भांगरभूंय | प्रतिनिधी
कांय गणुबाप्पालीं भुरगी तर हांव तांका मेळटलो ह्या निरागस भावनेन देवळांत येतात. हाकाच लागून हांव आनंदी जाता.
हांव एक मोदक. गणपतीचो आवडटो मोदक. जेन्ना चवथ लागीं पावता तेन्ना म्हजी सगल्यांक चडूच रूच येता. म्हाका आरतीच्या वेळार नैवेद्य म्हण देवाक दाखयतात. चवथ येताच घरांत सगळीं म्हाका तयार करपाच्या बोवाळाक लागतात. हो मोदक फकत गणपतीचोच न्हय जाल्यार सान भुरग्यां पासून जाणट्यां मेरेन सगल्यांचोच आवडटो. घरांत म्हाका मम्मा, काकी उमेदीन तयार करतात. म्हजे प्रकार तशे खूब्ब. उकडलेलें मोदक, तळलेले मोदक हे पारंपरीक प्रकार. तशेंच आता तर म्हजे नवें प्रकार आयल्यांत देखीक चाॅकलेट, ड्रायफ्र्यूट मोदक. पूण म्हजे पारंपरीक रुपूच गणपतीक आवडटा. तशेंच सगल्यांक हांव पारंपारीक रुपांत खावपाक आवडटा.
एक दिस म्हादेवतनयाक ताच्या आवय बापायन म्हणल्यार शंकर पार्वतीन एक गोड असो पदार्थ खावपाक दिलो. ताचे नांव आसले मोदक. आनी तेन्ना सावन मोदक हो गणपतीचो सामको आवडीचो जालो. जेन्ना मंगळारचें गणपतीच्या देवळांत भावीक येतात तेन्ना तांकां भटजी काका प्रसाद म्हूण स्वता म्हाकाच दितात म्हळ्यार मोदक दितात. तेन्ना हांव स्वताक खूब्ब भाग्यवान समजता. कांय गणुबाप्पालीं भुरगी तर हांव तांका मेळटलो ह्या निरागस भावनेन देवळांत येतात. हाकाच लागून हांव आनंदी जाता.
म्हाका करप तशें सामके सोंपे. पीठ मळून ताचे पाते तयार करप. तातूंत भितर पंचखातीचे चुन्न घालप. आनी मागीर उकडप वा तेलांत तळप. तर अशें तरेन जालो हांव मोदक तयार. पूण आयज म्हाका करतलो जाल्यार तुमचे कडेन मांतूय वेळ ना. म्हजो जल्म जेन्ना घरची सगळी घरांत एकठांय येवन मेळून मिसळून करतात तेन्ना म्हाकाय घरचो मोग, माया तशेंच आपुलकाय मेळटा. पूण तुमी आयजकाल सगळ्याच्या सगळें भायल्यान हाडटात. दुकानांतल्यान म्हज्यो हेंर तरां हाडाच, पूण चवथीक तरी म्हाका घरांत एकदा तरी जल्माक घालात.
गणपतीची मातयेचीच पर्यावरण पुरक मुर्तीच तुमी पुजेक लायात. थळाव्या मुर्तीकारांनी मातयेचो म्हाका करून गणपतीच्या सगल्याच मुर्त्यांच्या हांतांत म्हाका म्हणल्यार मोदक दिल्लो आसता, हें म्हजे आनीक एक मातयेचे रूप. चवथ आनंदान मनयात. विसर्जनाच्या वेळार प्रदूषण करनाकात. खूब्ब मोदक खायात आनी खूब्ब मजा करात.
– साईज्ञा दत्ता नायक
एच.एस.एस.सी.
जी. के. नायक क्लासीस
प्रियोळ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
