भांगरभूंय | प्रतिनिधी
कोची, खबरां संस्था ः प्रधानमंत्री नरेंद्र मोदी हांणी केरळ भेटी वेळार इस्रोच्या येवपी महत्वाकांक्षी मिशनांतली व्हडली घोशणा केल्या. गगनयान मिशन खाला भारतीय अंतराळविरांक स्वबळग्याचेर अंतरिक्षांत धाडटले. हातूंत सुमार स टन वजनाचे अंतरिक्षयान अंतरिक्षांत धाडटले. ह्या अंतरिक्षयानांत चार अंतराळविरांक व्हरपाची तांक आसतली. हे अंतरिक्षयान धर्तरे सावन सुमार 400 किलोमीटर अंतराचेर तीन दीस प्रदक्षिणा घालतलें.
गगनयान मिशना खातीर प्रधानमंत्री नरेंद्र मोदी हांणी चार अंतराळविरांच्या नांवांची घोशणा केली. प्रशांत बाळकृष्ण नायर, अजित कृष्णन, अंगद प्रताप आनी शुभंशु शुक्ल अशीं तांचीं नांवां जावन आसा. प्रधानमंत्री नरेंद्र मोदी हांणी निमाणे तयारी खातीर तांकां परबींय दिलीं.
हे चारूय जाण भारतीय वायुसेनेचे अधिकारी आसात. अंतराळविरांक प्रशिक्षण दिवपा खातीर बेंगळूरांत एक खाशेली सुविधा तयार केल्या. इतलेंच न्हय तर ह्या चार जाणांनी रशियेंत कांय काळ अंतराळवीरांक आनी अंतरिक्ष प्रवासाक जाय आशिल्लें मुळावें प्रशिक्षणय घेतलां. अमेरिकेची नासाय फुडल्या काळांत इस्रोक मजत करपाची आसा.
हाचे पयलीं एप्रिल 1984 त राकेश शर्मा हांणी तेन्नाच्या सोव्हिएत रशियेच्या Soyuz T-11 ह्या यानातल्यान अंतरिक्षांतल्यान भोंवडी करून भारताचे पयले अंतराळवीर जावपाचो मान मेळयिल्लो. ते उपरांत कल्पना चावला, सुनीता विल्यम्स हांच्या सयत कांय भारतीय मुळाचे नागरिक हेर देशांचें प्रतिनिधित्व करपी अंतराळवीर म्हणून अंतरिक्षांत गेले.
पूण आतां मेरेन भारतान भारतीय अंतराळविरांक स्वबळग्याचेर अंतरिक्षांत धाडूंक नाशिल्लो. आतां देशांतले हे चार अंतराळवीर 2025 वर्साच्या निमाणें वा 2026 वर्साचे सुरवेक गगायन मिशनांतल्यान अंतरिक्षांतले वतले.
रशिया, अमेरिका आनी चीना उपरांत स्वबळग्याचेर अंतरिक्षांत अंतराळविर धाडपी भारत हो चवथो देश जातलो. युरोपीय अंतरिक्ष एजन्सी, जपान, कॅनडा ह्या बळिश्ट कंपनींक लेगीत अजून हें करपाक शक्य जाले ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
