भांगरभूंय | प्रतिनिधी
कांय दुकानांक लायलें कुलूप
कैलास नायक, पणजी: चवथीक तीन दीस उरल्यात. अंदूंय प्लॉस्टर ऑफ पॅरिसच्या (पीओपी) मूर्तीं विशीं हुस्को आसा. हेच फाटभूंयेर गोंय राज्य प्रदुशण नियंत्रण मंडळान तपासणी केल्या. २१ ऑगस्ट मेरेन वट्ट २०७ नमुने एकठांय केल्यात. तांतले १६० नमुन्यांचें परीक्षण केलें. हे तपासणेंतल्यान २४ नमुन्यांनी १० टक्क्यां परस चड कॅल्शीयम सल्फेट आशिल्ल्याचें स्पश्ट जालां.
प्रदूशण मंडळाच्या अधिकार्यांनी सांगलें, सैमीक मातयेच्या मुर्तींनी फकत ०.६% ते ३.०६८% CaCO मेळटा, मात कांय मुर्तींनी ताचे परस बरेंच PoP आशिल्ल्यान नेम मोडप जालां. हे विशीं मंडळान संबंदीतांचेर खर कारवाय करपाचे निर्देश जारी केल्यात.
राज्य प्रदूशण नियंत्रण मंडळाचे वांगडी सचीव संजीव जोगळेकार हांणी सांगलें, कांय दुकानदार राज्य प्रदूशण नियंत्रण मंडळा कडेन मातयेचे नमुने उसरां हाडून दितात. हाका लागून तपासणेक कळाव जाता. लोकांनीय पीओपीच्यो मुर्ती विकत घेवपाचें बंद करचें.
पर्यावरण मोगी राजेंद्र केरकार हांणी, प्लास्टर ऑफ पॅरिसच्यो मुर्तींचें विसर्जन केले उपरांत त्यो उदकांत विरगळनात आनी हाका लागून उदकाचें प्रदुशण वाडटा. उदकांतल्या जिवांक हाचो धोका निर्माण जाता. ताचे जावपी वायट परिणाम हांवें पुराव्यां सयत सरकाराक कागद सादर केलां. सरकार हाचेर गंभीर ना. तशेंच पुलीस यंत्रणेचो घोळ कारभार चालू आसा, अशें तांणी सांगून, सांखळेच्या दशरथ पेडणेंकार हांणी दिवचल पुलीस स्टेशनांत कागाळ दिवनूय तपास करूंक ना, अशें तांणी म्हाणलें.
आमदार प्रेमेंद्र शेट हांणी सांगलें, सरकारान प्लास्टर ऑफ पॅरिस (पीओपी) मुर्तींचेर बंदी घातल्या आनी असल्यो मुर्ती विक्रेत्यांचेर खर कारवाय करपाचे आदेश दिल्यात. कांय विक्रेते चोर मार्गान ह्यो मुर्ती गोंयांत हाडटात. गोंयांतूय त्यो करतात.
मजगतीं, सरकारान चिकण माती, शाडू मातयेच्यो मुर्ती चालीक लावन, कलाकारांक उर्बा दिवपाक येवजण सुरू केल्या. तरी कांय सुवातांचेर पीओपीच्यो मुर्ती बाजारांत आयिल्ल्याचें स्पश्ट जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
