भांगरभूंय | प्रतिनिधी
गोंयांत 1980 च्या दशकांत वा ताचे पयलीं भ्रश्टाचार जाताले, पूण चडशे सरकारी अधिकारी आपले मर्यादेंत रावताले. उपरांत सगलेंच बदल्लें. जमनींक मोल आयलें, म्हारगाय मळबाक तेंकली, नोकरदारांचो आंकडो नेटान वाडपाक लागलो. सगल्यांच्या हातांत पयसो घोळपाक लागलो, पूण कांय लोक तरीय असंतुश्ट आशिल्ले. संद मेळटा तसो तांणी गैरप्रकार, गैरवेव्हार, भ्रश्टाचार करपाक सुरवात केली. 1990 उपरांत तर थोडे सरकारी अधिकारी लोकांक बुड्डून खावपाक लागले. सरकारी कार्यालयाचें सोंपण चडप्यान अधिकारी, कर्मचाऱ्या खातीर कितें तरी चिरीमिरी व्हरप ही परंपराच जाली. पयशांच्या रुपांत हो भ्रश्टाचार आसतालो. नोकरी करपी वाडले म्हणटकच शेतकार उणे जाले. पोरसां, बागायतींनी राबपी हात ना जाले. परिणाम गोंयकारांनी जमनी विकपाक सुरवात केली. देड – दोन कोटी रुपयांक (त्या काळार) जाण्ट्यांनी घाम गळयिल्ल्यो जमनी विकप आनी वण्टीक पांय लावन सुशेगाद घरांत न्हिदप. म्हालगड्यांच्या जिवार जगपी पिळगी निर्माण जाली. जमीन दुसऱ्याक विकप, ताच्या नांवार करप सुरू जाल्ल्यान सरकारी अधिकाऱ्यांक मोल आयलें. तांचे हात ओले जातकच झटपट सेल डीड, म्युटेशन बी कायदेशीर सोपस्कार जावपाक लागले. हालींच विधानसभेंत हो मुद्दो चर्चेक येवन गेलो.
विरोधी पक्ष फुडारी युरी आलेमांव हांणी दोन म्युटेशनाची म्हायती दिली. तातूंतलें एक आदल्या मुख्यमंत्र्याच्या पुताचें खंय. तें 48 वरांनी जालें. पूण विक्रम केलो तो आसगांव प्रकरणांतल्या म्युटेशनान. तें खंय 24 वरांनी जालें. तेंय बी आयतारा. सगलीं कार्यालयां बंद आसतात ते दिसा. (महसूल मंत्री बाबुश मोन्सेरात हांणी मागीर ते विशीं स्पश्टीकरण केलें. म्युटेशन अर्ज 26 सप्टेंबर 2023 दिसा केल्लो. ताचे आॅनलायन प्रक्रिया जाली. आनी 9 आॅक्टोबराक तें जालें. म्हणल्यार सादारण 12 दिसांनी तें जालें.) पूण लोकांच्या म्हणण्यां प्रमाण, तांची म्युटेशनां जावपाक वर्स ते दोन वर्सां पसून लागतात. वशिल्याच्या मनशांचीं म्युटेशनां जर फटाफट जातात, जाल्यार संबंदीत अधिकाऱ्यांक सोदून तांकां तीं करपाक कोणें सांगलें ताचो तपास जावंक जाय. दोशी आसल्यार तांचेर कारवाय जावंक जाय, अशेंय लोकांक दिसता. खरें म्हणल्यार, असल्या अधिकाऱ्यांक शाबासकी दिवन तांकां सगल्यांचींच कामां फटाफट करपाक सांगपाक जाय. सरकारी कामां अमुकच दिसांनी करपाची फाटीं मुजत घाल्लीं. ती अर्थांत कोणूच पाळीना ती गजाल वेगळी. जमनी संबंदीच्या कामांकूय अशीच मुजत जाय.
आमदार मायकल लोबो हांणी पयर विधानसभेंत तिडकीची प्रतिक्रिया दिली. सेल डीड, म्युटेशन गैरवेव्हारांत कांय मामलेदारुच घुस्पल्यात. तांकां निलंबीतूच न्हय, तर पांय वयर आनी तकली सकयल अशे उरफाटे हुमकळावपाक जाय अशें तांणी म्हणलें. जिल्होधिकारी आनी कांय मामलेदार प्रामाणीकपणान काम करतात, पूण थोडे भ्रश्टाचाराक संवकल्यात. सेलडीड, म्युटेशनाचे गैरवेव्हार चालूच आसात, अशें तांणी सांगलें. एक जापसालदार लोकप्रतिनिधी हें म्हणटा, हाचो अर्थ तातूंत तथ्य आसतलेंच. जमनीं कोणें, कोणाक विकल्यात? विकत घेवपी मनीस कोणाचो सोयरो वा घरचो? जमनीचें सेल डीड, म्युटेशन खंय आनी कोणें कितल्या दिसांनी केलां? ताचेर कोणे चेपण हाडिल्लें काय? तो मनीस कोण? हाची चवकशी करीत जाल्यार जायत्यो गजाली भायर सरतल्यो. दर्यादेग वाठार, शारां लागसारची उपनगरां हांगाच्यान पयलीं चवकशेक सुरवात करची. सरकारान तपास समिती, आयोग बी नेमिल्लो. मागीर परत एकदां ही प्रक्रिया सहज करूं येता. बोगस कागदां करून जमीन विकप, ताच्यो कायदेशीर प्रक्रिया बेकायदेशीर पद्दतीन करप हाचो बुडकुलो फक्त मामलेदार वा हेर अधिकाऱ्यांचेर फोडून चलचो ना. तांकां हें काम करपाक सांगता कोण, हाचो तपास करूंक जाय. चेपण हाडपी ते व्यक्तीक दोशी आसल्यार ख्यास्त जावंक जाय. काम खुबच कठीण, पूण अशक्य न्हय!
आमदार वेन्झी व्हिएगश हांणीय भोवसंख्य पंचायत सचीव पयशे घेतात, असो आरोप करून तांचेर कारवाय जावपाक जाय, अशें सांगलें. लोकां कडेन संबंद आशिल्ले चडश्या अधिकारी, कर्मचाऱ्यांचेर भ्रश्टाचाराचे आरोप जाल्यात. पंचायत सचीवां परस तलाठ्यांचेर चड. अर्थांत ते कितले खरे ताची पुराव्या सयत म्हायती कामां करून घेवप्यांक आसतली. अर्थांत ते जीणभर हाचेर जाहीर उलोवचे नात. कारण पयशे दिवपी आनी ते घेवपी दोगुय तितलेच दोशी आसतात. सध्या जमनींचो प्रस्न चड म्हत्वाचो. जमीन भायल्यांक विकप म्हणल्यार गोंयकारांची वळख, संस्कृताय, भास, मानसिकताय शेणप, साधनसुविधांचेर ताण येवप. जमीन विकप्यांक हें खबर आसतलेंच??
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
