भांगरभूंय | प्रतिनिधी
भांगरभूंय । सांस्कृतीक प्रतिनिधी
पणजीः गजानन आमोणकार हो मनस्वी, सगल्यांक जाय दिसतालो कलाकार आशिल्लो. कारण तो उत्कृश्ट वादक आशिल्लो पूण मनीसपणाचो धर्म पाळपी आशिल्लो अशें नामनेची गायिका प्रचला आमोणकार हिणे सांगलें. गोमंतक मराठा समाजाच्या तिसवाडी समिती वतीन तबलें आनी पखवाज वादक सर्गेस्त गजानन आमोणकार हाच्या यादस्तीक पणजेच्या गोमंतक मराठा समाज संस्थेच्या सभाघऱांत आयोजीत केल्ले कार्यावळीक प्रचला आमोणकार मुखेल सोयरी म्हणून हाजीर आशिल्ली.
माचयेर कला अकादमीच्या नाट्य विद्यालयाचो आदलो संचालक व्यंकटेश नायक, ज्येश्ठ कलाकार गोरख मांद्रेकार, नितीन कोरगांवकार, ज्येश्ठ वादक रामकृष्ण वेलिंगकार, समितीची अध्यक्ष सुनीता पेडणेकार, सल्लागार रोहिदास नायक, गजानन आमोणकार हाचो भाव आनी आदलो नगरसेवक शशिकांत आमोणकार हाजीर आशिल्लो. ह्या वेळार गोरख मांद्रेकार हाचे हस्तुकीं रामकृष्ण वेलिंगकार हाचो शाल, श्रीफळ आनी यादस्तीक दिवंन भोवमान केलो. महेश्वरी वळवयकारान मानपत्राचें वाचन केलें. प्रचला आमोणकारान समितीन ख्याल गायनाची सर्त घेवची अशी सूचोवणी केली.
व्यंकटेश नायकान सर्गेस्त गजानन हे अश्टतासी कलाकार आशिल्ले अशें सांगून ताच्या कला गुणांची म्हायती दिली. सुनीता पेडणेकारान सुरवेक सगल्यांक येवकार दिलो. दीफा धीरज नायकान मुखेल सोयऱ्याची वळख करून दिली. अनुप्रभा रायकारान सूत्रसंचालन केलें. नारायणदास आमोणकार आनी हेर पदाधिकाऱ्यांनी मानेस्ताक यादस्तिकां भेटयलीं.
——————————————————————–
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
