराणाचेर हल्लो जातलो आनी अशें जालें जाल्यार हें झूज वाडूं येता.कत आपलो दुस्मान अमेरिकेन इझ्रायलाक तेंको दिल्ल्यान इराण आनीकय अस्वस्थ जाला. अमेरिकेंतल्या वेंचणुकांनी डोनाल्ड ट्रम्प खरेंच अमेरिकेचे अध्यक्ष जाले जाल्यार हो संघर्श आनीक वाडटलो. डोनाल्ड ट्रम्प प्रत्यक्षांत इझ्रायलाच्या फायद्या खातीर मैदानांत देंवक शकतात आनी तशें जालें जाल्यार आतां मेरेन ह्या झुजांत तटस्थ रावपी इजिप्त, जॉर्डन, सिरिया, सावदी अरेबिया, संयुक्त अरब अमीरात अशे अरब देश इराणाक वांगड दिवंक मैदानार देवंक शकतात आनी अशें जालें जाल्यार तिसरें संवसारीक म्हाझुज जातलें हातूंत दुबाव ना.
तंत्रगिन्यानाचो राजा
आयच्या तंत्रज्ञान काळांत मोबायल, आयफोन, टॅबलेट, संगणक, लॅपटॉप वापरपी कोणाकूय स्टीव जॉब्स हें नांव खबर नासप शक्य ना. ऍपल सुरू करून तिका आयज संवसारांतली सगळ्यांत यशस्वी कंपनी करपी स्टीव जॉब्स, त्याच ऍपल कंपनीचो संस्थापक, तंत्रगिन्यानाचो राजा स्टीव जॉब्साची शेनवारा पुण्यतीथ आशिल्ली.
स्टीव जॉब्स हाचो जल्म 24 फेब्रुवारी 1955 दिसा अमेरिकेंतल्या ग्रीन बे वाठारांत जालो. सिरियाचे मुस्लिम विद्यार्थी अब्दुल फतेह आनी जोहान शिबिल हांणी लग्ना पयलींचें आपलें भुरगें अनाथालयांत दिलें. थंयच्यान ताका पॉल – क्लारा जॉब्स ह्या आर्मेनियन कुटुंबान दत्तक घेतलें. दत्तक घेवपाच्या वेळार कुटुंबान त्या भुरग्याक पदवी शिक्षण दिवन ताका खुशाल दवरपाचें उतर दिलें; पूण जॉब्स जोडपें गरीब आनी मजूर म्हणून काम करता हें कळटकच स्टीवच्या आवय- बापायन हरकत घेतली. स म्हयने चर्चा जाले उपरांत तांणी स्टीवाक त्या जोडप्याक दत्तक दिवपाचें मान्य केलें.
हायस्कुलांत आसतना स्टीवाक ह्युलेट पॅकार्ड नांवाच्या कारखान्यांत काम करपाची संद मेळ्ळी. थंय ताची भेट स्टीव वोझ्निया कडेन जाली. स्टीव 16 वर्सांचो आनी वोझ्नियाक 21 वर्सांचो. दोगांय स्टीवांची इश्टागत जावपाचें कारण म्हळ्यार दोगांयकय तंत्रगिन्यानाची आवड आशिल्ली. वोझ्नियाकान व्हिडियो गेम्सा खातीर टेलीटायप आनी मायक्रोप्रोसेसर हांचो सोद लायलो. स्टीव जॉब्साचो ताचेर खूब विस्वास. 1970 उपरांत संगणक मळार नवे बदल आनी प्रयोग जावपाक लागले.
1976 वर्सा जॉब्सान वोझ्नियाक संगणक उत्पादनाची जापसालदारकी सोंपयली आनी स्वता बाजारपेठेचेर लक्ष केंद्रीत केलें. संगणक, कंपनीय जाली. कंपनीची नोंदणी खंयच्या नांवान करची हो प्रस्न आशिल्लो. एक दीस सकाळीं जाॅब्सान सहज झाडा वयल्यान एक आपोल काडून तें खावपाक सुरवात केली आनी कंपनीचें नांव तकलेंत आयलें, एॅपल. कंपनीची नोंदणी जाल्ली. तांकां रोखडोच 50 संगणकांची ऑर्डर मेळ्ळी. अशे तरेन पिरायेच्या 21 व्या वर्सा ताणें संगणक मळार प्रवेश केलो.
स्टीवाक तंत्रगिन्यानाची पदवी नाशिल्ली; पूण तकलेंत कल्पना आशिल्ल्यो. वेवस्थापनाची कुशळटाय आशिल्ली. ताणें तंत्रगिन्यानांत कुशळ मनीस वेंचून काडले. ताणें चड अत्याधुनीक आनी श्रेश्ठ उत्पादनां बाजारांत हाडलीं. ताणें सुरू केल्ल्या पर्सनल संगणकाक, ऍपल 1 पीसीक खूब मागणी आशिल्ली. स्टीवन कंपनी चलयतना खूब लोकांक दुखयले. ताका लागून सहकाऱ्यां कडेन ताचे मतभेद वाडले. निमाणें ताणें आपलीच एपल कंपनी सोडली.
1986 वर्सा ताणें चित्रपट दिग्दर्शक जॉर्ज लुकास हाचे वांगडा भागीदारी करून एक कंपनी स्थापन केली. ते कंपनीचें नांव पिक्सर. हे कंपनीन एनिमेशन सिनेमा तयार केले. ते खूब लोकप्रीय थारले. वॉल्ट डिस्नी कडेन जाल्ल्या कराराक लागून हे कंपनीन खूब दुडू जोडले. पूण स्टीव जॉब्स हांगा गेले उपरांत ऍपल कंपनीक लुकसाण जालें. ऍपलाक आयबीएम आनी मायक्रोसॉफ्ट हांचे कडेन सर्त करची पडली.
निमाणें 1997 वर्सा स्टीव जॉब्स परतून एॅपलांत आयलो. ताणें आपले बुद्धीन एॅपलाक परतून वयल्या पांवड्यार हाडलो. आयबीएम, मायक्रोसॉफ्ट कंपनीं संगणकाचेर आपली मक्तेदारी सिद्ध करतना स्टीवाक कितें तरी नवें करपाची उमळशीक लागली. ताणें आयफोन, आयपॉड, आयपॅड बाजारांत हाडलो. 2001 वर्सा एपलान 5 गीगाबाइट आयपॉड बाजारांत हाडलो. तें सगळ्यांत ल्हान संगीत वाजोवपी उपकरण आशिल्लें. तातूंत एक हजार गितां सांठोवंक मेळटात. थोड्याच काळांत आयपॉड लोकप्रीय जालो. 2007 वर्सा ऍपलान टचस्क्रीन मोबायल हाडलो. 3 जी मोबायलाचीय सुरवात ऍपलान पयलीं केली. 2010 वर्सा आयिल्ल्या पयल्या टॅबलेट पीसीन संवसारभरांतल्या गॅझेट मोगींक पिशेंच लायलें.
स्टीव जॉब्साक भारता विशीं खूब मोग. तो भारतांत जायते फावट आयलो. भारतीय अध्यात्म आनी बौद्ध धर्माची ताका ओढ आशिल्ली. 5 ऑक्टोबर 2011 दिसा पिरायेच्या फकत 56 व्या वर्सा तंत्रगिन्यानाचो हो राजा संवसाराक अंतरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
