भांगरभूंय | प्रतिनिधी
एक अणभव – 13
तो घेवन बशिल्ले बाणीवेले बोट हालोवपाची ताचीं कशींच लक्षणां नाशिल्लीं. फाटले वटेन तो वेगळेंच कुभांड रचतालो!. (आतां मुखार….)
हें हावसिंग सोसायटीचें कथानक प्रत्यक्ष अणभवांचेर आनी कांय काल्पनीक गजालींचेर आदारून आसा. प्रत्यक्ष जिवो वा मरण आयिल्लो मनीस, घडणूक हांचे कडेन हाचो संबंद ना. तो जुळत जाल्यार निव्वळ एक योगायोग समजुचो.
गंडभैरांवाक आमकां धोंसपाक, दुख्ख दिवपाक इतली उमेद जाताली की आमचेर कागाळी रुपी ई- मेलाचो फार मारतगेर ताका सुखाची तेंगशी गांठिल्ल्याची अनुभूती येताली. आंगार खाज वा बुरड सुटतगेर जशी मनश्याची परिस्थिती जाता आनी बुड्डून खाजोवन, खरपून जें अत्युच्च सुख ह्या वेळार मनशाक मेळटा तशेंच सुख गंडभैरांवाक आमचेर कागाळी करून जातगर मेळटालें. सुणें कल्याण सोडून दुसरे बरे उद्देग ताचे कडेन आनीक कांय नासले. “बेकार थवय खंय कुले ताशी”. तागेलेय अशेंच चलतालें. जाका इंग्लेजेंन सॅडिस्टीक प्लेजर म्हणतात ते घेवपाक तो आसुशिल्लो आसतालो. बाय लाॅवसची साथ घेत आमकां कशें फोंडांत घालपाक शकता तें सोदपाक तो रजिस्ट्रार ऑफिसांत पाविल्लो. आमची जी खजिनदार आशिल्ली तिका आमगेल्या समितींतल्यान भायर सर अशी फोनार चत्राय आयिल्ली. गंडभैरांव आतां कागाळी करतोलो आनी ती खजिनदार आशिल्ल्यान तिजेर कुराड पडची न्ही ह्या अर्थान, गंडभैरांवाल्या पंगडांतल्यान एके बायल मनशेन तिका शिटकावणेचो फोन केल्लो. घडयेक गंडभैरांव ही एक तागेल्या नीच पद्धतीच्या राजकारणाची चालूय चलतालो आसूंये. तिची मनस्थिती अस्ताव्यस्त करपाची हो ताचो दाव आसूंये.
गंडभैरांव कितें तरी नवें कुभांड रचता हाचो आमकां वास लागिल्लो. रजिस्ट्रार ऑफिसांत आमचेर कागाळीची फायल जाल्ली. गंडभैरांवांन “बॅकस्टॅबींग” केल्ले. विस्वासघात वा बॅकस्टेबींग कशें जाता हो म्हजो पयलो अणभव. आमचेर फाटल्यान वार करून ताणें आपली नीच वृत्तीची आनीक एक झलक दाखयिल्ली. आमच्या फुड्यांत येवन उलयनासताना ताणें आमचे फाटींत अळंग सुरो खुपशिल्लो. फुडल्यान ताच्या हातांत आमी दिवंक केल्लो सोसायटीचो ताबो घेवूंकय तो मुखार येवंक नाशिल्लो, आनी आमी राजीनामो दिवप हें चूक, अशें म्हणपाकूय नाककातरो फाटी फुडें पळय नाशिल्लो. एके वाटेन तें चूक म्हणीत दुसरे वटेन समिती बडतर्फ करपाची कागाळ ताणें रजिस्ट्रारा कडेन केल्ली. आमी वेंचणुके खातीर केल्ल्या अर्जां पयलींच ही कागाळ थंय इनवर्ड जाल्ली. जाचेर कागाळी जाता तांकां ती धाडपाचें काम रजिस्ट्रार ऑफिस करता आनी ताचे विवरण मागता. रजिस्ट्रार ऑफिस कोविडाच्यो केशी वाढून थोडो तेंप बंद आशिल्ल्यान गंडभैरांवाले हें कुभांड रुपी कागाळीचे पत्र आमकां रजिस्ट्रार ऑफिसांतल्यान बऱ्याच वेळान आयलें. वेंचणूक घेवचे खातीर चालू केल्ली प्रक्रिया बी कोविडा खातीरच अडखळत उरिल्ली.
