भांगरभूंय | प्रतिनिधी
पणजी : गोंय पुलिसांच्या घुंवळे वखदां विरोधी पंगडान (एएनसी) २०२०त गिरकरवाडो- हरमला छापो घालून १.३२ लाखांचो कोकेन आनी गांजो जप्त केल्लो. ड्रग्सची तस्करी केल्ल्याची कबुली दिल्ल्यान न्यायालयान दुबावीत सोपुरुची न्लेवेदिम मोझेस ह्या नायजेरीयन नागरिकाक साडे चार वर्सांचे बंदखणीची ख्यास्त दिल्ली. ही ख्यास्त दुबावितान भोगिल्ल्यान ताची न्यायालयान सुटका केल्या. हे विशींचो आदेश म्हापशेंचे येथील अतिरिक्त सत्र न्यायाधीश राम प्रभुदेसाय हांणी दिलो.
एएनसीन दिल्ले म्हायती प्रमाण, गिरकरवाडो – हरमला ड्रग्स तस्करी करपा खातीर एक विदेशी नागरीक येवपाचो आशिल्ल्याची म्हायती एएनसीच्या अधिकार्यांक मेळिल्ली.ते प्रमाण, तेन्नाचे पुलीस अधीक्षक महेश गांवकार आनी उपअधीक्षक सुनीता सावंत हांच्या मार्गदर्शना खाला निरीक्षक सुदेश वेळीप आनी सीताकांत नायक हांच्या नेतृत्वा खाला उपनिरीक्षक अरुण गांवस देसाय, रोहन मडगांवकार, बायलां उपनिरीक्षक प्रियंका सावंत, साहाय्यक उपनिरीक्षक सत्यवान नायक आनी हेर कर्मचार्यांच्या पंगडान १३ ऑगस्ट २०२० दिसा सांजेवेळार ६.५० ते १०.२० मजगतीं सांपळो रचलो. ह्या वेळार सोपुरुची न्लेवेदिम मोझेस ह्या नायजेरियन नागरिकाक दुबावीतपणान भोंवतना ताब्यांत घेवन ताची चवकशी केली. ह्या वेळार ताचे कडेन १ लाख ३२ हजार रुपया किमतीचो ५१० ग्रॅम गांजो आनी ८.१९५ ग्रॅम कोकेन सांपडलो. हे विशीं बायलां उपनिरीक्षक प्रियंका सावंत हांणी दुबावीत सोपुरुची न्लेवेदिम मोझेस हाचे आड गुन्यांव दाखल करून अटक केली. जप्त केल्लो रासायनीक अहवाल सकारात्मक आयिल्लो.
हे विशीं तपास पुराय करून दुबाविता आड न्यायालयांत ९ ऑक्टोबर २०२० दिसा आरोपपत्र दाखल केलें. उपरांत न्यायालयान पुरावे तशेंच रासायनीक अहवालाची दखल घेवन १२ एप्रिल २०२२ दिसा दुबाविता आड आरोप निश्चीत करून खटलो सुरु केलो. हे विशीं २८ जानेवारी २०२५ न्यायालयांत सुनावणी जाली तेन्ना, दुबावीत ड्रग्सची तस्करी केल्ल्याची कबुली दिली. हाची दखल घेवन न्यायालयान ताका दोशी थारायलो. तशेंच ताका कोकेन बाळगिल्ले खातीर साडेचार वर्सांची बंदखण, तर गांजो बाळगिल्ले खातीर एका वर्सांची ख्यास्त दिली. दोनूय ख्यास्ती एकाच वेळार भोगपाचो आदेश जारी केलो. मजगतीं दुबावितान वयली ख्यास्त भोगिल्ल्यान ताची कोलवाळ बंदखणींतल्यान सुटका केली. तशेंच ताका मायदेसांत धाडपाचो निर्देश जारी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
