गणितां कठीण लागतात? वापरात गुगलाचो ‘फोटोमॅथ’ अॅप

भांगरभूंय | प्रतिनिधी

न्यूयाॅर्क, खबरां संस्था ः शाळेचो वा कॉलेजीचो विद्यार्थी आसूं, गणित हो विशय जायत्या जाणांक आवडना. देखून विद्यार्थ्यांक गणित विशय कसो आवडूंक शकता हो गणित शिक्षकां मुखार एक प्रस्नच जावन आसा. देखून आतां हुस्को करपाची गरज ना. कारण गूगलान वापरप्यां खातीर फोटोमॅथ (Photomath) नांवाचो अॅप हाडला. हो एक स्मार्ट कॅमेरा कॅल्क्युलेटर आनी गणित सहाय्यक अॅप जो तुमकां फकत फोटोंच्या मजतीन समीकरणां सोडोवपाक मजत करतलो. भुमिती (geometry) आसूं वा बीजगणित (algebra) आसूं, हो अॅप तुमकां गणित टप्प्या टप्प्यान (step by step) समजून घेवपाक मजत करतलो.
गूगलान मार्च 2023 वर्सा अधिकृतपणान फोटोमॅथ अॅप विकतो घेतलो. पूण, ताची पयलीं घोशणा मे 2022 वर्सा जाल्ली. हे घोशणे उपरांत आनी नेमांच्या मंजुरींचें पालन केल्या उपरांत आतां संवसारभरांतल्या वापरप्यांक हो अॅप उपलब्ध केला. हो अॅप प्ले स्टोराचेर उपलब्ध आसा. वापरप्यांक फकत गणिताच्या समीकरणाचो फोटो काडून तो सोडोवपाचे स्टेप बाय स्टेप स्पश्टीकरण मेळूं येता. गूगल ह्या नव्या अॅप एकत्रीकरणा वरवीं आपलें शिक्षणीक पोर्टफोलियोचो विस्तार करता. तंत्रगिन्यानाचो फायदो घेवन गूगलान वापरप्यां खातीर एक नवो अॅप हाडला, जाका लागून गणित शिकपाक सोंपें जातलें आनी गणितांतले जायते प्रस्न सोंपेंपणान सोडोवपाक मेळटलें.

फोटोमॅथ अॅप कसो वापरचो?

० Android फानोचेर प्ले स्टोर ऍप्लिकेशनांतल्यान photomath ॲप डाउनलोड करचो.
० अॅप उगडात. मागीर तुमकां सोडोवपाक जाय आशिल्ल्या गणिताचेर तुमच्या फोनाचो कॅमेरो धरचो. तुमचें गणित फ्रेमांत स्पश्टपणान कॅप्चर जालां हाची खात्री करात. आनी उपरांत ते स्कॅन करात.
० स्कॅनिंग करप शक्य ना जाल्यार गणित टाइप करपाक कीबोर्ड वापरूं येता.
० एकदां तुमी गणित स्कॅन वा टायप केल्या उपरांत, PhotoMath ताचेर प्रक्रिया करतले आनी कांय उपाय सुचयतले.
० उपरांत तुमकां गणिताचें स्टेप बाय स्टेप स्पश्टीकरण दितले.

विशेश म्हळ्यार फोटोमॅथ बीजगणित, भुमिती, त्रिकोणमिती, सांख्यिकी, कॅल्क्युलेटर अशें जायते गणित विशय हाताळूंक शकता. वापरप्यां खातीर हांगा जायत्यो भासो उपलब्ध आसात. ते भायर, वापरप्यांनी समीकरणां सोडोवपाक जायरात मुक्त प्रवेश अशीं अतिरिक्त खाशेलपणाचो वापर करपा खातीर PhotoMath Plus ची सदस्यताय (Membership) घेवंक शकतात. अॅप वापरपाक मेकळीक आसा. पूण, अतिरिक्त पाठ्यपुस्तक उपाय, ॲनिमेटेड ट्युटोरियल्स, आनी म्हयन्याळ्या वा वर्सुकी परिक्षे खातीर खोलायेन स्पश्टीकरणां सारकिल्या अतिरिक्त खाशेलपणा सयत पर्यायी PhotoMath Plus सबस्क्रीप्शन उपलब्ध आसा. तशेंच, गूगलाच्या इकोसिस्टमांत चड सुविधा दिवपाच्या हेतान, PhotoMath ची कांय खाशेलपणां काळा प्रमाण Google Lens आनी Google Search हातूंत एकठांय करपाची शक्यताय आसा.