भांगरभूंय | प्रतिनिधी
2027 त 27 चे मोखीचें गणीत मांडटना 15 भयणी गोंय विधानसभेंत तांचे बराबरीन आसतल्यो हे खातीर मुख्यमंत्री डाॅ. सावंत वावुरतले अशी आस्त आसा. गोंयचे लोकसंख्येच्या गणितांचो अभ्यास ताणीं केला आसतलोच.
केंद्रीय मार्ग (रस्तो) येरादारी आनी म्हामार्गमंत्री नितीन गडकरी हांचें सुपुल्ल्या गोंयां कडेन नातें आसा. गोंय आनी गोंयकारांक नमस्कार करुन ते आपल्या खात्याच्या उदरगतीची दिका बदलूंक सोदतात हें तांच्या उतरांतल्यान होल्मता. भाजपा गोंयांत स्वयंपूर्ण जाल्लें पळोवपाची तांची इत्सा आसा. आपलो हावेस उक्तायतना म्हत्वाचो रकाद मोन्यांनी ताणीं धाडला तो महाराष्ट्रवादी गोमंतक पक्षाक. भाजपाची संतत वाडल्यार 2027 त शिंवांकय पयस दवरपाक फाटीं रावप ना हो तांचो मंत्र. तांच्या मंत्राचो अर्थ मुख्यमंत्री डाॅ. प्रमोद सावंत हांकां समजला. 2027 त भाजपा 27 ही आमची मोख अशी जाप ताणीं दिल्या. मुख्यमंत्री डाॅ. सावंत हांकां ती वाट आदले मुख्यमंत्री मनोहर पर्रीकार हाणीं दाखयल्ली. त्या मार्गावेल्यान वतना उत्पल पर्रीकार तांचे वांगडा आसतले, न्हय आसचे.
श्री. गडकरी भाजपाचे एकनिश्ठ कार्यकर्ते, संघ परिवाराक लागीं. महाराष्ट्राचे मुख्यमंत्री जावपाची संद तांकां मेळूंक ना पूण महाराष्ट्राच्या विरोधी पक्ष मुखेलीपदार ते आशिल्ले. श्री. गडकरी 2007 ते 2013 वर्सांतले भाजपाचे राष्ट्रीय अध्यक्ष. गोंयची, देसाची गेल्ली सत्ता 2012, 2014 वर्सा भाजपाक परतून मेळोवन दिवपाक तांचो व्हड वांटो. गोंय साधनसुविधा विकास म्हामंडळ जल्माक घालपाचें तांचें सपन सत जालें. मोपा विमानतळा वेल्यान नागपूर येवप वचप तांकां सोपें जालां. रोखडेच जावपी महाराष्ट्र विधानसभा वेंचणुकेच्या गणितांची भासाभास गोंयांत विसव घेतना ताणीं केल्या आसतली. 2024 च्या महाराष्ट्र विधानसभा वेंचणुकेच्या गणिताचेर प्रदेश भाजपाच्या जैताचें (2027 त 27) गणीत निंबून आसा.
इतिहासाचेर मात्शें बोट दवरुन श्री. गडकरी हाणीं काँग्रेसीन केल्ल्यो आमदार फुगोवपाच्यो चुको आमकां हे फुडें नाकात अशें कळीत केलां. आमदारांचो आंकडो वाडलो जाल्यार मंत्रीपदा पासत सर्त वाडटा, भायल्यान हाडिल्ले आमदार म्हारग पडटात हें मुख्यमंत्र्यांकय कळ्ळां. आडमेळ्यांतल्यान मुखार वतना उदरगत जाल्या ती दोळे दिपकावपी नासली तरी तिगपी आसा हेंय ताणीं दाखोवन दिलां.
2027 त 27 चे मोखीचें गणीत मांडटना 15 भयणी गोंय विधानसभेंत तांचे बराबरीन आसतल्यो हे खातीर मुख्यमंत्री डाॅ. सावंत वावुरतले अशी आस्त आसा. गोंयचे लोकसंख्येच्या गणितांचो अभ्यास ताणीं केला आसतलोच. गोंय विधानसभेच्या वट्ट आमदारांची संख्या वाडोवपा पासत मतदारसंघ फेररचणूक ह्याच वगतार जावची. 2025 आॅगस्ट मेरेन तो वावर पुराय जावचो हेखातीर केंद्र सरकाराच्या फाटल्यान लागचें पडटलें.
राज्य सरकाराच्या मंत्र्यांच्या वावराचो नियाळ घेवन आॅक्टोबर – डिसेंबर 2024 मेरेन मंत्रीमंडळांत बदलय जातलो. ते खातीर बळगें केंद्रातलें वरिश्ठ मंत्री श्री. गडकरी हाणीं मुख्यमंत्र्यांक दिलां. एके अस्तुरेक, दोन आमदारांक राज्यमंत्री म्हणून चवथी आदीं मंत्रीमंडळांत आसपावन घेवचें.
राज्य सरकाराक भाजपाचे प्रदेशाध्यक्ष खासदार सदानंद तानावडे मार्गदर्शन करतात. मुख्यमंत्र्यां परस पिराय, शिक्षण, अणभव तांकां चड आसा. तांकां प्रदेशाध्यक्ष, राज्याचे जापसालकेंतल्यान मेकळे जायात असो रकादय श्री. गडकरी हाणीं पावयला? प्रदेश भाजपाचे अस्तुरी, युवा फांटे घटमूट करपाची जापसालदारकी सरचिटणीसांक दिल्या आसतलीच.
33 टक्के अस्तुरी राखीवता विधेयकांतल्यान महाराष्ट्र विधानसभेक अस्तुरी मुखेलमंत्री मेळूंक शकता. पूनम महाजन, प्रितम मुंढे, अमृता फडणवीस, महाराष्ट्र विधान परिशदेच्यो आमदार, अध्यक्ष डाॅ. निलम गोऱ्हे हांचेवरी बळीश्ट अस्तुरी गोंयांतय आसात. प्रदेश भाजपच्या आमदारांनी आपल्या घरकान्नींक 2027 विधानसभेर धाडपाक मनाची तयारी करची. घराब्याच्या राजकारणाआड बोवाळ जातलोच पूण राजकारणाची वाट तातूंतल्यान साबार स्त्रीशक्तीक दिसतली.
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
