गंडभैरांवाल्यो नाडबुद्धी

भांगरभूंय | प्रतिनिधी

हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो.

• लेखक

• परत एकदा त्या खिणाक म्हाका उगडास आयलो हांवें जाणटेल्या कडल्यान आयकल्या म्हणींचो “सोनार शिंपी कुलकर्णी आप्पा …. यांची संगत नको रे बाप्पा!” (आतां मुखार….)
• गंडभैरावांन ई- मेलाचो फार मारतना मुखार म्हणिल्लें की फाटले मिटिंगेक जे आमी फक्त मान्यताय वा रॅटिफिकेशन घेतलां तें सगळें चूक, हें तागेल्या तकलेंत येवपाक सुमार ऐंशी दीस कित्याक लागले तें कुवाडें आमकां अजुन उलगड नाशिल्ले. तागेलो अर्धो तरी मेंदू शेर्त धिपरांतल्यान चलता आसतलो. धिंपरां आनी मेंदू हांचो ताळमेळ जायसर घडये ऐंशी दीस लागले, आनी हो वेळ जाल्लो आसुंये. आमच्या गटाच्या खंयच्याय वांगड्यांक वैजकी ज्ञान नाशिल्ल्यान हाचेर चड विचार करूंक आमी गेलेनात. आपल्याक फावो जाता तशेंच गंडभैरांव कायद्यांचें विश्लेषण करतालो. नाजाल्यार आमी बाय लाॅस प्रकार नोटीस धाडिल्ली, विडिओ कॉल मिटिंगेक परवानगी मेळ्ळीना म्हणून क्लब हावसा भितर मिटिंग केल्ली, सगले थाराव थंय पास जाल्ले. पयलीं आमी मॅनेजमेंट समितीक थाराव पास करूं, पूण हे फुडें जनरल बॉडीन पास करप काय भायर मारप हाचो सर्वस्वी हक्क जनरल बॉडी कडे आसता. मागीर आमी ते रॅटिफाय जाल्यार तातूंत चूक कितें हें ताचे घडये धिपरांकूच आडखळत उरतालें आनी मेंदवा मेरेन पावनाशिल्लें.
• गंडभैरांव ह्या संकुलांक वरिश्ठ आशिल्ल्यान आनी खुबशे वांगडी तागेलेच पयलीं पसून आयकत आयिल्ल्यान तो उलयता ताचेंच समर्थन करताले. खरें, फट जाणून घेवपाक वा खोलांत वच्चें अशें कोणाक पडूंनाशिल्लें आनी वचूंक वेळूय कोणा कडे नासतालो. तो उलयता तेंच खरें आसूंक जाय म्हणून फाटलो फुडलो विचार करिनासताना सगळे मानून घेताले. लागींच्यान पळयिल्ल्यान आनी संबंध आयिल्ल्यान तागेल्या अहंकारभरीत नश्टबुद्धी आनी नाडबुद्धीचो म्हाका वास लागिल्लो. हांव जर हांगा स्थायीक जावपाक येवूक नाशिल्लो तर घडयेक हावूंय बी आतां मेरेन ताचो समर्थकच आसपाचो. आपल्या कामाच्या व्यापांत कितें खरे, कितें बरें हाचो विचार करपाक खंय कोणाक वेळ आसता? गंडभैरावा कडेन उलोवण्यांतल्यान दुसऱ्याक भुलोवपाची तांक आसली आनी तो तिचो वापर करतालो.
• आमी सोसायटीचे वेवस्थापन मालकी हक्कान चलयतात असोय आरोप ताणें आमचेर लायिल्लो. आमी सोसायटीची रचनाच बदलतात, मेंटेनन्स सोसायटी आसल्यार नॉन ऑक्युपन्सी चार्जेस, हस्तांतर चार्जेस, अशें आसूंक जायना असले थाराव जे पास जाल्यात ते चूक, हांगा चडश्या लोकांनी घरां घेतल्यांत ते दुसरे घर वा हॉलिडे होम म्हणून. आनी तांकां जाय तें करप हो तांचो हक्क अशें ताणें तब्बल ऐंशी दिसांनी म्हणिल्लें. आमी तर हे सगले थाराव बाय लाॅवस प्रकार केल्ले. गंडभैरावांन बी हे बाय लाॅवस सोसायटी करचे वेळार सायन केल्ले. को ऑप सोसायटी आनीक मेन्टेनन्स सोसायटीक जवळ जवळ सगळे सारकेच बाय लाॅवस आसले. हातूंत मुखेल फरक इतलोच आशिल्लो की को ऑप हावसिंग सोसायटीक इस्क्रीतूर सोसायटी नांवार जातात आनी मेन्टेनन्स सोसायटीक वैयक्तिक नांवार जातात. कितेंय आसू गंडभैरावाली ही मात्रा भाड्यान दिता त्या वांगड्यांक सारकी लागू पडिल्ली. फोडाफोडीचें राजकारण तो दीस्त खेळिल्लो. वेण्णा आनी दोन – तीन वांगडी जें घर भाड्यान दिताले तें ताचे वाटेन वचून हे पास केल्ले थाराव चूक