भांगरभूंय | प्रतिनिधी
नेम खरपणान पाळून कामकाज चलोवपाचें उतर
भांगरभूंय । प्रतिनिधी
पणजी : सांवड्डेंचे आमदार आशिल्ले सत्ताधारी भाजपाचे उमेदवार गणेश गांवकार हांणी अपेक्षे प्रमाण काँग्रेसीचे उमेदवार एल्टन डिकॉस्टा हांकां हारोवन सभापतीपदाचे वेंचणुकेंत जैत मेळयलें. रमेश तवडकार हांचे उपरांत आतां गणेश गांवकार हे विधानसभेचे नवे सभापती जाल्यात. नेम खरपणान पाळून सभाघराचें कामकाज चलयतले. हेरांक आडमेळें हाडिनासतना सगल्यांनी गोंयचे प्रस्न सभाघरांत मांडचे, असो उलो नव्या सभापतींनी निवडी उपरांत मारलो.
सत्ताधारी आमदारां सयत विरोधी आमदारांनीय नव्या सभापतींच्या कार्याची तोखणाय करतना निवडी विशीं तांकां परबीं भेटयलीं.
रमेश तवडकार हांणी सभापतीपदाचो राजिनामो दिले उपरांत सभापतीपद रितें जाल्लें. चवथी पयलीं दिगंबर कामत हांचे सयत रमेश तवडकार हांणी मंत्री म्हणून सोपूत घेतिल्लो. सभापतींची निवड करपा खातीर बिरेस्तारा विधानसभेचें खास अधिवेशन जालें. सभापतीपदा खातीर काँग्रेसी वतीन एल्टन डिकॉस्टा, जाल्यार भाजपा वतीन गणेश गांवकार हांचे उमेदवारी अर्ज सादर केल्ले. उपसभापती ज्योशुआ डिसोझा हांचे अध्यक्षते खाला सभापतीपदा खातीरची निवड जाली. सुरवातेक एल्टन डिकॉस्टा हांच्या सभापतीपदा खातीरच्या उमेदवारीचो प्रस्ताव विरोधी पक्ष फुडारी युरी आलेमांव हांणी सभाघरांत मांडलो. ह्या प्रस्तावाचेर मतदान जावन तो भायर मारलो. उपरांत गणेश गांवकार हांचे उमेदवारीचे विवीध प्रस्ताव सत्ताधारी आमदारां कडल्यान मांडले. सगल्या प्रस्तावांचेर एकठांय येवन मतदान जालें. भाजप, मगो सयत अपक्ष आमदारांनी प्रस्तावाचे वटेन मतदान केल्ल्यान गणेश गांवकार सभापती म्हणून वेंचून आयले.
जेनिफर मोन्सेरात आशिल्यो गैरहाजीर
भलायकी इबाडिल्यान ताळगांवच्यो आमदार जेनिफर मोन्सेरात ह्यो सभाघरांत हाजीर नाशिल्ल्यो. हाका लागून सत्ताधारी गटाचे एक मत उणें जालें. हाका लागून गणेश गावकार हे 31 आड 7 मतांनी जैतवंत जाले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
