गंडभैरांवालो चलनफुगवटो !

भांगरभूंय | प्रतिनिधी

एक अणभव – 19 

हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो.

– लेखक

गंडभैरांव  आनी लोंढो भिकाजी  हांचे भितर  कितें  समजोतो  जाल्लो हाचो वास आमकां  लागूं नाशिल्लो आनी खंयच्याय वांगड्याक  पडुनय   गेल्लें नासलें. (आतां मुखार….) 

तीन म्हयन्याचो प्राज सोंपत  आयिल्लो. बिल्डरा कडलें  देखभालीचें कंत्राट सोंपून एक तारखेच्यान लोंढो भिकाजींचें विधिवत आगमन हांगां जावंचें आशिल्लें. सगळ्या संकुलाची देखभाल  आतां लोंढो भिकाजी करतलो अशें थारिल्लें.   गंडभैरांव आपल्या समर्थकांक घेवन जैत मनयतालो. टर्नकी कंत्राटदारा कडेन सुपूर्द करपाचें तागेलें सपन प्रत्यक्षात तर येवपाचें आशिल्लें !             

सादारणपणान बिल्डरा कडल्यान वांगडी सोसायटी हातांत घेतात तेन्ना   देखभालीचो खर्च उणो जाता,  पूण आमगेले  हांगां सगळें उरफाटे जाल्लें.  हो  खर्च उणो जावचो, मूल्यवर्धन जावचें, नव्यो सुदारणा जावच्यो, नवे तरेचें बदल जावचे, सूर्या पसून ऊर्जा घेवन आमच्यो कॉमन लायटी चलोवच्यो, मुखेल गेट लायटीचेर चलपी  जावची, आमचो संकुल सीसीटीव्ही निगराणी सकल  येवचो आनी हें सगळें करतना कोणाल्याच  बॉल्साक हिसबाभायर खार पडचो न्हय आनीक आमी  टॅक्साची शिम हूपची न्हय,  ही आमगेलीं सपनां तुर्ताक तरी मातये भरवण जाल्लीं.   विकास जावचो म्हणून तर  आमी धडपडटाले.  तेच खातीर  तीम्मणान फुडाकार घेतगेर आमी चार लोक ताचे वांगडा उबे राविल्ले. 

हांगा  आपलें तेंच तांबडें करीत गंडभैरांवान म्हयन्या फाटल्यान प्रत्येक वांगड्याक म्हणजे प्रत्येक  घरा फाटल्यान  हजारभर मायज खर्च वाडयिल्लो. वर्सुकी खर्च सुमार तेरा  हजारांनी वाडिल्लो आणि हें फक्त आपलो हट्ट पुरोवपाक आनी टर्नकी कंत्राटदाराच्या  म्हणजेच लोंढो भिकाजीच्या   हातांत सगळें सुपूर्द करपाक. हें सगळें समर्थन  करताना ताणें चलनफुगवट्या खातीर मजुरी खर्च, दिसपट्टे  लागपी वस्तूचे प्रेस कशे फाटल्या वर्सा परस आतां वाडल्यात, आनीक ते वाडपाचें कारण,  जागतिक परीस्थिती,  अंतरराष्ट्रीय बाजारपेठ,  पेट्रोकेमिकल्साचे भाव वाडिल्ल्यान बाकीच्या वस्तूचेर जावपी परिणाम आनी ह्या खातीर एकदंरीत म्हारगाय कशी वाडटा हाजेर बरींच उतरां बरयत लोंढो भिकाजीलें  समर्थन केल्लें. एकूण मेळून  वर्सुकी पन्नास एकावन लाख उबे करूंक ताणें उलो मारिल्लो.  इतलेच दुडू आमगेल्या समितीन उबारपाचें केल्लें आनी तातुंन वीस लाखांची तरतूद आमी  केवळ  भांडवली खर्चा खातीर केल्ली.  पूण आमी हे पयशे जनरल बॉडी मान्यताय घेनास्तना उबारतात म्हणून गंडभैरांवान आकाश पाताळ एकठांय केल्लें. करंदाय मारून- मारून आमचेर केस घालपाची धमकी दिल्ली. वित्रागून आमी वांगड्यांक  पयशे परत करून राजीनामे दिल्ले.  आता हे पयशे उबारताना   ताणें भांडवली खर्चाची कांयच तरतूद करूंक नाशिल्ली. हातूंत कसलेच मूल्यवर्धन नाशिल्लें. आमचे पंप, जनरेटर सगळे पोरणे जायत आसात आनी  ते मोडल्यार चार पयशे आमच्या हातांक आसूंक जाय हाचे कडे ताणें दुर्लक्ष केल्लें.  एकठांय केल्ले जवळ जवळ पंचायशी मायज टक्के नावे लोंढो भिकाजी खाते वचपाचे आशिल्ले. रुपयांतले चौदा आणे लोंढो भिकाजीक गेल्यार दोन आण्या भितर  लायटी, उदका प्रशासकी खर्च धरल्यार खंचे कडे कांयच उरचें नाशिल्ले. अनपेक्षीत, अघटीत कितेंय घडल्यार त्या खातीर वांगड्यां कडेन वचून परत दुडू उबारचे  पडत   अशी परिस्तिती  ताणें तयार केल्ली.  जोडली पड , खाली पड , असोच सगलो हिशोब आमगेलो अर्थीक तज्ज्ञ आनी अर्थशास्त्रज्ञ गंडभैरांवान  मांडिल्लो.

