भांगरभूंय | प्रतिनिधी
द क्षीणेंतले नामनेचे अभिनेते आनी नव्यानूच राजकारणांत प्रवेश केल्ले तमिळगा वेत्री कळघम ह्या पक्षाचे फुडारी विजय थलपती हांणी आयोजीत केल्ले सभेंत खेटाखेट जावन 39 जाणांक मरण आयलें आनी 12 जाण गंभीर जखमी जाले. शेनवारा रातीं घडिल्ले हे दुर्दैवी घडणुकेचो व्हिडियो प्रसार माध्यमांनी व्हायरल जालो. ही दुर्दैवी घडणूक जितली धपको दिवपी आसा तितलीच हुस्को करपीय आसा. कारण भररस्त्यार आयोजीत केल्ले हे सभेंत सुमार 60 हजारां परस चड नागरीक हाजीर आशिल्ले. सामके ल्हानशे सुवातेंत इतले व्हड संख्येन लोक हाजीर रावतात आसत जाल्यार वायट घडणूक घडटलीच हें शाळेंतलो भुरगो लेगीत सांगतलो. अभिनेतो विजय थलपती हांणी पयलेच फावटी अशी सभा घेतली अशें न्हय जाल्यार हाचे आदींय तांणी कांय दिसां पयलीं अशीच रॅली आयोजीत केल्ली. ताकाय लाखांनी लोकांची उपस्थिती आशिल्ली, तेन्नाच अशी दुर्दैवी घडणूक घडिल्ली जाल्यार कितें जातलें आशिल्लें अशी भिरांत उक्तायिल्ली. दुर्दैवान ती भिरांत आतां खरी थारली. अर्थांत ही आमच्या देशांतली खेटाखेटीची पयलीच घडणूक अशी न्हय. हाचे आदींय अश्यो खूबश्यो घडणुको घडल्यात. सद्या तर अशा दुर्दैवी घडणुकांची माळूच सुरू आसा.
कांय दिसां पयलीं बंगळुरूंत जाल्ली खेटाखेटीची घडणूक अजूनय ताजी आसा. जून म्हयन्यांत रॉयल चॅलेंजर्स बंगळुरू पंगडान अठरा वर्सां उपरांत पयलेच फावटी आयपीएलाचो करंड उबारले उपरांत सुरू जाल्ल्या उत्सवाचें 24 वरां भितर दुख्खाच्या रुपांत रुपांतर जाल्लें. आरसीबीचो पंगड पयलेच फावटी आयपीएल जैतवंत थारले उपरांत त्या पंगडाक येवकार आनी अभिनंदन करपा खातीर बंगळुरूच्या चिन्नास्वामी स्टेडियमार मोटो सुवाळो आयोजीत केल्लो. त्या वेळारूय अशीच खेटाखेट जाल्ली. तातूंत 22 निश्पाप क्रिकेट मोग्यांक आपलो जीव व्हगडावचो पडलो जाल्यार 30 परस चड क्रिकेट मोगी गंभीर जखमी जाल्ले. हे घडणुके उपरांत बंगळुरूंतच न्हय जाल्यार पुराय क्रिकेट संवसारांत दुख्खाची सया पातळिल्ली.
