भांगरभूंय | प्रतिनिधी
म्हापशें ः गणेशपुरीच्या डॉ. महेंद्र घाणेकार हांच्या बंगल्यार घाल्ल्या दरोडो प्रकरणांत पुलिसांनी अटक केल्ल्या दोगांय दुबावितांक 9 दीस पुलीस बंदखणींत दवरपाचो आदेश म्हापशें न्यायालयान दिला.
दुबावीत संतोष बाबू बी. (27, रा. इब्बलुरू बंगळूरू) आनी सफिकुल रोहूल अमीर (37, रा. इब्बलुरू बंगळूरू) ह्या दोनूय मूळ बांगलादेशी नागरिकांक म्हापशें पुलिसांनी मंगळारा 14 तारखेर अटक केल्ली. बुधवारा दनपरां ह्या दुबावितांक म्हापशें पयली श्रेणी न्यायालयांत पुलिसांनी हाजीर केले तेन्ना न्यायालयान तांकां 9 दिसांची पुलीस बंदखण आयकयली.
मजगतीं, फाटले 7 तारखेर डॉ. घाणेकार हांच्या बंगल्यार हो दरोडो घाल्लो. दरोडेकारांनी घाणेकार कुटूंबियांक धमकावन आनी बंदी करून घरांतलो 35 लाखांचो माल व्हेल्लो. हे स जाणांचे मुखेल दरोडेखोर टोळयेक बांगलादेशांत पळून वचपाक मजत केल्ल्याच्या आरोपा वयल्यान वयल्या दुबावितांनी अटक केल्ली. दुबावीत हे टोळयेंतल्या चोरांचे सोयरे. उपरांत पुलिसांनी तांत्रीक म्हायतीच्या आदारार दुबावितांक ताब्यांत घेवन घडणुकेच्या सप्तका उपरांतूच अटक केल्ली.
फुडलो तपास पुलीस निरीक्षक निखील पालेकार हांच्या मार्गदर्शनाखाला उपनिरीक्षक यशवंत मांद्रेंकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
