भांगरभूंय | प्रतिनिधी
मुर्तींनी पीओपी प्रमाण चड आसल्यार 25 हजारांचो दंड
पणजी: चवथी वेळार गणेश मुर्ती तयार करपी वा विक्री करपी चित्रशाळांक गोंय प्रदुशण नियंत्रणा मंडळाच्या पोर्टलाचेर नोंदणी करप सक्तीचे आसा. गणेश मुर्तींच्या नमुन्याची आकस्मीक तपासणी जातली. प्लास्टर ऑफ पॅरीसचे (पीओपी) प्रमाण मान्यताये परस चड आसत जाल्यार 25 हजारांचो दंड जातलो, असो आदेश पर्यावरण खात्याच्या संचालकांनी जारी केला. हे विशींची अधिसुचोवणी बेगिनूच उजवाडा येतली.
पर्यावरण जतनाय कायदो 1986च्या कलम 5 खाला हो आदेश जारी जाला. चवथी वेळार सगली कडेन गणेश मुर्तींची विक्री जाता. कांय जाण गणेश मुर्ती तयार करून विकतात. कांय जाण भायल्या राज्यांतल्यान मुर्ती हाडून तांची विक्री करतात. भायल्या राज्यांतल्यान येवपी गणेश मुर्ती मदीं पीओपीचें प्रमाण चड आसता, अशें दिसून आयलां. हाका लागून नोंदणी तशेच मुर्तींच्या नमुन्यांची तपासणी आतां खर जातली.
प्रदुशण नियंत्रण मंडळान नोंदणी खातीर एक खासा पोर्टल तयार करचो पडटलो. गणेश मुर्तींची विक्री करपी विक्रेते तशेंच चित्रशाळांनी अंदूं 30 मे मेरेन ह्या पोर्टलाचेर नोंदणी करप बंधनकारक आसा. पोर्टल तशेंच नोंदणी विशींची जायरात प्रदुशण नियंत्रण मंडळान सगल्या दिसाळ्यांनी दिवची पडटली. गणेश मुर्ती खंयच्यान हाडटले ताची म्हायती, पत्तो हाची म्हायती पोर्टलाचेर लोड करची पडटली. शिमेचेर गणेश मुर्ती हाडपी गाडयांची तपासणी करपाचे निदेश येरादारी, पुलीस तशेंच अबकारी खात्याक दितले. नोंदणी आशिल्ल्यांच्योच गाडयो शिमेचेर सोडच्यो, अशें आदेश पुलीस तशेंच अबकारी खात्याक दितले.
चित्रशाळा/विक्रेत्यांक चिकण माती/शाडू मातीच्या मुर्तींची विक्री करपाक मेळटली. पीओपीचें प्रमाण 20 टक्क्यां परस उणे आसपाक जाय. संबंदीत पंचायती/नगरपालिकांनी आपल्या वाठारांत नोंदणी जाल्ल्या चित्रशाळा/विक्रेत्यांची नांवां, पत्तो आनी फोन नंबर दर वर्सा 30 एप्रील मेरेन हस्तकला म्हामंडळ, उपजिल्होधिकारी तशेच प्रदुशण नियंत्रण मंडळाक दिवची पडटली. हाचे उपरांत चवथीच्या एक म्हयनो पयली हस्तकला म्हामंडळ आनी उपजिल्होधिकाऱ्याच्या प्रतिनिधी सयत प्रदुशण नियंत्रण मंडळ विक्रेते/चित्रशाळांक भेटी दिवन आकस्मीक पळोवणी करतले. मुर्तींची पळोवणी करून नमुने घेतले. हे नमुने प्रयोगशाळेंत व्हरून तांची तपासणी जातली. पीओपीचें प्रमाण चड आसलें जाल्यार 25 हजारांचो दंड जातलो. ह्या मुर्तीचो विलो आपल्या खर्चान लावपाची जापसालदारकी विक्रेत्यांची आसतली. विलो लावन ताचो अहवाल सादर करप बंधनकारक आसा. विलो लायलो ना जाल्यार 50 हजारांचो दंड जातलो. एकाच विक्रेत्या कडेन चड फावटी पीओपी मुर्ती दिसल्यो जाल्यार ताची नोंदणी कायमची रद्द जातली.
चित्रशाळा/विक्रेत्यांनी नोंदणी केली ना जाल्यार ताच्या आस्थापनाक सील मारून 3 हजाराचें शुल्क वसूल करून घेतले. ह्या शुल्का वरवीं तांकां नोंदणी करची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