सगळे वांगडी दुडवांकार आशिल्ल्यान कोणाक पयशांचें पडूंक नासलें,   आमी चार- पांच लोक पयलींचे समितीचेर आशिल्ले  ते सोडल्यार आनी  आमी पयलीं हाजेर काम केल्यान   आमकां दोळ्यां मुखार चलपी लूट पळोवपाक  जायनाशिल्ली. कश्टकाराक, धंदेवाल्याक जरूर लाभ जावचो, फायदो जावचो, उत्पन्न मेळचें, पूण तातुंत खंय तरी एक शीम आसची, मर्यादा आसची, ती हांगा खंय दिसनाशिल्ली.  लोंढो भिकाजीन गंडभैरांवाल्या अर्थशास्त्र आनी चलनफुगवट्याचो पुरेपूर फायदो घेत स्वता खातीर  पोट भरपाचें शास्त्र वेवस्थित आपल्या जाग्यार बसयिल्लें. फुलू कुस्तार खोजने वेवस्थीत लोंढो भिकाजींन मारिल्लें. आमगेलो फुलू  मात दुसऱ्याच धुंकेभितर आशिल्लो.   पयलींचे समितीचेर आशिल्ल्यान म्हाका  सगळ्या खर्चाचो अदमास आशिल्लो. आमकां अर्थशास्त्र चलन फुगवटो आनी चलन वाढीचो गंध नासत, पूण  मार्केट थोडें तरी खबर  आशिल्लें.    हांवें ह्या लोंढो भिकाजी प्रस्तावाचेर बारकायेन अभ्यास केलो आनी म्हाका हातूंत दिसून आयलें की  हो टर्नकी कंत्राटदार लोंढो भिकाजी हातूंत सगळो खर्च काडून म्हयन्याक लाखभर तरी  कांय  न्ही  करून जोडटलो. जी टांकी आमी फाटल्यान लागतगेर स- सात  हजारांक फाटल्या वर्सा बिल्डरान  नितळ करून घेतिल्ली तीच निवळ करूंक लोंढो भिकाजींन पन्नास हजार रुपया  सांगिल्ले . शेवटाक हांवें हाजेर विरोध करून मेल बरयलो, तितलेंच तर हांव करपाक शकतालो…. आनी विशेष सर्वसाधारण  सभेक हो विशय वयर आयलो.

