भांगरभूंय | प्रतिनिधी
राम नाम जपता आनीक केंसांन गळो कापता, असली पाडी वृत्ती ताच्या नसा- नसांनी भिनिल्ली. ( आतां मुखार….)
दुरगाचें काम पुराय जातगेर हरी गंवडो आपलो पिकांदर थंयच सोडून गेल्लो आनी गंडभैरावांन तो आपल्या ताब्यांत घेतिल्लो. जुजेफिन कामारागेर वचून ताणें तो पिकांदर पाजून घेतिल्ले आनीक दुर्गानंदाली तिडक येतगेर तो आपल्या वाटेच्या दुरगाचें चिरे हेच पिकांदर घेऊन तासतालो. गंडभैरांव डंख धरून बशिल्लो. तोंडार तो कोणाक कांय सांगनाशिल्लो. पूण भितरल्यान तो खतखततालो, उजो भितल्ल्या भितर धुमसतालो. हे सगळे गडबडीत केंस मारूक ताका वेळ मेळनासून तागेल्या माथ्यावेले केंस बरेच वाडिल्ले आनी आता गंडभैरांव पोनी बांदूंक लागिल्लो. हेवटेन पुरतोषम सोसायटी करुक केन्ना फुडें सरता आनीक आपुण ताची वाट कशी लायता हाचेर तो आराखडो पितारूंक लागिल्लो. हांवुय करचोना आनीक म्हजे बगर दुसऱ्याकूय करुक दिवचोना अशी तागेली भूमिका आशिल्ली. आपल्यालो प्रेस वाडोवपाक आपल्याक कांय रस ना म्हूण दाखोवप अशें धोरण ताणें आपणयिल्लें.
इतले मजगतीं विकपाचें उरिल्ले तांतुंतलें एक घर हांगा बिल्डरांन तीमण्णा म्हणटा ताका विकले. तो बारा गांवचे उदक पिल्लो आनी पयलीं रावतालो त्या गांवांत ताणें खंय चार संकुला भितर सोसायटी करपाक व्हड वांटो उखलिल्लो. मनीस जोडपाची कला तिमण्णा कडे आशिल्ली जी आमगेल्या गंडभैरावा कडें नाशिल्ली. तीमण्णा एक एक करून सगळ्या वांगड्यांक मेळून वा फोन करून सोसायटी वांगड्याच्या ताब्यांत घेऊन स्वतंत्रपणान चलोवया, वांगड्यांक जाय तशो सुविधा उभारूया, देखभालीचो खर्च कमी करूया, हाचेर भर दिवन सगळ्यांक सांगून पटोवन दितालो. एक प्रामाणिक प्रयत्न करतालो. त्या वाटेन सोसायटीचो ताबो वांगड्यांक दिवपाची बिल्डर वाट पळयतालो. तांकांय देखभाल करपाच्या वावरांतल्यान भायर सरचे आशिल्ले. ह्या तीमण्णाचे चळवळीक गंडभैरावान कशेच मीठ घाल्लेनाशिल्ले. उरफाटो तीमण्णा बिल्डर विरोधक अशे वांगड्यांक सांगूक ताणें चालू केल्लें. हेवटेन तीमण्णा आमचेकडे उलयतना आमगेल्या बिल्डराक एक उत्तम सहकार्य करपी बिल्डर म्हणून तोखेतालो. कितले तरी फावट तीमण्णान गंडभैरावा वांगडा मिटिंग करचो यत्न केलो, पूण तो फळाक येवुना. तू केन्नाचो, हांवे हांगा दीस काडल्यात अशीच गंडभैरावाली मिजास आशिल्ली. साहजिकूच गंडभैरावाक आपलें म्हत्व कमी जातलें हो भंय आशिल्लो. आपल्या वयर कोण येवपाकूच शकना आनी जायना अशे ताका दिसताले. पूण हळूहळू तीमण्णा सुत्रा हातांक घेवूक लागिल्लो.
रिटायर जावन हांव संकुलांत स्थायिक जावूंक आयिल्लो. येवन स म्हयने जाता थंय आसा कोविडान सगळे उद्योग बंद उडयिल्ले. लाॅकडाऊन चालू जाल्ले. चडश्या कंपन्यांनी घरा साकून काम करपाची सवलत कर्मचाऱ्यांक दिल्ली. लाॅकडाऊन मात्शें सदळ जातगर थोडे मालक वांगडी हांगा रावपाक आयिल्ले. घरा सावन काम करपाची संद तांकां मेळिल्ली आनी हो संकुल एकमुळोच आशिल्ल्यान कोवीड जावपाची शक्यताय बी कमी आशिल्ली. पुरतोषम बी हांगा येऊन घरा सावन काम करूंक लागिल्लो. हे संदीचो फायदो घेऊन सोसायटी कशेय बशेन करया ही जिद्द घेऊन तो मुखार सरूंक सोदतालो. तीमण्णा आनीक पुरतोषम हांणी ही चळवळ सांगातांन मुखार व्हरपाचें थारायिल्लें.
