भांगरभूंय | प्रतिनिधी
च्या विशीं जायते गैरसमज आसात. च्या पियेल्यार तोंड काळें जाता वा ओंठ काळे जातात अशेय कांय समज आसात. तशेंच चड च्या पियेल्यार बायलांक वांझपण जाता अशेंय म्हणटात.
च्या, कॉफी वा जायत्या पेयां मदीं कॅफीनाचें प्रमाण व्हड प्रमाणांत आसता. कॅफीन ल्हवू ल्हवू आमच्या जिविताचो एक अभिन्न घटक जावपाक लागला. जायते जाण दिसांतल्यान चार ते पांच फावटीं च्या आनी कॉफी पियेतात, जें भलायकेक बरें न्हय. चड प्रमाणांत च्या पियेल्यार प्रजनन क्षमतायचेर वायट परिणाम जाता अशें जायत्या अभ्यासांतल्यान दिसून आयलां.
भलायकी तज्ञांच्या मतान, दीसभर 200 मिलीग्राम कॅफीन सेवन केल्यार तुमच्या प्रजनन क्षमतायचेर कसलोच परिणाम जायना. ते पुरायपणान सुरक्षीत आसा. पूण 300 मिलीग्रामां परस चड कॅफीन घेतल्यार ताचो प्रजनन क्षमतायचेर गंभीर परिणाम जावंक शकता. चड च्या पियेल्यार बायलांक गुरवारपणांत त्रास जावंक शकतात. हाचो दादल्यांच्या स्पर्म काउंट आनी गुणवत्तेचेरूय वायट परिणाम जावं येता.
भलायकी तज्ञांच्या मतान कॅफीन हो असो पदार्थ जो मज्जातंतूक सक्रिय करताच पूण पुराय कुडींत उर्जा निर्माण करता. इतलेंच न्हय तर ध्येयाचेर लक्ष केंद्रीत करपाकय मजत करता. पूण कॅफीन आनी प्रजनन क्षमताय हांची गजाल येता तेन्ना 35-40 वर्सां पिरायेचे आसत जाल्यार आनी तुमी गरजे परस चड कॅफीन पितात जाल्यार ताचो थेट परिणाम फर्टिलिटीचेर जाता. कॅफीनाचो परिणाम दादल आनी बायलांचेर वेगवेगळो आसूं येता.
कॅफीनाचे वायट परिणाम बायलांचे भलायकेचेर चड जावंक शकतात. बायलांनी चड कॅफीन घेतल्यार ताचो थेट परिणाम ओव्यूलेशनाचेर जावं येता. अंडाशयांतल्यान तांतयां फुटून भायर सरपाची प्रक्रिया स्लो जावं येता. इतलेंच न्हय तर हाका लागून गर्भधारणेकय आडमेळीं येवंक शकतात. गुरवारपणांत च्या वा कॉफीचें चड सेवन केल्यार मिसकॅरेज आनी प्री मॅच्युअर जल्माचो धोको वाडूंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
