भांगरभूंय | प्रतिनिधी
एकलो बंगळुरू, जाल्यार दुसरो हैदराबाद सावन ताब्यांत
मोटार चालक आनी ताच्या सांगात्याची खोलायेन चवकशी
पांच दरोडेखोरांक सोदपाचे पुलिसांचे नेटान यत्न
भांगरभूंय । प्रतिनिधी
म्हापशें : म्हापशेंच्या गणेशपुरींतल्या दरोडो प्रकरणांत बंगळुरू आनी हैदराबादा सावन दोगांक उखलपाक पुलिसांक येस आयलें. तशेंच मोटारचालक आनी ताच्या सांगात्याची खोलायेन चवकशी चल्ल्या. तातूंत वांटेकार आशिल्ल्या हेरांचो सोद चालू आसा. मुळावे चवकशेंत दोनापावल आनी म्हापशेंच्या दरोड्यांत एकेच टोळयेचो वांटो आशिल्ल्याचो अदमास पुलिसांनी काडला.
गणेशपुरी म्हापशेंच्या हावसींग बोर्ड कॉलनींत भर लोकवस्तेंत आशिल्ल्या डॉ. महेंद्र मोहन घाणेकार हांच्या बंगल्याचेर मंगळारा फांतोडेर सात दरोडेखोरांनी सशस्त्र दरोडो घातिल्लो. कुटुंबीयांक सुरयेचो भंय दाखोवन मारपेट करून सुमार 35 लाखांचो ऐवज लुटिल्लो. दरोडो घातले उपरांत दरोडेखोर बेळगांवां पळून गेल्लयाचो दुबाव पुलिसांक आशिल्लो. ते प्रमाण पुलिसांनी कारवाय करून बंगळुरू, हैदराबाद सावन दोगांक ताब्यांत घेवपाक पुलिशांक येस मेळ्ळें.
दरोड्याची घडणूक मंगळारा फांतोडेर 3 ते 5 वरांच्या सुमाराक घडली. डॉ. घाणेकार हांचें कुटुंब सुस्त न्हिदेंत आसतना, सात दरोडेखोर जनेलाचे लोखंडाचे ग्रील कांपून बंगल्यांत घुसले. दरोड्या वेलार डॉ. घाणकार हांची 80 वर्सा पिरायेची आवय रांदचे कुडींत च्या करताली. मातूय सुलूस लागपाक दिनासतना दरोडेखोरांनी तिचेर हल्लो केलो. तिका सुरयेचो भंय दाखोवन थंयच बांदून दवरली. उपरांत पयल्या माळ्याचेर न्हिदिल्ले डॉ. महेंद्र, ताची घरकान्न डॉ. अनुराधा आनी 14 वर्सां पिरायेचे चलयेक उठोवन सुरयेचो भंय दाखयलो. तांचे सगले मोबायल फोन काडून घेतले. दरोडेखोरांनी डॉ. अनुराधा हांकां लेगीत कुडींतल्या बाथरुमांत बंद कली. जाल्यार डॉ. महेंद्र हांकां मारपेट करून बांदून घातलो. चलयेक तिचे कुडींत बंद करचे खातीर धमकी दिवन आलमारीच्यो चावयो घेतल्यो.
दरोडेखोरांनी घरांतल्यो भांगराच्यो वस्ती आनी रोख रक्कम असो वट्ट 35 लाखांचो मुद्देमाल फारायलो.
दरोडेखोरांक सोदपाक पुलिसांनी कर्नाटक हैदराबाद पंगड धाडिल्लो. मजगतीं, बंगळुरू आनी हैदराबाद सावन दरेकी एकल्याक ताब्यांत घेवपाक पुलिसांक येस आयलें. ते भायर पुलिसांनी एक मोटार चालक आनी ताच्या सांगात्याक धरून तांची चवकशी सुरू केल्या.
दरोडो घातले उपरांत दरोडेखोरांनी सीसीटीव्ही कॅमेऱ्याचो डीव्हीआर काडून व्हेल्लो. तशेंच दरोडेखोरांनी डॉ. घाणेकार हांचो मोबायल फोन आनी मारुती मोटार व्हेल्ली. ती मंगळारा फांतोडेर 5.45 वरांच्या सुमाराक पणजी कदंब बसस्टॅण्डा मुखा वयल्या अटल सेती पुला पोंदा पार्क केल्ली. ते उपरांत स दरोडेखोरांनी पणजेची काळी हळदुवी टॅक्सी करून मोटार चालकाक बेळगांवां पावोवपाक सांगलें. गोंया भायर वचपाचें आशिल्ल्यान टॅक्सी चालकान पोरणें गोंय- खोर्ली सावन दरोडेखोरांक खाजगी मोटार करून दिली. सकाळीं 8.30 वरांच्या सुमाराक बेळगांव बसस्टॅणअडा लागसार स दरोडेखोरांक सोडले उपरांत मोटार घेवन चालक 11.30 वरांच्या सुमाराक पणजे पावलो. ह्या प्रकरणांत पुलिसांनी वयले म्हायती वयल्यान म्हापशें आनी हेर पुलीस स्टेशना वयल्या कर्मचाऱ्यांचे चार ते पांच पंगड कर्नाटक, महाराष्ट्र आनी हेर राज्यांनी तांचो सोद घेवपाक धाडिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
