भांगरभूंय | प्रतिनिधी
पर्वरे भाजपा वावुरप्यांचे बसकेंत डॉ. प्रमाेद सावंत हांचें उलोवप
म्हापशेंः भाजपा खातीर राजकारण हो वेवसाय न्हय तर पक्ष हो समाजीक वावर मानता अशें मुख्यमंत्री डॉ. प्रमोद सावंत हांणी सांगलें. भाजपा अंत्योदय, सर्वोदय आनी ग्रामोदय ह्या तत्वाचेर वावुरता. भाजपा वंचीत लोकांच्या कल्याणा खातीर वावुरता आनी जेन्ना गरीब लोकांची उदरगत आपोआप जातली तेन्नाच गांवांची उदरगत जातली. हाका लागून समाज कल्याण येवजणेचो फायदो समाजाच्या सगल्या वर्गांक पावोवचो हें भाजपा मंडळाच्या सगल्या 31 वांगड्यांचें कर्तव्य जाता. 2027 वर्साचे वेंचणुकेंत 27 विधानसभा सुवातो जिखपाचेर भाजप लक्ष केंद्रीत करता आनी हें ध्येय साध्य करपा खातीर सगल्या कार्यकर्त्यांक कश्ट करचे पडटले. कार्यकर्ता हे पक्षाचे बळगें आनी विधानसभा वेंचणुकेंत तांची भुमिका म्हत्वाची अशें डॉ प्रमाेद सावंत हांणी सांगलें.
पर्वरे सुकूर पंचायत हॉलांत पर्वरी भाजपा मंडळान आयोजीत केल्ले वावुरप्यांचे बसकेंत ते उलयताले. ह्या वेळार पर्यटन मंत्री आनी पर्वरीचे आमदार रोहन खंवटे, भाजपा गोंय फांट्याचे अध्यक्ष दामू नायक, भाजपा उत्तर गोंयचे अध्यक्ष दयानंद करबोटकार हाजीर आशिल्ले.
डॉ. प्रमोद सावंत हांणी पर्वरी वाठाराची उदरगत नेटान जायत आसा हाचो उल्लेख केलो. पर्वरे फ्लाय ओव्हर बांदप ही एक मुखेल उदरगत मोख आनी ताचें काम नेटान चलता. पर्वरेच्या रहिवाशांक सध्या खूब त्रास सोंसचे पडले तरी फुडल्या 8 ते 10 म्हयन्यां भितर प्रकल्प पुराय जातकच तांकां सू जातलें, कारण चडशी वाहन येरादारी जातली फ्लाय ओव्हरचेर अशें डॉ. सावंत हांणी सांगलें.
रोजगारा संबंदी डॉ. सावंत हांणी सांगलें की तांचें सरकार सगल्या बेकार तरणाट्यांक रोजगार दिवपाचे लागणुकेक बांदिल्लें आसा. स्पर्धात्मक तत्वाचेर कांय रित्यो सुवाती भरपाची गरज आशिल्ल्यान गोंय भौशीक सेवा आनी कर्मचारी निवड आयोग अस्तित्वांत उरतलो. धावी आनी बारावी पांवड्यार पास जाल्ल्या तरणाट्यांकय नोकरी मेळपाक जाय. तरणाट्यांनी कायम सरकारी नोकरेची वाट पळोवचे बदला सरकारी येवजण्यांचो लाव घेवन स्वताच्या पांयांर उबे रावून स्वताचो रोजगार सुरू करचो असो उलो मुखयमंत्री डॉ. सावंत हाणी मारलो.
मनीस संसाधन उदरगतींतल्यान फुडल्या 2 वर्सांच्या काळांत सुमार 4000 नोकऱ्यो निर्माण जातल्यो आनी दरेका मतदारसंघांतल्यान सुमार 300 ते 400 तरणाट्यांक नोकरी मेळटली अशी म्हायती तांणी दिली.
भाजपाचे राज्य अध्यक्ष दामू नायक आनी पर्यटन मंत्री रोहन खंवटे हांणी आपल्या उलोवपांत कार्यकर्त्यांक समाजीक येवजण्यो लोकांच्या सगल्या वर्गांत पावोवच्यो आनी समाजाच्या बरेपणा खातीर प्राधान्यान वावुरचें असो उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