फाटलो गंडभैरावा वांगडाचो अणभव लक्षांत धरून म्हाका हे सोसायटीच्या भानगडींत पडपा नाकाशिल्लें. तो अणभव वायट आशिल्लो. पूण, तीमण्णा फोन करतालो, घरा येतालो आनी जीव खायत हड्ड्यार बसतालो. हांव हांगा रावता, हांव हांगाचो स्थायिक म्हटगेर हांवे समितीचेर येवपाकूच जाय असो ताणें म्हाका सांकडे घालें. हांवें तीमण्णाक टाळपाचो खूप यत्न केलो, पूण तागेले जिद्दी मुखार हांवे हार मानली. खंयचो बेगीन रिटायर जावन हांगा आयलों आनी सोसायटी करपाच्या भानगडीक सांपडलो अशें म्हाका दिसूंक लागिल्लें, सुशेगाद जिणे जियेवंचे सोडून ह्या सोसायटीच्या काचकिसावांत खंयचो घुसपोलो रे अशें म्हाका जाल्लें. आनीक वर्स, दोन वर्सां काम चालू दवरल्यार आनीक घरां तरी घेवूंक जाताशिल्लीं, दुडू तरी मेळताशिल्ले, बँक बॅलन्स वाडताशिल्लें. हांगा येऊन बाप्पाय ना आनीक पुडवेय ना जाल्लें. म्हजो बेगीन रिटायर जावपा फाटलो उद्देश फळाक येवुनाशिल्लो. वयल्यान ह्या सोसायटी करपाच्या वेरबात तीमण्णा म्हाका ओढतालो. म्हारू जावन गोमटेर बसतालो. दिमाख का दही करतालो. चिखलांत फातोर मारून आंगार घाण घेवपाची म्हजी मानसिक तयारी नाशिल्ली, पूण शेवटाक ह्या संकुलाचोय हांव भाग आशिल्लो. संकुलाबद्दल आपलेपणाची भावना म्हाका आशिल्ल्यान हांवे मानले कीं हांवूय हे चळवळीत वांटेकार जाता. न्हीं मानचेच पडलें. पुरतोषम आनीक तीमण्णा एकठांय जावन सोसायटी करूंक पेटिल्ले. सगळ्या कडेन उलोवन ते एकमत करपाचे यत्न करताले.
कोवीड आशिल्ल्यान रजिस्ट्रार ऑफिस वचूंक बी आडमेळीं येतालीं. सरकारी ऑफिस, फोनाचेर उलोवपाक कोण मेळनाशिल्ले. फोन लागनाशिल्ले आनी मोडिल्ले फोन दुरुस्त जायनाशिल्ले. फोनाच्यो लायनी तुटिल्यो. फोन खात्याचे लाईनमेंन “कोवीड न्हू रे” म्हणत कूस मारताले. कोण कोविडान मरताले जाल्यार कोण कोविडाचो फायदो घेत आपलें शेकून घेताले. कोवीड न्हू रे म्हळ्यार कामावेल्यान कूस मारूंक मेळटाली.
पुरतोषम फाटल्यान लागून लागून एकदाची पयली जनरल बॉडी मीटिंग घेवची थारली. निमाणे एकदाची बिल्डराल्या राणेसायबान कोविड काळांत पसून खटपट करून आमका हिस्पा भायर मदत केली आनीक पयलीं सर्वसाधारण सभा (जनरल बॉडी मीटिंग) नोटीस काढून आपयली. हे मिटिंगेक राणेसायबान पंचवीसेक खुर्च्यो आनीक टेबलां हाडून आतां आमी बिल्डर भायर सरतात, आता तुमगेले तुमीच पळोवपाचें अशें शिनाल दिलें.
हातूंत मोजकेच वांगडी आयले. आमगेली समितीचेर घेवपाचो आशिल्लो पांचवो वांगडी राजाराम कोविडा खातीर चीनांत आडकल्लो. सभेंत राजाराम ना कित्याक, विचारलें गेलें आनी पुरतोषमान तो अडकून उरला कशें तें सांगलें. ताडीमोडी आयली. गंडभैरांव आयलोना. फाटल्यान बसून कट रचप ताणें पसंत केल्लें. दुर्गानंद आनीक वेण्णाक समितीचेर येवचें आसलें. पूण तांत्रिक कारणां दाखोवन ते पुरतोषमान न्हयकारलें. वेण्णाक हाचो राग आयलो. ताणें नाक फुलयले, पूण त्या खिणाक तो ओगी रावलो. भितर खंय तरी उजो धुंवतालो. घुस्मटमाराचे वलय वाडत आशिल्ले. आमी पांच वांगडी, म्हूणन समिती थारली. प्रत्येक वांगडी बॅंकेचे खाते उघडतगेर आंकडो थारावन थोडे दुडू घालतलो अशे थारले. सगळ्यांनी कितले हजार घालचे हाचेर थाराव पास केलो. त्या दिसा उमास आशिल्ली. आमगेली पयली जनरल बॉडी मीटिंग उमाशे दीस जाल्ली. मीटिंग सोंपतगेर घरा वच्चे पयलीं रातचे एकठांय मेळून मेणवातीच्या उजवाडांत पार्टी करया असो उलो तीमण्णान मारलो. (फुडें चलता…)
अजय करमली
93737 46957
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
