भांगरभूंय | प्रतिनिधी
निर्लज्ज मनीस सदांच सुखी आसता. लज, भीड, मुर्वत बाळगिनासतना नेम- कायदे माड्डीत मुखार वता तोच ह्या कलियुगांत बऱ्याक पावता. तत्वां घेवन बसपी मनीस अपेसाचे गायरेंत मुंगरत वता, हातार कितें पडपाक जाय जाल्यार लाचार जावचेंच पडटा…. अश्या आशयाचीं वाक्यां सगल्यांच्या कानार पडल्या आसतलीं. तातूंत मात्तूय तथ्य ना, अशें म्हणप धाडसाचें थारतलें. कांय मनीस उक्तेपणी ह्यो गजाली करतात, तर कांय जाण प्रतिश्ठा, प्रामाणीकपण, उच्च तत्वांचीं म्होंवाळी लावन लिपचोरयां!! देशाक स्वातंत्र्य मेळून पाऊणशें वर्सां जालीं. आतां मेरेनचो राजकी इतिहास चाळीत जाल्यार भ्रश्टाचाराच्या मळाचेर फुडाऱ्यांनी संवसारीक विक्रम केल्ले पळोवंक मेळटले. गैरकारभारुय जाल्यात. कांय जाण मटण खावन हाडां गळ्यांत बांदून उक्तेपणी भोंवल्यात, तर थोड्यांनी हाडां सयत मटण खालां… आनी तें पचयलां. सरकारी बाबूय हे बाबतींत फाटीं नात. तातूंत सामान्य भौसाचोय आसपाव करपाक जाय. तांकां अनुदान, सवलती, येवजण्यो मेळ्ळ्यात. थोडेच ताका लायक आशिल्ले वा आसात. मात भोवतेकांनी वयर म्हणलां ते प्रमाण करांच्या रुपांत जमिल्लो हो लोकांच्या घामा- कश्टांचो पयसो लजे वांगडा भाजून खाल्ला.
दयानंद समाजीक सुरक्षा म्हणल्यार डीएसएसवाय हे येवजणे खाला गरिबांक वर्साक २४ हजार रुपया मेळटात. तिचो लाव घेवपाक पात्र नाशिल्ले ४९९ लाभार्थी सांपडल्यात. समाजकल्याण खात्यान तांकां आतां हे येवजणेंतल्यान अपात्र थारायल्यात. हेर येवजण्यांचो नियाळ घेतल्यार धपको दिवपी म्हायती मेळटली, अशें ह्याच स्तंभांत स म्हयन्यां पयलीं म्हणिल्लें. सरकारान डीएसएसवाय सयत सगल्या येवजण्यांच्या लाभार्थ्यांचीं नांव आनी हेर तपशील डेटा अॅनालेटिक विभागा कडल्यान घेवचो. मागीर तो पंचायत, पालिकांक धाडून तपासचो. जे पात्र नात, तांकां मेळपी पयशे बंद करचे आनी आतां मेरेन ह्या ठकसेनांक दिल्ले पयशे व्याजा सयत वाशील करचे. डीएसएसवाय येवजणेचो लाव गोंयांतले १ लाख ३९ हजार लोक गरीब लोक घेतात. पूण तें खरेंच गरीब आसात काय नात तें तपासून पळोवपाचो आतां वेळ आयला. सुक्या वांगडा ओल्याकूय जळचें पडटलें!
हे येवजणे खाला ज्येश्ठ नागरीक, एकटी रावपी बायल, दिव्यांगांक म्हयन्याक २००० रुपया मेळटात. विधवांक अडेज हजार मेळटात. तांचे खातीरूच ही येवजण सुरू केल्ली. समाजांत सुरक्षीत जगपाक मेळचें हे खातीर तांकां लोकांच्या करांतल्यान जमयिल्ल्या पयशांतल्यान हें थोडेंशें मानधन दितात. (ही रक्कम वाडोवपाक जाय.) मात, कांय नांवां तपासलीं तेन्ना ही येवजण घेवपी गरिबांचीं म्हायतीय भायर सरली. म्हयन्याक २००० घेवप्यां मदीं दोन ते तीन हाॅटेलांचे धनी आसात. थोड्यांचे शॅक्स, बोटी आसात. फाटलीं बरींच वर्सां ते हे येवजणेचो लाव घेतात खंय. तांकां ही येवजण घेवपाक कोणें सांगलें, तांचीं नांवां ते वळेरेंत कोणे घालीं, ते खंयचे संघटने कडेन, राजकी पक्षा कडेन संबंदीत आसात, इतलीं वर्सां सरकारी अधिकाऱ्यांक हें कशें कळ्ळें ना, ताचीय सरकारी यंत्रणांनी चवकशी करची. ४० वर्सां पयलीं ईबीसी (अर्थीक नदरेन गरीब वर्ग) येवजणेचो शिक्षणीक मळाचेर फायदो घेवपी विद्यार्थी आशिल्ले. तातूंतल्या कांय विद्यार्थ्यांच्या पालकांची भुसारी दुकानां, बशी, ट्रक आशिल्ले. हातूंत कांय करपाक मेळनाशिल्ले तें सरकारी नोकरी करपी लोकांक.
हालींच सरकारान बीपीएल (दळडीर रेशे सकयल) रेशनकार्डांचो लाव कोण घेतात, तें तपासून तीं रद्द करपाक लायिल्लीं. खरेंच गरीब आसात तांकां सरकारी येवजण्यो मेळच्योच, पूण गरीब म्हूण सांगून सरकाराक फटोवपी लोकांक भोगसुचे न्हय. गृहआदार येवजणेचेरुय लक्ष दवरचें. मुळांत सरकारी अनुदानां, सवलती उण्यो करपाक जाय. प्रधानमंत्री नरेंद्र मोदीन फाटीं रेवडी म्हूण उल्लेख केल्लो तो ताकाच लागून. अनुदानां, सवलती, विवीध आकर्शक अर्थीक येवजण्यो दितात, तातूंत लोकांचें कल्याण जावचें हो उद्देश १० टक्के आसता. उरिल्लो ९० टक्के हेतू, मतां मेळचीं हो!! सगलेच पक्ष ह्यो रेवड्यो वांटपाक लागल्यात. सध्या कांय राज्यांनी विधानसभा प्रचार चलता, मागीर लोकसभा प्रचार सुरू जातलो. दोळे, कान उक्ते दवरल्यार कोण रेवड्यो वांट्टा, कोण आपले परस बरी रेवडी वांटली म्हूण बेजार जाता, तें कळटलें.
सवलती, अनुदानां हीं गरिबांकूच शिक्षण, भलायकी, शेती आनी हेर वेवसायांनी मेळपाक जाय. तांची अर्थीक परिस्थिती सुदारली कांय तीं बंद जावंक जाय. लोकां कडल्यान जमयिल्ल्या पयशांतल्यान दितात, त्यो ह्यो सवलती, अर्थीक येवजण्यो म्हणल्यार खिरापती न्हय, इतलें तरी सरकारी यंत्रणा आनी लोकांनीय मतींत दवरचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