गंडभैरांव वांगडी  नाशिल्ल्यान डायरेक्ट उलोवूंक शकनाशिल्लो, ताणें थंय ताडीमोडीचेर चड पेज येवचो न्ही म्हूण दलभंजनाक आपलो म्हणयारो केल्लो. दलभंजनान  हाचेर उलयताना  म्हळे की टांकये भीतर वेरो  येवपा शकतात. ताका मागीर वेगळो त्रांतामेंत  करपा पडटा,   टांकी भितरल्यान खंय तरी वणतीचेर फुटूं शकता, खंयचान  टांकयेक गळटी लागूं शकता,   हाचे खातीर इतल्या पयशांची फक्त तरतूद केल्या. आरे तरतूद तर सोसायटीन करपाची, लोंढो भिकाजी आपल्या कोटेशनात टांकी निवळ करपाचेंच  म्हूण  पन्नास हजार लायता ताचें कितें? हांवे आनी एकट्यान टांकी निवळ करपी वेवसायिकाक आपोवून ती निवळ करपाचें मोल विचारिल्लें आनी आंकडो  चड म्हळ्यार  धा ते बारा हजारां वयर वचूंक जायना अशें उत्तर म्हाका मेळिल्लें.    

दलभंजनान मुखार आमकां समजायलें की तातूंत व्हडलेंशें कितें? हे पन्नास हजार जर चाळीस वांगड्या मदीं बारा म्हयन्यान  जर भागले तर दरेका वांगड्यांक म्हयन्याक कोणतरी शंबर वयर थोडेच दिवचे पडटात आनी त्या बदलाक आमकां शुद्ध उदक मेळटा.  आतां कपल, तो लोंढो भिकाजी आमगेले टांकयेंत भांगराचो काय सोनेरी लेप लावून वेरो पुरोयतलो! आमी पयलींच्या समितीचे वांगडी जावन विशय काडीसर फाटली  पांच- सात  वर्सां टांकी निवळ करपाचीय कोणाक याद येवुनाशिल्ली, आतां दुतोंडी  दलभंजन  लोंढो भिकाजीलें  समर्थन करचे खातीर खूप कितें उलोवपाक लागिल्ले.  गुलगुलातान तर समर्थन करताना आपुण शुद्ध उदका खातीर इतलेच न्ही तर हाचे परसय चड दुडू दिवपाक तयार आसा अशें म्हणिल्लें.  वेण्णा गंडभैरांवा फाटल्यान विकेट किपरा भशेन उबो राविल्लो.  लोंढो भिकाजीली हातूंत चांदी जाल्ली.  विरुद्ध मत दिवपी फक्त चार आनी बाकीचे सगळे काचकिसांव नाका म्हणून गंडभैरांवाक मत मारून मेकळे जाले. दुडवांचें  कोणाक पडूं नाशिल्लें. प्रत्येकाक  आपलें  मेन्टेनन्स  आनी  जाग्याचें  मोल  वाडचे  हातुकूच रस आशिल्लो. गंडभैरांव आतां म्हयन्याक एकूच चेक दिवपाक मेकळो  जाल्लो. प्रचंड भोवमतान वांगड्यांनी ताका समर्थन दिल्ले. ढम्   ढम्  करून मतां मारीत गंडभैरांवाल्या  प्रस्तावाचेर शिक्कामोर्तब जाल्ले. सलाम गंडभैरावाक.  पांच वांगड्यांनी सुरवातेक  ताका तेंको दिल्लो तो आंकडो आता हळु हळू  विसां वयर  गेल्लो. सगळ्या वांगड्यांच्या तकलेक  आपले  अर्थतज्ञनी  आनी आर्थिकतज्ञी विचार   घालपाक ताणें यश मेळयिल्लें.  सामके आदरपूर्ण पद्धतीन   सगळ्याच्या तकलेंतली की टर्न करीत टर्नकी कंत्राटदार लोंढो भिकाजीच्या रुपान ताणें उबो केल्लो.      गंडभैरावाक आमी सगळ्या वांगड्यांनी निळू केल्लो.  निळू म्हजो निळू, कोलतेंन खेळू, घर लासल्यार लासूं, पूण निळू म्हजो खेळू!     (फुडें चलता…)