भांगरभूंय | प्रतिनिधी
भारत आनी इंग्लंड ह्या पंगडां मदीं माळेंतली पांचवी आनी निमाणी टॅस्ट 31 जुलय सावन सुरू जातली. ते पयलींच वातावरण बरेंच तापलें. लंडनांतल्या ओव्हल मैदानाचेर सराव करतना भारताच्या क्रिकेट पंगडाचो मुख्य प्रशिक्षक आनी मैदानाचो क्युरेटर ली फोर्टिस हांचे मदीं बाचाबाची जाली.
ही घडणूक पांचवी टॅस्ट सुरू जावपाक दोन दीस बाकी आसतना घडली. मेळिल्ले म्हायती प्रमाण, भारताच्या पंगडाचे खेळगडे आनी प्रशिक्षक खेळपट्टीची पळोवणी करीत आसतना क्युरेटरान तांकां विशिश्ट अंतराचेर उबे रावपाक सांगले. हाच्या वयल्यान वाद सुरू जालो. गंभीराक बरोच राग आयिल्लो. ताणें क्युरेटराक बोट दाखोवन, आमी कितें करचें हें तुमी आमकां सांगपाचें ना. अशें गंभीरान रागान फोर्टिसाक सांगलें.
ओल्ड ट्रॅफर्ड टॅस्ट बेगीन सोंपोवपा वयल्यान दोनूय पंगडां मदीं वाद जाल्लो. आतां ह्या नव्या वादाक लागून माळेंतलो तणाव आनीक वाडला. सध्या इंग्लंड 2-1 असो मुखार आसा. अॅण्डरसन – तेंडुलकर ट्रॉफी इंग्लंड जिखता काय भारत माळ बरोबरींत सोडयतलो हें ओव्हल टॅस्टीचेर निंबून आसा. माळ बरोबरींत सोडोवपाक भारताक ही मॅच जिखपाकूच जाय. हे घडणुके उपरांत दोनूय पंगडां मदलो संघर्श मैदाना भायर लेगीत पावलो अशें स्पश्ट जाणावता.
भारताचो बॅटींग प्रशिक्षक सितांशू कोटकान गंभीर आनी फोर्टिस हांचे मदीं मध्यस्ती करून वाद थांबयलो.
पत्रकारां कडेन उलयतना फोर्टिसान नेमकें कितें घडलें हे विशीं सांगपाक न्हयकार दिलो. गौतम गंभीराक आपूण वळखना. तो कोण हें आपल्याक खबर ना. ताच्या मना सारकें करप हें आपलें काम न्हय अशें ताणें मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
