भांगरभूंय | प्रतिनिधी
गणरायाचें गोंडस रुप, ताचो निरागस हांसो, ताचे कडेन पळयलें काय मनावयलो ताण तणाव ना जाता. सगल्यो समस्या गायब जाता.
श्रावण सोंपत आयलो काय आमच्या मोगाच्या गणपती बाप्पा मोरयाची उमळशीक लागता. एक म्हयनो पयलींच गणपती पुजपाचें साल रंगोवन आकर्शक करतात. गणपती येवपाचे दोन दीस पयलीं माटोळी लावन तयार दवरतात. मखरुय सजयतात. बोंदेरां म्हणल्यार पताका लायतात. आकर्शक लायटीची रोशणाय करतात.
तशें पळोवंक गेल्यार गणपती हो हेर देवां सारको देव, पूण ताचे विशीं फक्त भक्तीच न्हय, तर आपुलकी, मोग आसा. तो मनशां कडेन जोडिल्लो आसा. मनीस आनी सैमाचें ताचे कडेन नातें. मनशां प्रमाण गणपतीय सैमाचेर खूब मोग करता. गणरायाचें गोंडस रुप, ताचो निरागस हांसो, ताचे कडेन पळयलें काय मनावयलो ताण तणाव ना जाता. सगल्यो समस्या गायब जातात. घरांतलीं सगलीं विघ्नां नाच्च जातात. कारण गणपती हो मुळांत सुखकर्ता, दुख्खहर्ता.
गोरो गोरो पान, दिसता कितलो छान
सुपायेदे कान, हो दिसता कितलो छान
इल्ले इल्लेशे दोळे काळे, सोंड कशी वळे….
ताचो चॅरो म्हणल्यार हतयाचें मस्तक. ताका लागून तो हेर देवां परस वेगळो दिसता. ताच्या दोळ्यांतली चमक दरेका भक्तांच्या मनांत आपुलकेची भावना हाडटा. आमचे हिंदू संस्कृतायेत मंगलमुर्ती देव अशी गणपती बाप्पाची वळख. कसल्या शुभकार्याक सुरवात करतना पयलो मान मेळटा तो गणपतीक. ताच्या नांवान पुजेचें साहित्य दवरतात. म्हणल्यार तबकांत तांदूळ, नाल्ल, पानाचो विडो, एक नाणे दवरता. गणपती म्हणल्यार मंगलदातो. सगल्या विघ्नांचो नाश करपी प्रत्येक कार्य संकश्टा विणें पुराय करपी आराध्य देव तो. तो आपल्या वेव्हारा पुज्यनीय जाला. बाप्पा म्हणल्यार सद्गुणांची खण. ताचे मदीं सगले गुण, शक्त आसा. सगल्या देवां मदीं ताका गुणांचो देव मानतात.
गणपती बाप्पा घराघरांनी पावला. ल्हाना सावन जाण्ट्या मेरेन सगल्यांचे दोळे ताच्या आगमना कडेन लागिल्ले. दरेका हिंदू कुटुंबान घराची नितळसाण, रंगरंगोटी केल्या. बायलांनी रातदीस वावरुन नेवऱ्यो, मोदकांचो फराळ केला. गणपतीच्या आगमनाक सैम राजा सामको आतुर जाला. दनपरां भटमामाच्या मार्गदर्शनान गणपती पुजेक लागतलो. सगले कडेन खोशेचें वातावरण आसा.
बायलो घरांत तरातरांचे जिनस करता. केळीच्या पानार पंचपक्वान्नांोच नैवेद्य दाखयलो काय हुंदीरमामाक जेवणाची वाडी काडटात. कावळ्याक काकोळ, गायेक पान काडटात. मागीर सगले ल्हान व्हड रांकेंत जमनीचेर पंगत करून बसतात. ते जेवन उठले काय बायलो, चलयो जेवपाक बसतात.
रातच्यो वेळार सगले बसून भजन, आरती, घुमट आरती म्हणटात. भजन करतात. दुसरे दीस गणपती पावोवपाचे तयारेक लागतात. दरेकलो पांच घरांनी गणपती पळोवपाक वतात. थोड्यांगेर देखावे केल्ले आसता. कांय जाणांची माटोळी तर पळोवपा सारकी. तातूंत हजारांनी फळां, वनस्पती, फुलां लायिल्ली दिसता. गणपतीच्या रुपान गोंयचो सैम आमच्या घरांनी येतात.
रातच्या वेळार आरती जाल्यो काय, पुरयत येता. मागीर उत्तरपुजा, गाराणे घुमता. सगले जाण गणपती मुखार भक्तीभावान मागण्यो करतात. देवा म्हाराज, असो स्वर घरांत घुमता. श्रद्धेन केल्ली आंगवण दुसरी चवथ येवचे पयलीं पुराय जाता.
मंगलमय वातावरणांत केन्ना देड दीस जाले तेंच कळना. बाप्पाक निरोप दिवपाचो दीस उजवाडटा. भुरगीं तरातरांचे माराणे, बाॅम्ब फोडटात. सगल्याक तो आवाज दुमदुमता. बाप्पाक निरोप दितना सगल्यांच्या दोळ्यांतल्यान घसाघसा करून आनंदाश्रू गळटात.
टाळ, मृदंगाच्या तालार गणपतीचें वाजत गाजत गंगेच्या उदकांत म्हणल्यार गांवचे नितळ तळयेंत विसर्जन करतात. त्या वेळार कंठ सामको दाटून येता. अशा ह्या मुशक वाहनाचेर बसून आयिल्ल्या सुपा येदे कान आशिल्ल्या, दुसऱ्यांचीं पापां आपल्या पोटांत घेवपी गणरायाक कोटी कोटी प्रणाम. गणराया सगल्यांक बरी बुद्द दी हेच देवा तुजे लागीं मागणे, गणपती पूत पार्वतीचो, चल्लो गंगे पाणयाक…..!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
