गंडभैरांव खुदपाक लागलो!

भांगरभूंय | प्रतिनिधी

दंडबिंडान खंय तिडकी भरशी ताडीमोडीक असिमोराद् दिली. अशो एक नि कितलीशोच काणयो गंडभैरावाल्यो.
(आतां मुखार…)
गंडभैरांव तन, मन आनी धन दिवन सुण्याचे उदरगती खातीर वावुरतालो. दिसपट्टें तांकां जेवणां दितालो. एक दीस तो प्रायेर गेल्ले कडेन तीस- चाळीस सुण्यांचो घोळको आयलो. गंडभैरवां कडेन जेमतेम पंदरा सुण्यां खातीर जेवण आशिल्लें. सगळ्या सुण्यांक जेवण घालता म्हळ्यार गंडभैरावांक नाका शेवट जालो, अर्धवट पोट भरिल्ल्यान सुणीं चाळवल्लीं. हीं सुण्यांलीं केस्तांवां निस्तरता म्हणसर तातूंतल्या एका लुते सुण्यान गंडभैरावाक घांस मारलो. घोळक्याक आशिल्ली धायेक सुण्याक गंडभैरावांन वाशीना केल्ली. खंयच्या सुण्यान घांस मारलो हाचो अदमास गंडभैरावाक आयलोना. गंडभैरावांन शांबा घाडया बद्दल आयकल्लें. घाडया वाड्या वेलो फामाद शांबा घाडी प्रत्येक आयताराक आनीक बुधवाराक खुदतालो, सुणें चाबल्यार झाडो घालतालो आनी विख काढून उडयतालो. गंडभैरांव बुधवारा सकाळ फुडें शांबा घाडयागेर गेलो. सदा भशेन शांबाल्या सालांत लायन लागिल्ली. शांबा घाडी खुदुक लागलो. कोणा खातीर तो भात पाटार उडयतालो, खुदत खुदत भातातलो आसो काढतालो, मंत्र मारून पिडेस्ताक खावपाक दितालो तर कोणाक झाडो घालतालो. ताच्या आंगांत देव, देंवचार संचारिल्लो.
गंडभैरांवालो नंबर एकदाचो आयलो. शांबा घाडयान गंडभैरावाली केश आयकली आनीक ताका कालसांवाचेर एका पाटार बसयलो…. आनीक तागेल्या हातांत मळिल्ल्या पिठाची एक गुळी दिली. कुशीन अडुश्याच्या झाडाचे ताळे एकठांय बांदून दवरिल्ले, ते उबारले आनीक खुदत गंडभैरांवाल्या आंगा वैल्यान भोंवडायत मधीच चाबूकशे मारीत हातात आशिल्ले पीठ ताका मुड्डूपाक लायलें. पीठ मुड्डितासताना गंडभैरांव बी खुदुक लागलो. थोड्या वेळांन शांबा घाडयान हातांत आशिल्ले अडुश्याच्या ताळ्याचे चाबूक गंडभैरानवाल्या पोटार मारलें. सुण्यान घांस मारतगेर जें आंगांत विख आसता तें ह्या पिठाच्या गुळयेक देवन येतालें, शांबा घाडयान गंडभैरावा हातांतल्यान पीठ घेतलें आनी तातूंत आशिल्ले काळे केंस काढून दाखयले. शांबा घाडयाच्या म्हणण्या प्रमाण, जो सुणो घांस मारता ताचे केंस त्या पिठांत अवतरताले. आनी अशे केंस पिठात येवप म्हणजे विख आसता ते सगळे गेले, अशें म्हण्टाले वा तसो समज आशिल्लो. गंडभैरावांक काळ्या लुते सुण्यान घांस मारिल्लो हें आतां ताका समजल्लें. हें सगळें जाता म्हणासर गंडभैरांव घामानं चिप्प भिजिल्लो. विख काढून जातगेर शांबा घाडयाचे आभार मानून, खुटयाळ्याक लायिल्लो आपलो बुशकोट चडोवन गंडभैरांव परत संकुलांत पावलो.
