गझल म्हणल्यार फक्त वृत्त न्हय ती वृत्ती

भांगरभूंय | प्रतिनिधी

इब्राहीम अफगाणः प्रकाश देसाय हांच्या ‘गझल’ पुस्तकाचें लोकार्पण

भांगरभूंय । खबरां मेज

पणजीः गझल म्हणल्यार फक्त वृत्त न्हय ती वृत्ती आसा. शुद्धीवादाच्या दिश्टीकोनांतल्यान गझलीक मर्यादीत करतात. खंयचीय भास लेगीत अधिकार सांगून गझलीक मर्यादीत करपाक शकना. वेगळ्या पांवड्याचेर तुमी गझलीचो आस्वाद घेवपाक शकतात, अशें मत नामनेचे साहित्यीक, पत्रकार इब्राहीम अफगाण हांणी उक्तायलें.

बरखा प्रकाशन  वतीन मिरामारच्या क्लब गास्पार डायसांत प्रकाश देसाय हांच्या ‘गझल’ ह्या कोंकणी गझलांच्या पुस्तक लोकार्पण सुवाळ्यांत मुखेल सोयरे म्हूण उलयताले. तांचे हस्तुकीं पुस्तकाचें लोकार्पण केलें. ह्या वेळार माचयेर मानाचे सोयरे म्हूण गोंय विद्यापिठांतल्या कोंकणी संशोधन विभागाचे सहाय्यक प्राध्यापक तशेंच नामनेचे साहित्यीक डॉ. प्रकाश पर्येंकार, मुखेल उलोवपी म्हूण नवप्रभा दिसाळ्याचे संपादक परेश प्रभू, कवी प्रकाश मेघःश्याम देसाय आनी प्रकाशक वृषाली देसाय हाजीर आशिल्ली.

इब्राहीम अफगाण हांणी सांगलें, उर्दू भाशेंत खूब गझली बरयल्यो, पूण गझल हो मूळ अरबी आनी उपरांत फारसी भाशेंत प्रचलीत जालो. कबिरान ते आदीं बरयिल्ल्या गझलीची देख लेगीत तांणी देली आनी एकामेकांचे प्रवाह भाशांनी आपणावपाची तांणी गरज उक्तायली.

डॉ. पर्येंकार हांणी सांगलें, कोंकणींत कवितेची व्हड परंपरा ना, पूण कांय काळांत बरी कोंकणी कविता आयली. कोंकणींत गझलीची साधना करूंक नाशिल्ल्यान ती प्रचलीत जावंक ना. कोंकणींत गझल गायनाच्यो कार्यावळीय खूब उण्यो जातात, कोंकणींत गझल गायन दावप गरजेचें आसा. प्रकाश देसाय हांच्यी गझल लेखनाची कोंकणींत निश्चींत दखल घेतले, असो विस्वास तांणी उक्तायलो.

परेश प्रभू हांणी सांगलें, वृत्त छंदाच्या तंत्रांत बसपी हो कोंकणींतलो पयलो वयलो झेलो आसा. भाशेचेर शेक आसले बगर गझल तंत्रांत बरोवप शक्य आसना. सुरेश भट हांणी मराठींत गझल हाडली आनी आयज ताचो व्हड रूख जाल्ल्याचें दिसता. प्रकाश देसाय हांच्या गझल लेखनाचें खाशेलपण सांगतना तांणी सांगलें, तांच्यो वेगवेगळ्या छंदांत गझली आसात. तातूंत तंत्रशुद्धता आसा. खूबशा वृत्तांचो तांणी वापर केला. स्वताचें सांस्कृतीक पर्यावरण तांणी तातूंत हाडलां. मातयेंतल्या उतरांचो वापर केला.

प्रकाश देसाय हांणी मनोगत उक्तायतना सांगलें, आपलो लेखनाचो सुमार 24 वर्सांचो प्रवास आसा. आपले वाटचालींत अफगाण हांचो व्हड वांटो आसा. आपूण मुंबय गझल गायन शिकपाक गेल्लों, पूण ल्हवू ल्हवू गझल बरोवपाक लागलों. सुरवेक आपूण मराठींत बरयतालों, पूण भीमराव पांचाळ हांणी सांगलें, मराठींत खूब जाण बरयतात, तूं कोंकणींत बरोवपाचो यत्न कर. आपणें वृत्तांचो बी अभ्यास केलो आनी बरोवपाक लागलों.

गझल पुस्तकाचें मुखपृश्ठ बरखा देसाय हांणी केलां. तिचो ह्या वेळार भोवमान केलो. गोविंद भगत हांणी सुत्रसंचालन केलें जाल्यार वृषाली देसाय हांणी उपकार मानले.