भांगरभूंय | प्रतिनिधी
‘‘नेम खरपणान पाळून कामकाज चलयतलों’’
पणजी : भाजपाचे उमेदवार गणेश गांवकार (सांवड्डेंचे आमदार) हांणी अपेक्षे प्रमाण कॉंग्रेसीचे उमेदवार एल्टन डिकॉस्टा हांकां 32 आड 7 मतांनी पराभव करीत सभापतपदाची वेंचणूक जिंखले. रमेश तवडकार हांचे उपरांत आतां गणेश गांवकार हे विधानसभेचे नवे सभापती जाल्यात. नेम सामके खरपणान पाळून सभागृहाचें कामकाज चलयतले. हेरांक आडमेळें हाडिनासतना सगल्यांनी राज्याचे प्रस्न सभाघरांत मांडचें, असो उलो नव्या सभापतींनी निवडी उपरांत मारलो.
सत्ताधारी आमदारां सयत विरोधी आमदारांनीय नव्या सभापतींच्या कार्याची तोखणाय करतना निवडी विशीं तांकां परबीं भेटयलीं.
रमेश तवडकार हांणी सभापतीपदाचो राजिनामो दिले उपरांत पद रितें जाल्लें. चवथी पयलीं दिगंबर कामत हांचे सयत रमेश तवडकार हांची मंत्री म्हणून सोपूतविधी जाल्लो. सभापतींची निवड करपा खातीर बिरेस्तारा विधानसभेचें खास अधिवेशन जालें. कॉंग्रेसी वतीन एल्टन डिकॉस्टा, जाल्यार भाजपा वतीन गणेश गांवकार हांचे उमेदवारी अर्ज सादर केल्ले. उपसभापती आशिल्ले ज्योशुआ डिसोझा हांचे अध्यक्षते खाला निवड जाली. सुरवातेक एल्टन डिकॉस्टा हांच्या सभापतीपदा खातीरच्या उमेदवारीचो प्रस्ताव विरोधी पक्ष फुडारी युरी आलेमांव हांणी सभाघरांत मांडलो. ताचेर मतदान जावन तो भायर मारलो. उपरांत गणेश गांवकार हांचे उमेदवारीचे विवीध प्रस्ताव सत्ताधारी आमदारां कडल्यान मांडले. सगल्या प्रस्तावांचेर एकठांय येवन मतदान जालें. भाजप, मगो सयत अपक्ष आमदारांनी प्रस्तावाचे वटेन मतदान केल्ल्यान गणेश गांवकार सभापती म्हणून वेंचून आयले.
प्रतिक्रिया
विरोधकांचें संख्याबळ उणे आसलें तरी नव्या सभापतींनी विरोधी आमदारांकूय सभाघरांत योग्य वेळ दिवपाक जाय. नव्या सभापतींक परबीं. – युरी आलेमाव, विरोधी पक्ष फुडारी
सभापतींनी पक्षपाती आसचें न्हय. विरोधकांक जनतेचे प्रस्न मांडपाची योग्य संद दिवन सभापतींनी खांब्या प्रमाण मदीं उबें रावचें. – विरेश बोरकार, आमदार, आरजी
योग्य रितीन सभागृहाचें कामकाज चलयतना सभापतींनी पदाचें पावित्र्य राखप गरजेचें. – सुदीन ढवळीकार, वीज मंत्री
सभापती आसतना म्हाका सगल्या आमदारांचें सहकार्य मेळिल्लें. गोंयच्या हिताक प्राधान्य दिवन सभाघराचें कामकाज चलपाक जाय. – रमेश तवडकार, खेळांमंत्री
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
