भांगरभूंय | प्रतिनिधी
भाजप प्रभारी आशीष सूदः कोअर समितीच्या पदाधिकाऱ्यांक शिटकावणी
भांगरभूंय । प्रतिनिधी
पणजीः भाजप कोअर समितीचे बसकेंतले मुद्दे वा चर्चेची म्हायती भायर फोडप्यांचेर खर कारवाय करतले, अशी खर शिटकावणी गोंय प्रभारी आशीष सूद हांणी शेनवारा घेतिल्ले बसकेंत समितीच्या पदाधिकाऱ्यांक दिल्या. तशेंच मंत्र्यांनी नवीं धोरणां आनी कायदो दुरुस्ती हाडचे आदीं ताची म्हायती पयलीं पक्षाक दिवची, अशेंय बसकेंत थारलां.
भाजप कोअर समितीचे कांय पदाधिकारी बसकेंत जाल्ल्यो गजाली भायर वचून सांगतात. हे आदीं खूब खेपे अशें जालां. अश्या प्रकारांक लागून कोअर समितीचे बसकेक अर्थ उरना. ताका लागून हे मुखार समितीचे बसकेंतल्यो गजाली भायर फोडल्यार संबंदिताचो सोद घेवन ताचेर खर कारवाय करतले, अशें सूद हांणी पदाधिकाऱ्यांक सांगलें. मंत्र्यांनी नवीं धोरणां चालीक लायतना वा कायदो दुरुस्तीचो निर्णय घेतना ताची म्हायती पयलीं पक्षाक दिवची. तशें केल्यार ताचेर पक्षां भितर चर्चा करून आनी फुडल्या परिणामांचो विचार करून पक्ष योग्य तो निर्णय घेवपाक शकता, तेचवरी संबंदीत मंत्र्याच्या फाटल्यान घट उबो रावपाक शकता, अशीय चर्चा बसकेंत जाल्या, अशें सुत्रांनी ‘भांगरभूंय’ कडेन उलयतना सांगलें.
पदाधिकाऱ्यांक नड्डा करतले मार्गदर्शन
प्रदेश भाजपाच्या चिंबलाच्या मुख्यालया खातीर बुन्यादी फातर 23 ऑगस्टाक भाजप अध्यक्ष नड्डा हांचे हस्तुकीं बसयतले. बुन्यादी फातर बसोवपाच्या सुवाळ्या उपरांत नड्डा पदाधिकाऱ्यांक मार्गदर्शन करतले. ही कार्यावळ व्हड प्रमाणार आयोजीत करपा संबंदांत बसकेंत चर्चा जाली. तशेंच स्वातंत्र्यदिसा निमतान दर वर्सा प्रमाण अंदूं लेगीत गोंयांत भाजपा वतीन तिरंगा यात्रा काडटले. ते विशीं लेगीत चर्चा जाल्ल्याचें प्रदेशाध्यक्ष सदानंद शेट तानावडे हांणी सांगलें.
9 ते 15 ऑगस्ट ‘हर घर तिरंगा’: मुख्यमंत्री
स्वातंत्र्यदिसा निमतान प्रदेश भाजपा वतीन 9 ते 15 ऑगस्ट मेरेन ‘हर घर तिरंगा’ मोहीम चालीक लायतले. हे मोहिमेंत सगळ्या गोंयकारांनी वांटो घेवचो, अशें मुख्यमंत्री डॉ. प्रमोद सावंत हांणी आयतारा सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
