भांगरभूंय | प्रतिनिधी
गंडभैरांव पलटवार करूंक संधीची वाट पळयतालो. ताचे शिवाय तो ह्या वेळार आनीक काय करुक शकनाशिल्लो…( आतां मुखार….)
दुर्गानंदानं उबे केल्ले बाउन्सर हड्डे मुखार करीत, हातांत आशिल्लें रोत घुंवडायत पासयो मारताले. ह्या वाटेन गंडभैरांव घरां भितर आपणें कितें चूक केल्या म्हणीत अस्वस्थ जाल्लो. जमनीर पांय धोडायात कुडी भीतर हे वटेन ते वटेन नाचतालो. बाकीचे वांगडी काय करीनात म्हूण तांकां भितल्ल्या भितर गाळयां शिंवर मारत आपल्यो उच्च पांवड्या वयल्यो वळखी सोदीत तांकां फोन करूंक लागिल्लो. भायर गस्त घालपी बाउन्सरांक पळोवन ताका हुमऱ्या भायर पांय काडपाक धीर येनाशिल्लो. आठ दीस जावन गेल्ले. एक दीस गंडभैरांवान भायर सरपाचो यत्न केल्लो, पूण बाउंसरान इतल्या फोरसान हातांतले रोत घुंवडायलें आनी गंडभैरांवान भिवन जी शिळकी सोडली ती गोंया सावन कर्नाटक, केरळ मार्गे कन्याकुमारीचो नकाशो कालसांवाचेर पितारीत त्रिवेणी संगमात वचून विसर्जित झाली. गंडभैरांव कुटूऱ्यो करून तीन- चार आठवडे भितरूच बसलो. ताडीमोडी गंडभैरावाचेर, चूड लावून म्हारू हाडला म्हणून फडफडूंक लागिल्ली. सकयल्या मडकेंक निस ना, वैल्या मडकेंक शीत ना अशी परिस्थिती गंडभैरावाली जाल्ली. वेण्णा आनीक दंडबीडाक आतां थोडी ख़ुशी जाल्ली. सदाच तांका पीडपी गंडभैरांव आता स्वतः त्रासात पडिल्लो.
गंडभैरावान दिल्ली अमितभाऊक पुसून फोन करून पळयलें, पूण कांयच निष्पन्न जालेंना. थोडे दीस मुकाट्यान बसपाचोच सल्लो ताका मेळ्ळो. वाठारांतलीं सुणीं उपाशी पडिल्लीं, प्रायेवेले सुणे चाळवल्ले. तांगेल्या अन्नदात्यान, गंडभैरावांन कुटूऱ्यो केल्ल्यो. तो अंदुंन पडिल्लो. भुकेन ते सुणे वळवळताले. गुरगुरत स्कुटर, सायकली आनीक गाडये फाटल्यान धांवून हल्लो करताले. कितलेश्याच स्कूटरवाल्यांनी शेंवटो धरिल्लो. एकट्या स्कूटरवाल्याचो सुण्यान उडी मारून पांयुय मोडिल्लो. हे वटेन दुर्गानंदालें दुरीग, दुर्गे दुर्गट भारी म्हणत ऐटीत उबें जाल्लें. दुर्गा वणतीचे तेंगशेर, दुर्गानंदान एक सोडून एक कंवची आनी एक सोडून एक लोखणा भालो, म्हणजे एक कंवची आनी एक भालो अशी मांडावळ केल्ली. गंडभैरावा वाटेन कोंके करून लायिल्ली ही भाल्याची तोंकां जणू काय कुय कुय करीत ताका चाळयताली. ह्याच दुर्गाचेर वयर फुडाराक एक दीस पूल उबो जायत अशें तेन्ना तरी कोणेच चिंतुनाशिल्लें. कट्टीची बट्टी जावप ही अशक्य गोष्ट अशे दिसताले.
दुसरे वटेन आमगेली समिती थंड जाल्ली. गंडभैरावान वांगड्याक अपडेट दिवपाचे बंद केल्ले. मालकाची मेल येता आनी कोणाक उत्तर मेळना अशी परिस्थिती आशिल्ली. हांवे तीन -चार खेप गंडभैरावाक फोन करून उलोवपाचो यत्न केलो, पूण तो फळाक येवंक ना. गंडभैराव आतां राज्याच्या राजकारणांत रस घेंवूंक लागिल्लो. साठे भटाल्या मुख्यमंत्री हटाव उपोषण आंदोलनात सामील जाऊन गंडभैरावांन एक दिसाचें उपोशण बी केलें. त्या दिसा हांवे ताका समितीचो वांगडी म्हूण केल्लो तो निमणो कॉल. परत कोलुक करता म्हूण एक खेपे ताणें फोन उबारलो पूण कोलुक मात केलेना. तोवूय वित्रागिल्लो. हांव पैस आशिल्ल्यान आनी तांतूंत समितीचो वांगडी आशिल्ल्यान म्हाका अस्वस्थकाय जाणवताली आनी म्हणून हांवे समितीचो वांगडी पदाचो राजीनामो दिलो.
