भांगरभूंय | प्रतिनिधी
गर्मेच्या दिसांनी आहार हलको फुलको आसप बरो. शीत, दाळ, म्हसगांच्या शेंगाचो, भेंड्याचो रोस, टाॅमेटोचो पातळ सार, एक पालेभाजी, जिरवणेक भरपूर सोलकडी आसप बरें.
गरमेचो मोसम आयलो काय आंगा वयल्यान घामाच्यो पांवळ्यो ओतपाक लागतात. आमचे कुडींतलें सगलें उदक घामाच्या रुपांत व्हांवन वता. गळो सामको सुकता. ह्या वेळार जाता तितलें थंड नाजाल्यार फ्रिजांतलें उदक पियेन पियेन दिसता. गरम उदक थंड करून पिल्यार चड बरें. मात्शी ताळ्याक आनी जिवाक थंडसाण मेळटा. उदक पियेतना जतनाय घेवप बरें. उब्यांनी घटाघटा उदक पियेवप सामकें घातक. काळजाचें दुयेंस जावपाची दाट शक्यताय आसता. एक घोट पसून उदक पियेवचें जाल्यार जमनीर बसून वा कदेलाचेर बसून पियोवचें. कुडीचो तोल बिघडना. आमचे कुडीचो प्रत्येक अवयव पेशी मेरेन तें उदक रोखडेंच पावता. लिंबू सरबत, काळिंगाचो ज्यूस, आडसराचें उदक भरपूर पियेवपाक जाय. मात तांचे भाव मळबाक तेंकल्यात. लिंबू सरबत तीस रुपया जालां. आडसर पन्नास रुपया. तरीय जांकां शक्य आसा तांणी तें दिसांतल्यान एक फावट तरी पिवचेंच. उकळून थंड केल्लें उदक जिवाक बरें, हें विसरचें न्हय. उठसूठ थंड पेयां पियेवचीं न्हय.
आडसरांत खूबशीं पुश्टीक तत्वां आसतात. तें एक हायड्रेटिंग पेय. सैमाची देणगीच. जांकां तें पियेवप परवडना तांणी घरचे घरा कोथमीर आनी जिरें बारीक धाडोवन ताची पूड करची आनी सळसळट्या उदकांत तें शिजोवन थंड जातकूच पियेवचें. सामकें बरें. हाका लागून मुतपाकूय बरें जाता. सात्विक आहार म्हणटात तो घेवचो.
बाजारांत वा हेर खंयूय वतना सकाळीं कंवळ्या वतांत वच्चें. भायलीं सगलीं कामां सुर्य तकलेर येवचे पयलीं करचीं. जर रखरखत्या वतांत वच्चेंच पडलें जाल्यार तकलेर चेंपें, कॅप घालचें वा स्कार्फ बांदचो. दोळ्यांचेर काळें गाॅगल लावचें, सत्री घेवची. वांगडां उदकाची बाटली आनी नॅपकीन घेवप सामकें गरजेचें. चड वगद वतांत भोवचें न्हय. म्हत्वाचें काम नाजाल्यार भायर सरचेंच न्हय. घरांत बसून वाज येता, खंय टायमपासाक बी फिरपाक वचपाचें आसल्यार पांचां उपरांत भायर सरचें.
गर्मेच्या दिसांनी आहार हलको फुलको आसप बरो. शीत, दाळ, म्हसगांच्या शेंगाचो, भेंड्याचो रोस, टाॅमेटोचो पातळ सार, एक पालेभाजी, जिरवणेक भरपूर सोलकडी आसप बरें. चमचमीत मसालेदार, डीप फ्राय, तळिल्लें नुस्तें, मटन, शागुती, चिकन चिली, लेग पीस खावप बरें न्हय. मसाल्याचें, तिखट, तेलाचें कांयच ना खाल्यार चड बरें. तांतयां पसून सप्तकांतल्यान एकदां वा दोनदां आनी तींय घरा कडेन खावप बरें. भायर तेंच तेंच तेल वापरपाची शक्यताय आसता. तशेंच जिनसांत खूब तेल आसता. ताका लागून बऱ्याच्या हाॅटेलांत वच्चें, नाजाल्यार वयर म्हणलां ते प्रमाण घरा खावप चड बरें.
लस्सी, उसाचो रोस, कोकम सरबत अतिउत्तम. बीट, गाजर उकडून केल्लो सूप, मोसंबी ज्यूस, टाॅमेटो सूप, मुगाचें शिजोवन केल्लें पातळ उदक परत परत पियेवप बरें. सांजच्या वेळार भायर फिरचें. रातच्या वेळार थंड वारें आंगार घेवपाक भायर चलप भलायकेक बरें. पूण, सुरक्षीत जाग्यांचेर फिरचें. हालीं मेळत थंय सुणीं वाडटल्यांत. तांचो त्रास जावं येता. कुडीक व्यायाम जाता आनी न्हिदिल्ले कडेन बरी झेम लागता.
गर्मेच्या दिसांनी दर्यावेळेर फिरपाक वचप बरें. मात,गोंयांतल्यो चडश्यो दर्यावेळो काळोख पडपाक लागलो काय भयानक जातात, अशें लोक म्हणटात. तेन्ना कुटुंबाक घेवन वचप्यांनी सुरक्षीत दर्यावेळेचेर वच्चें. एकोड्या जाग्यार भोंवचें न्हय. तशेंच काळोख पडपाक लागलो काय घरा परत येवचें. गर्मेच्या दिसांनी खारें वारें घेवप भलायकेक सामकें बरें.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
