भांगरभूंय | प्रतिनिधी
अर्ज भरतना उमेदवारा सयत तिगांकूच हाजर रावपाक मेळटले
– गर्दी आनी वाहनांचेर आयोगा कडल्यान निर्बंध
पणजी : पणजी म्हापालिके खातीर उमेदवारी अर्ज भरतना उमेदवारा सयत फकत तिगांकूच कार्यालयांत हाजर रावपाची परवानगी आसतली. तशेंच उमेदवारी अर्ज भरपाच्या कार्यालयाच्या 100 मिटर परीघात फकत दोन वाहनांक येवपाची मान्यता आसतली. हे विशीचें परिपत्रक जारी जालां.
अर्ज भरपा खातीर उमेदवार, अनुमोदक आनीक एक मनीस मेळून तिगांकूच येवपाक मेळटलें. अर्ज भरपा वेळार गर्दी जावची न्हय, म्हूण हो नेम केला. तशेच कार्यालया कडेन वाहनांची गर्दी जावन पार्किंगाची समस्या तयार जावपाक जायना, म्हूण हे निर्बंध घाल्या.
———————
खर्चाचेर नदर दवरपाक निरीक्षक
तशेंच उमेदवारांच्या खर्चाचेर नदर दवरपा खातीर दोगां निरीक्षकांची नेमणूक केल्या. पणजी म्हापालिकेचे साहाय्यक लेखा अधिकारी राजू बाणावलीकार आनी म्हापशें जिल्हो हॉस्पिटलाचे उपसंचालक अालेक्स डिसोझा हांची नेमणूक जाल्या.
———–
दोन दिसांत एकूय अर्ज ना
पणजी म्हापालिका वेंचणुके खातीर उमेदवारी अर्ज घेवपाक 17 फेब्रुवारी सावन सुरवात जाली. फाटल्या दोन दिसांत एकूय उमेदवारी अर्ज दाखल जावंक ना, अशी म्हायती राज्य वेंचणूक आयोगा कडल्यान मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
