भांगरभूंय | प्रतिनिधी
सद्याक गोंयांत नाल्लाचें नांव गाजता. चवथ लागीं पावल्या. देखून जणएका भक्तजनाचें लक्ष बाप्पाच्या येवपा कडेन लागप सभावीक आसा. अशा वेळार नाल्ल ह्या माडाच्या फळान तें आपणा वटेन ओडून घेतलां. कारण नाल्ल म्हारग जाला. हिसपा भायर म्हारग जाला. म्हयन्या दोन म्हयन्यां आदीं 20 ते 25 रुपयांक मेळपी नाल्लाचें मोल आयज 60 ते 70 रुपया इतलें वाडलां. हे म्हारगाये फाटलीं कारणां जायतीं आसात. देखीक पाडेल्यांचो उणाव. भाटांचो देंवतो आंकडो. कोल्ली हवामान. तरेकवार रोग. माकडांचो उपद्रव. आडसरांची वाडिल्ली मागणी. तेला खातीर नाल्लांचो चड वापर हीं. कारणां खूबशीं, पूण ताचो परिणाम मात एक. तो म्हणल्यार नाल्लाचो उणाव. देखून नाल्ल आयज उजवाड झोतांत आयला.
एका काळार अशीच कांद्यान लोकांच्या दोळ्यांत दुकां हाडिल्लीं. मजगतच्या काळांत तोमात ह्या फळाचें मोल मळबाक तेंकलें. 15 ते 20 रुपयांनी कील मेळपी तोमाताची दर 200 ते 250 रुपया कील इतली जाली. आनी हाका लागून ही शाकभाजी पिकोवपी कांय शेतकामती तेन्ना करोडपती जाले. कोविडाच्या काळांत प्राणवायेचे सिलिंडर भोवूच दुर्मीळ जाल्ले आनी देखून तेन्ना परिस्थिती भिरांकूळ जाल्ली. हें सगलें पळोवन ‘Every day has its day’ ह्या ओपारीचो उगडास जाले बगर रावना.
नाल्ल हें कितें सामान्य फळ न्हय. हिंदू जन ताका पवित्र मानतात. ताका श्रीफळ म्हळ्यार देवाचें फळ लेखून ताचो भोवमान करतात. नाल्लाच्या झाडाक माड म्हणटात. पूण वनस्पतशास्त्र ताका झाड म्हणिना, तण म्हणटा. परंपरेन आमच्या देशांतल्या केरळ ह्या राज्यांत नाल्लांचें सगल्यांत चड उत्पादन जाता. ह्या राज्याक ताचें नांवूच नाल्ल ह्या फळा वेल्यान पडलां. मळयाळम भाशेंत ‘केर’ म्हळ्यार नाल्ल, आनी आलम म्हणल्यार भूंय. देखून केरळ म्हळ्यार नाल्लांची भूंय. केरळांतल्या माडांचें वर्णन करतना एक लेखक म्हणटा, ‘हांव केरळ पळोवंक गेल्लों. पूण थंयच्या कुचकुचीत माडांक लागून म्हाका तें दिसलेंच ना.’ पोरूं वर्सां मात नाल्लांच्या उत्पन्नाचे बाबतींत कर्नाटक राज्य केरळा परस मुखार गेलें.
माडाक कल्पतरू म्हणटात. संस्कृत भाशेंत कल्पतरू म्हणल्यार मनशाच्यो साबार इत्सा भागोवपी रूख. माडा वरींच हिंदू, बुद्ध आनी जैन धर्म वड, परिजात आनी महुराक ह्या रुखांक कल्पतरू अशे मानतात. माडाक कल्पतरू वा कल्पवृक्ष अशे मानतात. हाचें कारण ह्या झाडाचे सगलेच घटक मनशा खातीर उपेगाचे आसात. माड आमकां सोण्णां, काथो, कट्ट्यो, कातल्यो, गोड पारदर्शक उदक, तेल, पेंड, वाशे, चुडटां, आनी व्हीर दिता. एक माड एका मनशाक पोसता अशें म्हणटात.
नाल्लाक आमी देव अशे मानतात. देखून ताका श्रीफळ म्हणटात. ह्या फळा बगर देवपुजा जायना. गोंयकारांच्या जिणांनी जाल्यार नाल्ल हो वेगळावंक जावचो ना असो वांटो आसा. आमच्या सदच्या उलोवपांनी, वाकप्रचारांनी आनी ओपारींनी नाल्लाचो आस्पाव जाल्लो दिश्टी पडटा. अर्दकच्च्या नाल्लाक बोंडो म्हणटात, आनी जड तकलेच्या मनशाकूय बोंडो म्हणटात. हातांत नाल्ल दिवप म्हळ्यार कोणाकूय वच म्हूण सांगप. ताका भायरो करप. हातांत कट्टी दिवप म्हळ्यार एखाद्याक भिकेक लावप. गणेसपुजेक कुसको नाल्ल म्हणल्यार कसल्याय बी कार्याचो आरंभ सारको जावप ना. माडा वयल्यान पडिल्ल्याक पिड्यांचो मार ह्या म्हणीचो अर्थ आदींच अपेशी जाल्ल्या मनशाक आनीक ख्यास्त करप. आनी नाल्लकारूय रडटा आनी तेलकारूय रडटा ह्या ओपारीचो अर्थ ह्या संवसारांत कोणूच धादोशी नात.
प्रदीप लवंदे
9923292022
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
