खोस, निरशेणी, सुख, दुख्खाचो दीस

भांगरभूंय | प्रतिनिधी

जात, धर्म, पंथ विसरून सगल्या भारतीयांची सर्वांगी उदरगत आमच्या नव्या सरकाराक करची पडटली. देशाक एक नवी दिशा दिवची पडटली.

अायज लोकसभा वेंचणुकेच्या मतमेजणेचो दीस. कोण जिखतलो, कोण हारतलो, कोणाचें सरकार सत्तेर येतलें तें आयज दनपार मेरेन कळटलें. कोणूय सत्तेर आयलो तरी आमच्या ह्या म्हान लोकशाय देशाक म्हासत्ता करपाचें व्हडलें आव्हान सत्ताधिशांक हातांत घेवचें पडटलें. जात, धर्म, पंथ विसरून सगल्या भारतीयांची सर्वांगी उदरगत आमच्या नव्या सरकाराक करची पडटली. देशाक एक नवी दिशा दिवची पडटली. एक्झीट पोला प्रमाण, भाजपाच्या फुडारपणा खालचे एनडीएचें सरकार तिसरे खेप सत्तेर येतलें. तांकां 350 ते 389 जागे मेळटले. तर इंडी आघाडेक 150 ते 190. म्हणल्यार एनडीए परस सादारण 200 उणे. भाजपा फुडाऱ्यांनी आनी कांय राष्ट्रीय खबरां चॅनलांनी चर्चां वेळार एनडीएक उणेच 400 ते 410 जागे मेळपाचो दावो केला. दुसरे वटेन इंडी फुडाऱ्यांच्या आनी तांच्या समर्थकांच्या मतान इंडी आघाडेक उणेच 295 जागे मेळटले. एनडीएक 200 वा ताचे परस उणें. सकाळीं 8.30 वरां सावन निकाल जाहीर जावपाक लागतले. पुराय देश खबरां चॅनल आनी सोशल मिडिया मुखार आसतलो. सगल्यांचीच उमळशीक वाडल्या.
गोंयांत लोकसभेचे दोन जागे. उत्तर गोंयांत भाजपा वतीन श्रीपाद नायक सवे खेपे वेंचून येतले, अशें चडश्या राजकी जाणकारांक दिसता. पूण, थोड्या जाणकारांच्या मतान, 25 वर्सां एकूच खासदार आशिल्ल्यान मतदार नव्या उमेदवाराक (अॅड. रमाकांत खलप) वेंचून दितले. दक्षीण गोंयांत भाजपाची उमेदवार पल्लवी धेंपो जिखत जाल्यार तो इतिहास थारतलो. कारण आतां मेरेन संयोगिता राणे ही एकूच बायल गोंयची खासदार जाल्या. इंडी आघाडेचे विरियातो फर्नांडीस हांकां जिखपाची चड संद आसा, अशें कांय एक्झीट पोल म्हणटात. उरिल्ल्यांनी गोंयांत 1- 1 जागे दाखयल्यात. पूण भाजपाक खंयचो आनी इंडी आघाडेक खंयचो तें तांणी स्पश्ट करूंक ना. पूण, दोनूय लढटी अटीतटीच्यो म्हणटात तश्यो जातल्यो. चडशे कडेन भाजपाचे (मगोचेय) आमदार आसात. तांची प्रतिश्ठा पणाक लागल्या. उत्तरेंत वाळपय, पर्यें, सांखळी हांगाचे मतदार भाजपा वटेन उबे रावतले अशें राजकी अभ्यासकांक दिसता. लागींच्या दिवचल, मयें मतदारसंघांतूय भाजपाक चड संद आसा. ह्या मतदारसंघांतल्या मतांचेर श्रीपाद नायक सवे खेप दिल्ली वतले काय नात, तें थारतलें. दक्षिणेंत काणकोण, फोंडें, सांगे, वास्को तालुक्यांतल्या मतदारसंघांचेर धेंपो हांचो फुडार अवलंबून आसा. तरीय राजकारणांत कोण जिखतलो तें सांगपाक येना. आरजीचीय निकालांत म्हत्वाची भुमिका आसतली. विधानसभा वेंचणुके वेळार तांकां लागून कांय उमेदवारांक धपको बशिल्लो.
एनडीए जिखून येतली आनी नरेंद्र मोदी तिसरे खेप प्रधानमंत्री जातले अशें सगलेच एक्झीट पोल म्हणटात. तशें जायत जाल्यार ते पं. जवाहरलाल नेहरू हांच्या विक्रमा कडेन बरोबरी करतले. मात, प्रत्यक्ष निकाल कितें लागता, ताचेरुच फुडार थारतलो. बरेच एक्झीट पोल सारके आयल्यात. पूण, 2004 त इंडिया शायनिंग मोहिमे वेळार एनडीए जिखतली अशें सगल्यांकूच दिशिल्लें. मात तशें जालें ना. 240 ते 275 बदला एनडीएक 187 जागे मेळ्ळे. तर काँग्रेस युतीक 216. एनडीएक 2014 त 261 ते 289 जागे मेळटले अशें जाहीर जाल्लें. मात प्रत्यक्षांत 336 जागे मेळ्ळे. काँग्रेसीक फक्त 44. उत्तर प्रदेशांक 2017 त हुमकळटी विधानसभा येतली म्हणटाले. पूण भाजपाक 325 जागे मेळ्ळे. 2015 त दिल्लींत आम आदमी पक्षाक चडांत चड 50 जागे मेळटले असो अदमास आयिल्लो. प्रत्यक्षांत 70 तले 67 मेळ्ळे. सांगपाचो उद्देश प्रत्येक एक्झीट पोल 100 टक्के खरोच येता अशें ना. तरीय तो मतदारांचो कल सांगता. पूण, ह्या एक्झीट पोलाक लागून भाजपा उमेदवारांचो, वावुरप्यांचो आत्मविस्वास बरोच वाडला. काँग्रेस उमेदवार पोलाच्या विरोधांत उलयतात. गोंयांतल्या भाजपा, इंडी आघाडेच्या मेळून चारुय उमेदवारांनी आपलें जैत निश्चीत अशें पयरूच सांगलां. सकाळीं 8 क आल्तिनो वयल्या सरकारी तंत्रनिकेतनांत, जाल्यार मडगांवां दामोदर म्हाविद्यालयांत मतमेजणेक सुरवात जातली. उमेदवारां वांगडाच पक्षांच्या मुखेल वावुरप्यांक निकालाची चड उत्सुकताय आसतली. कारण, तो तांचोय फुडार थारावपी आसतलो.
निकाल कितेंय लागलो तरी सगल्यांनी तो मानून घेवंक जाय. थोडे आयज खोशेन नाचतले, उमेदी जातले. थोडे उदास, दुख्खी जातले. पूण, जैत आनी हार ही आसताच. जैत मेळिल्ल्यांनी तें तकलेक मारून घेवचें न्हय आनी हारिल्ल्यांनी निरशेवचें न्हय. तशें जाल्यारुच आमची लोकशाय आनीक चड घटमूट जातली.