गरज आसा काळा वांगडा बदलपाची

भांगरभूंय | प्रतिनिधी

पुरुशप्रधान समाजान अश्यो कितल्योश्योच गजाली रिती प्रमाणें चलत आयल्यात, पूण केन्ना तरी त्यो बदलपाची गरज आसतलीच न्हय. बायलांचें शोशण खूब वर्सां जायत आयलां पूण हे बाबतींत बायलोच जबाबदार आसात, हें लेगीत तितलेंच खरें.

चवथ लागीं पावली काय आवयांच्यो क्लिनिकांत फावटी वाडटात. दोतोर, म्हजे चलयेची पाळी लागीं पावल्या, तारीख फुडें धुकलपाक होमियोपॅथिन किदें उपाय आसा बी? त्यो दुसर्‍यो गुळयो बर्‍यो न्हय म्हणटात न्ही? कांय आवयांक बेगीन पाळी जावपाच्यो गुळयो दिवन चलयेक ‘मेकळें’ करपाचें आसता ना जाल्यार कांय जाणांक तारीख मुखार धुकलपाची आसता, एकूण मेळून सणा वेळार पाळी नाका.
पाळी वा पिरियड्सा कडेन पळोवपाचो हो दिश्टीकोण खंयच्यान तयार जालो काय? पिरियड्स म्हळ्यार कुडीन कितें अशें जाता हें जाणून घेवपाचो यत्न केन्ना कोणें केला व्हय? कित्याक म्हूण मासीक पाळयेचेर “भश्ट” म्हणपाचें लेबल लागलें?
6 वर्सां पिराये सावन भुरग्याचे कुडींत कांय बदल दिसपाक लागतात. हे बदल चली तशेंच चल्यां मदी लेगीत जातात. चली भुरग्या भितर स्तनाची वाड, लैंगीक अवयवांची वाड तशेंच केंसांची वाड अशे दिसून येता. तें भुरगें जेन्ना 10-12 वर्सांचें जाता तेन्ना ताचे कुडींत कांय हार्मोनल बदल जाल्ल्यान ताच्यो ovaries, ovum वा egg release करपाक लागतात. तें egg जेन्ना fertilise जायना तेन्ना गर्भ सुरक्षीत दवरपाचे नदरेन जें गर्भस्थानाच्या भितरल्यान तयार जाल्ले थर आसतात, ते घेवन गर्भाशयाच्या तोंडांतल्यान रक्ता वांगडा ते u fertilised egg भायर सरता, ही प्रक्रिया जेन्ना दर म्हयन्याक जाता तेन्ना तिका आमी periods म्हणटात. इतलो सोंपो आनी प्राकृतीक प्रॉसॅस.
खूब वर्सां आदीं चलयेचें खूब ल्हान वयार लग्न जातालें आनी पयली पाळी ताका आपल्या घोवागेर जाताली. त्या वेळार त्या भुरग्याक घरच्या सगळ्या कामांतल्यान थोडो विसव मेळचो म्हण, जाणटेल्यांनी पाळयेचें निमीत घेवन ताका कडेक बसोवपाचो तर्क लायलो म्हण काणी आयकुपाक मेळटा. तशेंच पिरियड्सा वेळार जाल्ल्या रागताच्या प्रवाहा खातीर ताच्या आंगार घोळपी जंतू बसत, नितळसाण उरची म्हण ताका कडेक बसयताली अशेंय बी कांय लोक मानतात.
नितळसाण ह्या मुद्द्याचेर उलोवप जालें जाल्यार आयच्या काळांत कितल्याश्याच तरांच्यो sanitation methods उपलब्ध आसात, देखून sanitary pads, menstrual cups, tampons अश्यो जायत्यो sanitation वा स्वच्छता संबंदीत पद्दती आयज चलयो वापरतात, ज्यो आदल्या तेंपार नासताल्यो. आतां तशीच जागृताय लेगीत वाडल्या मागीर नितळसाणेक लागून एके चलयेक कडेक दवरप सारकें?
सगळ्यांत म्हत्वाचो विशय म्हळ्यार चलयांक जावपी मानसीक त्रास. कुडींत जावपी एके नैसर्गीक प्रक्रिये खातीर भश्ट म्हण हिणसायलें जाल्यार ते अस्तुरेचे मानसीक भलायकेचेर जावपी परिणामाचो आमी कोणूच विचार कित्याक करिनात? ल्हान माणकुल्याक जेन्ना पाळी येता, तेन्ना ताका कुशीक बसोवप, सण परबांक ताणें बाकीच्या भुरग्यां बरोबर खेळप ना, घरांत चवथ आसली जाल्यार ताका वेगळे कुडींत बासोवप, ताका वेगळें ताट, ताचे वेगळे कपडे, ताच्या लागीं कोणें वचप ना. हाचो त्या ल्हान भुरग्याचेर कितें परिणाम जाता हें कोणें लक्षांत घेतलां?
दर एका सण परबेक कितल्योश्योच बायलो, चलयो पाळी मुखार धुकलपाच्यो गुळयो घेतात पूण हाचो अडेचो परिणाम किदें जातलो हो विचार कोणूच करिनात. खंयचेय नैसर्गीक प्रक्रिये आड घेतिल्लें वखद केन्नाच जिवाक बरें आसपाक शकना, ताचो वायट परिणाम जातातूच.
खूब कडेन ह्या संबंदान उलोवप जाता तेन्ना, हें शारांनी जायना गांवान चड पळोवपाक मेळटा असो सूर आयकूंक मेळटा पूण अशे विचार शारांत रावपी शिकिल्ल्या लोकां मदीं चड पळोवपाक मेळटा, हेंय तितलेंच खरें. शिकिल्ली तरनाटीं पिळगी लेगीत ह्या रुढी विचारांक बळी पडटना दिसतात. खूब वर्सां चलून आयिल्ली रीत न्ही, मागीर 4 दीस पाळ्ळे जाल्यार कितें जातलें असोय विचार जायत्या जाणांचो आसता. पूण हेच 4 दीस फुडले पिळगे खातीर कितलें घातकी थारपाक शकतात ताचो विचार कोणूच करिनात.
पुरुशप्रधान समाजान अश्यो कितल्योश्योच गजाली रिती प्रमाणें चलत आयल्यात, पूण केन्ना तरी त्यो बदलपाची गरज आसतलीच न्हय. बायलांचें शोशण खूब वर्सां जायत आयलां पूण हे बाबतींत बायलोच जबाबदार आसात, हें लेगीत तितलेंच खरें.
गरज आसा ती काळा वांगडा बदलपाची. कांय परंपरेन चलून आयिल्ल्या रुढी रितींक खंड घालपाची. आनी तें जर जातलें जाल्यार आयचीं भुरगीं म्हळ्यार आमचो फुडार हांकां पाळी हो रोग म्हण शिकयनासतना तांकां हे प्रक्रियेंतलें विद्यान आनी तातूंतलें सभावीकपण पटोवन दिवपाचें. Periods म्हळ्यार भश्ट ह्या विचारा कडल्यान तांकां पयस दवरपाची. तांचे विचार सशक्त जाले जाल्यारूच समाज म्हणून आमचो उद्धार जातलो, ना जाल्यार आनीक 20 वर्सां लेगीत खंयच्या तरी घरांत एके कुडींत कडेक बसयल्लें भुरगें बाकीच्या भुरग्यांक पळोवन स्वताक भश्ट म्हण हिणसावपाक लागतलें.

डॉ. वेदिका वाळके
8698387747