इतले मजगतीं एक दीस बिल्डरांन सगळ्यांक कळीत केले की सोसायटी रजिस्टर जाल्या. एकदाचो काजांत बुतांव पडिल्लो. बिल्डरांन आपले काम बेस बरें करून आतां बॉल तुमच्या कोर्टात आसा, मुखार सरात आनीक कितें करपाचें तें करात असो सिनाल दिल्लो. आतां तो बॉल सांसपित बसप काय मुखार खेळोवप, खेळोवप जाल्यार कसो खेळोवप, गंडभैरावालो हातूंत कितें वांटो हें सगळें थारावपाचें काम सगळ्या वांगड्यांचें आशिल्लें. म्हाका धरून चडश्या वंगड्यांक दिसताले की गंडभैराव सोडल्यार आमकां दुसरो पर्याय ना. तेन्ना तरी बॉल मुखार शेंवटुपाची तांक गंडभैरांव सोडून कोणा कडे आसा अशें दिसनाशिल्लें. फुडलीं वाट कितली कठीण आसा. गंडभैरावा कडेन टक्कर आसा हाची जाणविकाय कोणाकूच तेन्ना नाशिल्ली.
सोसायटी रजिस्टर जाल्ल्याची संद घेवन गंडभैरावांन सांगले कीं सोसायटी जाल्ल्यान ही पयलींची समीती आपूणशीच विसर्जीत जाल्या आनीक पुरतोषम जो मेलार मेल बरोवन चवकशी करतालो, सगळ्याक एकठांय हाडपाचो यत्न करतालो ताणें फुडाकार घेऊन मुखावेले कार्य करचें. पुरतोषम हांगां स्थायिक नाशिल्ल्यान मेलाचेर मेल, मेल एके मेल, मेल दुणे इमेल असो खेळ वर्सभर चललो. पुरतोषम फक्त मेलां बरोवन सोसायटी करूंक सोदतालो. कोण रावता तांणी फुडें सरचें आनीक हें कार्य करचें अशें पुरतोषमाचें म्हणणें आशिल्लें. हळू हळू सगळेच दुसऱ्या कडेन बोट दाखोवन तुमी मुखार सरात अशें सांगूक लागिल्ले. बॉल मुखार सरनाशिल्लो. सगळे वांगडी बॉल घेऊन संगीत खुर्चे भशेंन खेळूक लागिल्ले. आपल्याकडे आयिल्लो बॉल दुसऱ्या कडेन पास करप होच खेळ वर्सभर चलिल्लो.
तेन्ना गंडभैरांव धरून सात- आठ बिराडा हांगा रावतालीं. तातूंतले पांच- स एकमेकांची तोंणां पळयनाशिल्ले आनी गंडभैरांव सोडल्यार आनी कोणाची काम करपाची क्षमताय नाशिल्ली. कोण न्हीं शेजारी, सगळे म्हंजे वैरी ही गंडभैरांवाली वृत्ती आशिल्ली आणि हीच वृत्ती फुडें सगळ्या वांगड्यांची घात करपाची आशिल्ली. गंडभैरावांन आपलो वायट अनुभव जमेक धरून जाका जवाबदारूय तागेलीच वृत्ती आसली, हीच संद साधून ताणें सोसायटीच्या वेव्हरांत कांयच रस ना म्हूण घोषित केलें. म्हाकाय ताणें तशेंच सांगिल्ले. म्हाकाय तातूंत काय रस नाशिल्लो. विकतें श्राद्ध घेवंक म्हजीय तयारी नाशिल्ली. गंडभैरावाल्या तकलेंत पूण सूडभावना खंयतरी धुसफुसत आशिल्ली. कितें म्हणटा तें सगळे आपूणच, म्हाका जें बरोबर दिसता तशेंच हे सोसायटींत चलपाचें अशी ही ताची वृत्ती ताका थंड बसूंक दिनाशिल्ली. xxx त कीड हुळहुळत उरताली. आपूण हांगासल्लो वरिश्ठ, म्हूण आपूण सांगता तशेंच जावपाचें हीच गंडभैरावाची वृत्ती आशिल्ली.
दुर्गानंदान बाउंसर दोन म्हयने सुमार पोसून परत धाडिल्ले. वातावरण परत थंड जाल्ले. सामान्य जाल्ले. गंडभैरावालो घुस्मटमार जातालो. फोड फुटपाची तो वाट पळयतालो. तागेली बिश यो बिश यो ची दिनचर्या, कोणाली गाडी सुण्याक लागता वा सुणे गाडयेपोंदा पडटा म्हणून जोखून बसप आनीक केश करप असले उद्योग परत चालू जाल्ले. राम नाम जपता आनीक केंसांन गळो कापता, असली पाडी वृत्ती ताच्या नसा- नसांनी भिनिल्ली.
(फुडें चलता…)
अजय करमली
93737 46957
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