अशें म्हणूक लागिल्ले. मिटिंगेक थाराव पास करतना नॉन ऑक्युपन्सी, हस्तांतर ह्या प्रस्तावाचें वेण्णान समर्थन केल्लें, पूण आतां हवा बदलता ती पळोवन ताणें आपले हात हेच व्हांवते गंगेंत धुवून घेतले. पयशा खातीर मनीस कसो बदलूं शकता हाचें उदाहरण आमकां दिश्टी पडटालें, गंडभैरावांन आपल्याचेर केशी केल्ल्यो, आपल्याक पोस्तार आनीक त्रिबुनालार फावटी घालूंक लायिल्ल्यो हें एका खिणाक तो आपल्या फायद्या खातीर विसरिल्लो आनी गंडभैरावाच्या फाटल्यान उबो राविल्लो. एका भाड्यान दिवपी वांगडेंन तर आमकां ई- मेल धाडून सांगिल्लें की ही मेंटेनंस को ऑप सोसायटी, को ऑप सोसायटी न्ही, आनीक आमी फक्त मेंटेनन्स पळयात, बाकीच्या गोश्टींत मेतेर जायनाकात.
• ह्या मेलीचो टोन तर इतलो खोचक आनी अपमानित करपी आशिल्लो की आमी फक्त सोसायटीचे नोकर, मेंटेनन्स सोडून आमी कांय करप ना. हे वटेन गंडभैरांव बाय लाॅवस जांणी कोणें बरयल्यात ते अधिकारी अनाडी आनी आपूण म्हणता तेंच खरें अशे पद्दतीन उलयतालो. गंडभैरावांकूच थंय व्हरून कायदे करूंक आनी बरोंवक बसोवपाचें अशें खुबश्या वांगड्यांक पुसून दिसूंक लागिल्लें.
• हांव, पुरतोषम आनी तीमण्णा तिगुय हो कॉमन जागो आपल्या नांवार करूंक सोदतात अशीय वावडी ताणें वांगड्यां मदीं पातळावपाक सुरवात केल्ली. एका वांगड्यांन तर फोन करून हाचेर आमचे कडें वासपूस केल्ली. हांवें हांसत हांसत मस्करी करीत म्हणिल्लें, हांगा स्विमिंग पूल आनी क्लब हाऊस मोडून आमचो एक माॅल उबो करपाचो विचार आसा, वयर तेरेसार उबारया एक ल्हानसो पूल आनी एक क्लब हावस!
• अहंकारान पेटिल्लो गंडभैरांव आमचेर तिडक धरून सोसायटीची कशीय करून नाशाडी करपाकुच उठला हें जवळ जवळ निश्चित आसा हें आमी जाणिल्लें. आतां मेरेन पंधरा – सोळा वांगड्यांनी दुडू धाडून जाल्ले. आनी गंडभैरावान अशी करंदाय मारिल्ली की जणू काय आमी आमगेल्या वैयक्तीक खात्यांत हे दुडू जमा करून घेतल्यांत. असले विचार आमचे तकलेंत चुकून पुसून येवंक नाशिल्ले. आमी जी खर्चाची सगळी विश्लेषणां केल्लीं तीं सगळीं काल्पनीक आसात अशेंय गंडभैरावांन म्हणिल्लें.
• ह्या वेळार समितीचे आमी चारूय वांगडी चार कडें आशिल्ले. हांवूय भोंवडेर आशिल्लो. आमकां ई- मेलाक उत्तर तर दिवचें आसलें. विचारमंथन करतगेर आमकां दिसलें की हे घाणीत तांणी पांय घालून आमी चूक तर केल्या आतां वांगड्यांक विचारूया, तांकां कितें जाय. ई- मेलाचेर आमी विस्वास थाराव मागयलो, जर भोवसंख्य हय म्हणटा जाल्यार आमी फुडें चलोवया नाजाल्यार जांणी दुडू धाडल्यात, तांचे दुडू परत धाडून, ऑडिट करून घेऊन आमी रेस्पेदान राजीनामो दिवूंया. मेलाक चार- पांच लोकांनी उत्तर दिलें. बाकीच्यांनी ओग्गी रावप पसंद केलें. दोनूय व्हड्यार पांय आसल्यार खंयूय उडी मारप सोंपें, मोन्यानी बसून वारें येता तशें सूप धरप तांणी पसंद केल्लें. वेण्णान गंडभैरावाच्या समर्थनात मेल घालून आनीक एक बॉम्ब फोडलो. गंडभैरावाच्या हाक हां ताणें मेळयिल्ली. ताणें आपले चेक फुडलीं तारीख घालून पयलींच दिल्ले, पूण आतां वाऱ्याची दिशा बदलता ती पळोवन आमचेर अधिकार नासतना दुडू एकठांय करतात, असो आरोप लायलो. वांगड्या भितर भंय निर्माण करपी वातावरण आतां तयार जाल्लें. गंडभैरावान फोडाफोडी करून आमचे विरुद्ध हें भयाचें वातावरण निर्माण करूंक यश मेळयिल्लें. (फुडें चलता…)

अजय करमली
93737 46957