आतांय तशीच दुख्खाची सया देशभर पातळ्ळ्या. मन हालोवन उडोवपी हे घडणुके उपरांत खूबशे प्रस्न उपस्थीत जाले. हे सभेक पुलीस आनी प्रशासनान परवानगी दिल्ली? खंयचीय सभा व्हड मैदानार आयोजीत करतात जाल्यार ही सभा रस्त्यार कित्याक घेतली? हे सभे खातीर व्हड संख्येन लोक हाजीर रावतले हाची कल्पना आयोजकांक आयली ना? जे सुवातेची तांक वीस ते तीस हजार आसा ताचे परस दोबरादीन लोक कशे जमा जाले? ही सभा आयोजीत करतना आयोजकांनी फावो ती तयारी केल्ली? इतली व्हड सभा आयोजीत करतना आयोजकांनी प्रशासना कडेन, पुलिसां कडेन चर्चा केल्ली? हे सभेक अपेक्षे परस चड लोक येतले असो अदमास आयोजकांक आयलो ना? आयिल्लो आसत जाल्यार तांणी तांकां नियंत्रीत करपा खातीर कसली उपाय येवजण केली? गर्दी नियंत्रीत करपा खातीर फावो तें पुलीस बळ आशिल्लें? ही राजकी पक्षाची सभा आशिल्ली. स्वताचें राजकी शक्तीप्रदर्शन दाखोवपा खातीर लोकांचो जीव घाताक घालप कितले मेरेन योग्य? आनी सगल्यांत निमाणचो आनी म्हत्वाचो प्रस्न हे दुर्दैवी घडणुकेंत ज्या निश्पाप 39 लोकांचो बळी गेलो ताका जापसालदार कोण? आयोजक, तमिळनाडू सरकार काय स्वताचो जीव घाताक घालपी अतिउत्साही लोक?
आतां हे घडणुकेची चवकशी करपा खातीर एखादो आयोग नेमतले. ह्या आयोगाक हे घडणुकेची चवकशी करपा खातीर कांय म्हयन्यांची मुजत दितले. तो मेरेन मरण आयिल्ल्यांच्या आनी जखमी जाल्ल्यांच्या कुटुंबाक कांय लाखांची भरपाय दितले. राजकारणी सदचे प्रमाण एकामेकांचेर आरोप करतले आनी आपली राजकी पोळी भाजून घेतले. पूण मूळ प्रस्न तसोच कुशीक उरतलो ताचेर कोणूच उलोवचे नात. मुळांत ही दुर्दैवी घडणूक घडून गेले उपरांत ताची चवकशी करचे परस असल्यो घडणुको घडच्योच न्हय हे खातीर यत्न जावंक जाय. आमी आयज लेगीत गर्दीचें वेवस्थापन करपाक उणें पडटात हें मान्य करचेंच पडटलें. तांकी परस चड गर्दी जायत जाल्यार ताचेर नियंत्रण दवरपाक प्रशासन अपेशी थारता हें हाचे आदींय सिद्ध जालां. गर्दीचें वेवस्थापन करपाक आमी उणें कित्याक पडटात? हाचो पयलीं प्रशासनान अभ्यास करचो. विदेशांत गर्दीचें वेवस्थापन कशे तरेन करतात हाचो अभ्यास करपा खातीर शासनान अधिकाऱ्यांक विदेशांत धाडचें. भारतीय लोक उत्सवप्रीय तशेंच व्यक्तीपुजक आसात. चड करून दक्षीणेंत तर व्यक्तीपुजेचें व्हड अवडंबर आसा. हातूंत तरणाट्यांची संख्या चड आसा. फुडारी, अभिनेतो हांकां देव मानून तांचे सभेंत वांटेकार जावपाक तांकां खूब खोस भाेगता, आनी हेच खोशयेंतल्यान गर्दी वाडटा आनी अशी घणडूक घडटा. नागरिकांनी आपल्या उत्साहाक आळो घालपाची सामकी गरज आसा. आपल्या जिवा परस व्हड कांयच ना हें सगल्यांनी लक्षांत दवरचें. अतिउत्साह जिवार येवंक शकता हाचें भान लोकांनी दवरचें. अशें भान जर लोकांनी दवरलें आनी प्रशासनान गर्दीचें वेवस्थापन बरें तरेन केलें जाल्यार अश्यो दुर्दैवी घडणुको घडच्यो नात आनी तातूंत निश्पाप लोकांचो जीव वच्चो ना. आतां जालें तें जालें, पूण हाचे मुखार तरी अश्यो घडणुको घडच्यो न्हय हाची खबरदारी दरेकान घेवची. हे घडणुकेंत जीव व्हगडायिल्ल्या 39 लोकांक नमळायेचीं आर्गां!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
