भांगरभूंय | प्रतिनिधी
म्हापशें : गणेशपुरी, म्हापशेंच्या डॉ. महेंद्र घाणेकार हांच्या बंगल्याचेर दरोडो पडलो. पिस्तोल आनी सुरयेचो भंय दाखोवन पिडेस्त कुटुंबाक बांदून घालून स- सात दरोडेखोरांनी घरांतलें भांगर आनी रोख मेळून सुमार 50 लाखांचो ऐवज चोरलो. चोरांनी घाणेकार हांची गाडीय व्हेली.
ही घडणूक आयज फांतोडेर सुमार 3 ते 5 मजगतीं घडली. स ते सात जाण जनेलाचे लोखणाचें ग्रील कापून घरांत भितर सरले. ह्या वेळार डॉ. महेंद्र घाणेकार कुटुंबांतले चार वांगडी सुस्त न्हिदिल्ले. दुबावितांनी तांकां उठयले आनी सुरयेचो भंय घालो. ह्या वेळार प्रतिकार करपी डॉ. घाणेकार तशेंच तांच्या कुटुंबियांक दुबावितांनी मारपेट केली. उपरांत तांकां एके दोरये बांदलीं आनी घरांतलें भांगर, पयशे आनी मोलादीक वस्तू चोरल्यो. तशेंच वतना तांच्या घरा भायर पार्क केल्ली गाडीय चोरून व्हेली.
हे घडणुकेची म्हायती मेळटांच म्हापशें पुलिसांनी घडणुकेसुवातेर धांव घेतली आनी पंचनामो केलो. जखमी घाणेकार कुटुंबियांचेर म्हापशें जिल्लो हॉस्पिटलांत उपचार केले. पुलीस अधीक्षक राहुल गुप्ता हांणीय घडणुके सुवातेर भेट दिली. पुलीस दुबावितांचो सोद घेतात.
कांय दिसां पयलीं दोनापावला एका उद्देजकाच्या बंगल्यांतूय चोरी जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