कागाळेंत ताणें आपली बाय लाॅवस विशींची व्याख्या रजिस्ट्राराच्या तोंडांत घालत बरयिल्लें; की आमच्या समितींतले तीन लोक ह्या संकुलांत रावनात म्हणून ही समिती बेकायदेशीर आसा, आनी म्हणून ती बरखास्त करची. ताणें फुडें ह्या पत्रांत बरयिल्लें, समिती बेकायदेशीर म्हटगेर तांणी घेतिल्लो प्रत्येक निर्णय आनी रेटिफिकेशन बेकायदेशीर. आनी त्या खातीर तांचे सगळे निर्णय रद्द थारोवंचे. बरयतना हीं उतरां ताणें रजिस्ट्राराच्या तोंडांत घालीत तुमी सांगिल्ल्या प्रमाणे अशेंच म्हणिल्लें. बाय लाॅव्हस भितर खंयच तर बरोवनाशिल्ले की समितीचेर आसा ताणें संकुलांत कायम रावपी आसूंक जाय. ह्या रजिस्ट्रार ऑफिसांत फक्त सुचयताले की संकुलांत रावतल्यांनीच समितीचेर आसल्यार बरें, पूण तसो कायदो थंय नाशिल्लो. हीच रजिस्ट्रारालीं उतरां ताणें आपल्याक जाय तशीं वापरूंक उखलिल्ली. आमी आठ आनी तीन महिन्यां पयलीं घेतिल्ल्यो दोन जनरल बॉडी मिटिंगो सगळ्यो बेकायदेशीर, दुर्गेक आनी सुकांतीक हे समितीचेर येवचें आशिल्लें, पूण तांकां हांणी घेवंक ना, राजाराम चिनाक आसतानाय तो समितीचेर कसो, तीमण्णा आनी पुरतोषाम मुंबयचे, ते समितीचेर आसूंक जायना अशेंय ताणें कागाळींत बरयिल्लें. आमी अप्रूवल नासतना पयशे उबारतात हें सगळें विशय न चुकता तर तातुंत आशिल्लेच. इंत्रुजाक खाल्ल्या मांसाचे धेंकर गंडभैरांवाक पासकांक येवूंक लागिल्ले.
ह्यो समस्या वा अडचणी बरयतना ताणें आमकां बडतर्फ करचे इतलेंच रजिस्ट्राराक सांगिल्लें, मुखार हाचें निरसन कशें करचें हें ताणें सांगूंक नाशिल्ले. आपुण फक्त फोंड काडून तातूंत आमकां पुरपाक जाणा, फुडें कितें हाचें उतर खंयच तातुंत दिश्टी पडनाशिल्लें. आमच्या हातांत ही कागाळ पड्तागेर आमी सडेतोड उत्तरुय रजिस्ट्राराक दित, गंडभैरांव आनी इतर सायन करपी तशेंच सगळ्या वांगड्यांकूय धाडून दिलें. परत एकदा आसुरी आनंद ताका हातूंतल्यान मेळिल्लो. आमकां कायदेशीर कारवाय करपाची धमकेचो ई-मेल बी ताणें आमकां धाडिल्लो. गंडभैरावाक केन्नाय जाल्यार हाची बिरमत फुटले बगर रावचीना हें निश्चित आशिल्ले.