कृष्णा म्हूण एकटो संकुलातल्या चार- पांच घरांचें मेन्टेनन्स पळयतालो. ते दीस तागेलो कामगार उदकाचो पायप घेऊन भायली सोंपणा धुतासताना कृष्णाले पडवे भायर दवारिल्या गाडयेर प्रेशरान उदक पडलें. गंडभैरावाले नदरेक ही गजाल पडली आनीक कृष्णा शेर्त गाडी धुवपाक भितर सरता अशें ताका दिसलें. संवयी प्रमाण बिल्डर धरून येतल्या वतल्या कडेन कागाळ ताणें केली. कृष्णान खंय ताका हाजेर जापूय विचारली. कुले खरजल्याय खेपे गंडभैरावालो हात माथ्यार गेले बगर रावनाशिल्लो. मागीर घडयेक तो राग थंड करूक खाक्यांत हात घालून केंस पिळटा जावुये. पूण, कागाळी करप हो तो आपलो जन्मसिद्ध हक्क समजतालो.
त्या तेंपार गंडभैरांवाक हाव रेस्पेद दितालों. तागेले नाडबुद्धीची म्हाका जाणीव नासली. चार दीस सुटयेर येतकीच थोड्याच वराचो सहवास आसतालो आनी तातूंत चड खोलांत वचपाक वेळुय नासतालो. म्हाकाय दिसतालें की वेण्णा, दंडबिंडा हे चूक आनी फक्त गंडभैरांव म्हणता तेंच खरें. केन्नाय म्हाकाय दिसतालें हांवें हांगा घर घेऊन चूक बी केलीना मु! गंडभैरांव सोडून एकान एक मालक हापसूलाद कशे, असो प्रस्न म्हाका पडटालो. पूण कामाच्या व्यापा भितर ताचेर विचार करूंक वेळ नासतालो. म्हाका गंडभैरावान पटयिल्लें की ह्या दुर्गांत आशिल्ल्या सुण्याक ताणें दुर्गा भायर वचून हागूंक आनी मुतूंक शिकयलां. जी सुणी भितर हागतात तीं भायलीं म्हणजेच दुर्गा भायल्या जगा वैली, आनी वेण्णा आवाज करता ते ओगीच आनी तागेलीं सगळीं नाटकां अशें बी ताणें म्हाका पटोवन दिल्लें. म्हाकाच न्ही तर सुटयेर येवपी खुबश्या वागड्यांक ताणें पटयिल्ले की दुर्गा भितरलीं सुणी हागूंक आनी मुतूंक दुर्गा भायर वतात. म्हाकाय गंडभैरावालीं नाटकां वा चिकानां खबर नासलीं. हांवें मानलें आनी तेन्हा म्हाकाय दिसले कीं वेण्णाच नाटका करता. समितीचो मुखेली गंडभैरांव एकटोच संकुलांत आनी बाकीचे आमी वांगडी सगळे भायर रावपी, सगळ्यांक तें पट्टालें अशें म्हणचे परस तो आमकां पटयतालो. पटोवन दिवपाची ताची कला अति उच्च आसली. उलोवपाक तो कोणाक आयकनासलो आनी आपलें तेंच तांबडें करतालो. हो ताचो गुण तोखणाय करपा सारको हातूंत कसलोच दुबाव ना. थोडे आनीक वांगडी जांच्या भाडेकरूंक ह्या सुण्याचो त्रास जातालो तांणी हो विशय घेवन बिल्डरा मेरेन वचून तांचें स्थलांतर करपाचो प्रयत्न केलो. पूण, गंडभैरांव कसोच बदलोना. ज्या जाग्यार आसा त्याच जाग्यार सुणी रावतली, दुर्गा भितर मालका इतलोच सुण्याचोय हक्क आसा, अशें सांगून आनीक सुप्रीम कोर्टाचे निकाल दाखोवन आपलें तेंच खरें केलें आनी ताचें गर्व आनीक वाडलें. (फुडें चलता…..)

अजय करमली
93737 46957