भांगरभूंय | प्रतिनिधी
भारतीय दर्यादेग दळाची तोखणायेची कामगिरीवास्कोः खोल दर्यांत गंभीर जखमी जाल्ल्या इराणी नुस्तेमारी बोटीच्या कामगाराक भारतीय दर्यादेग दळान गोंय वैजकी म्हाविद्यालय हॉस्पिटलांत वैजकी उपचारा खातीर दाखल केल्या.
इराणी नुस्तेमारी बोटींतल्या धो अल-ओवेस वयल्या बोटींतल्या कामगाराक इंजिनांत इंधन भरतना स्फोट जाल्ल्यान ताच्या दोनूय दोळ्यांक गंभीर दुखापत जाली. ही घडणूक 28 ऑक्टोबराक भारतीय दर्यादेगे वयल्यान सुमार 1,500 किमि. अंतराचेर खोल दर्यांत घडिल्ली. ह्या प्रकरणांत चाबहार दर्या वेल्या बचाव समन्वय केंद्रान बोटीचेर आणीबाणीची म्हायती मुंबय केंद्राक दिली. जखमी कामगाराची आनी बोटीचें इंजिनांत इबाड जाल्ल्याची म्हायती मेळ्ळ्या उपरांत मुंबय केंद्रान कारवाय सुरू केली. केंद्रान बोटी लागसार आशिल्ल्या एसटीआय ग्रेसाक मजत करपाक धाडली. त्याच वेळार उदेंत आफ्रिकेंतल्या देशांतल्यान भारतीय कोस्ट गार्डाची गस्त घालपी बोट परतून येताली. त्या गस्त बोट मजती खातीर थंय घुंवडायली. ग्रेस तारवटी इराणी नुस्तेमारी बोटी लागसार आशिल्लें आनी कामगाराक मुळाव्या वैजकी उपचारा खातीर बोटीचेर व्हेलो. पूण दर्याचे खर परिस्थितीक लागून सचेत थंय वचून त्या कामगाराक फुडल्या उपचारा खातीर बोटीचेर व्हेलो. प्रवासांत 29 ऑक्टोबराक कामगाराची भलायकी गंभीर जाल्ल्यान ताका नौदळाच्या हेलिकॉप्टरान हाडपाचें थारायलें. ते प्रमाण हेलिकॉप्टरान जखमी कामगाराक गोंय सावन 180 किमी अंतराचेर दर्यांत आशिल्ल्या सचेत बोटीतल्यान उखलून व्हेलो. 30 ऑक्टोबराक दनपारां 12 वरांचेर उल्लेख केल्लें हेलिकॉप्टर जखमी कामगारा वांगडा देंवलें. थंयच्यान ताका फुडल्या उपचारा खातीर गोंय वैजकी म्हाविद्यालय हॉस्पिटलांत व्हेलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