इतलें मजगतीं आमी आपयिल्ली दुसरी स्पेशेल जनरल बॉडी मीटिंगेक फक्त दोन मुखेल थाराव पास करचे आशिल्ले. बिल्डरां कडेन कंत्राट वाडोवचो थाराव तर पास जालो, सगळ्यांनी दुडू धाडचें मान्य केलें, पूण तातूंतय इतलोच तेंप कित्याक हाचेर हुज्जत जाली. ऑडिट रिपोर्टाचेर गंडभैरांवान नोटिस मेळटनाच कुतां काडिल्ली. आमी तागेलो मुद्दो घेवन ऑडिटरा कडेन उलयिल्ले, पूण ताणें ऑडिट रिपोर्ट बदलपाचें अमान्य केल्लें. ही चूक शुल्लक आनीक फुडल्या रिपोर्टांत बदलुया अशें ऑडिटरान सांगिल्लें. त्या प्रमाण मीटिंगेक आमी सांगलें आनी शेरो मारीत हो थाराव पासूय जालो. ताका दलभंजनान तेंको दिल्लो. फुडें मागीर अजेन्डा भायली चर्चा करूंक आमी वांगड्यांक मेकळीक दिली आनी त्या वेळांत आमच्या बदनशिबान दंडबिंडान एका वांगडेचेर शेरो मारलो आनी त्या वांगडेन गाळयांचो शिंवर दंडबिंडाचेर केलो, गोंयचे आनी भायले हाचो रंग थंय येता हें पळोवन आनी हें सगळें आमकां अनपेक्षित आशिल्ल्यान आमी बटण दाबून व्हिडियो मिटिंग ऑफ केली.
दुसऱ्या दिसा चार बायल मनशा वांगडी म्हगेल्या घरा कडे आयलीं. दंडबिंडा वांगडा तांच्या वैयक्तिक केस्तांवांत हीं चारूय बायलां एकठांय जावन म्हाका ओडूंक सोदतालीं. दंडबिंडान म्हळें तें कशेंच म्हणचें आनी आमी मिटिंग कशीच बंद केली हाजेर म्हजें कडेन चारूय जाणा हुज्जत घालतालीं. आनी गंडभैरावाचीच ही चाल आसूंये हो म्हाका दुबाव आशिल्लो. पांशियस काडीत हांव तांचें म्हणणे फकत आयकत रावलो. खंयतरी म्हाका आडकोवया हो ताचो दाव आसूंये. बायलांच्या हक्कार उलयत ती म्हंजें आनी आमचे समितीचें खच्चीकरण आनी अपमान करपी उतरां उलयिल्ली. देड -दोन वरां चलिल्ल्या ह्या खडाजंगींत म्हाका जाणा जावन मारतें घेवचें पडिल्लें. नारीशक्ती कडे हुज्जत घालप ना आनी घालची नी ह्या संस्कारांतल्यान हांव आयिल्ल्यान तोंड बंद दवरीत तांगेली तड्डका, फटाश्यो, थोडें खरें आनी चडश्यो फटी आयकून घेतल्यो. म्हगेली कपलाची शीर तट्टतटपाक लागिल्ली तरी पूण हांवें पाशिंयस काडिल्ले. तोल वचपाक दिलोना, गेल्लो जाल्यार म्हजेरच उलट आरोप लागपाचे, म्हज्या आंगलट येवपाचें, कित्याक तर तांचे कडेन आसा तें म्हजे कडेन नाशिल्लें, तांचे कडेन पंधरा वांगड्यांचें फाटबळ आशिल्लें आनी म्हजे कडेन!! आमी केन्नाय कोणाक वैयक्तिकरित्या उलोवन वा फोन करून आमच्या वटेन येवंक सांगूंक नाशिल्लें म्हणून तर मेजपा सारकें कांयच आंकडे म्हजे कडेन वा आमचे कडेन नाशिल्ले. आमी जे कितें करताले तें निस्वार्थपणान सोसायटीच्या बऱ्या खातीर करताले. वांगड्यांक जर आमचेर विस्वास ना तर फुडें येवन ताबो घेवचो, असो प्रस्ताव तर आमी केन्नाच फुडें केल्लो. नीच राजकारण करप समितीचेर आशिल्ल्या आमच्या पांचूय वांगड्यांच्या रक्तांत नाशिल्लें. आतां वूमनस राईट्स कमिशन आमचेर येता काय बायलांचो साद येता हाची आमी वाट पळोवंक बशिल्ले.
(फुडें चलता…)
अजय करमली
9373746957
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
