भांगरभूंय | प्रतिनिधी
म्हापशें: खोर्ली, म्हापश्यां काणका बायपास रस्त्याचे कुशीच्या व्हाळांत 40 ते 45 पिराये गटांतल्या अनवळखी तरणाट्याची कूड सांपडली. पुलिसांनी उजो पालोवपी दळाच्या पालवान कूड भायर काडून मरणा उपरांतचे तपासणे खातीर गोमॅकाँत धाडून दिल्या.
आयतारा सांजवेळा 5.45 वरांच्या सुमाराक हो प्रकार उक्तडार आयलो. खोर्ली दोंगरा वयल्यान बोडगिणी ते म्हापशें न्हंयेक जोडपी ह्या व्हाळांतल्या बायपास रस्त्याच्या सांकवाक ही कूड आडकून उरिल्ली. ताचेर व्हांवन गेल्लो कोयर आशिल्लो.
ही कूड थळाव्यांचे नदरेक येतकूच घडणुकेची म्हायती म्हापशें पुलिसांक दिली. ह्या कुडीच्या आंगार जखमांच्यो कांय खुणो आसून ही कूड व्हांवत येवन सांकवाचे कडेक आडकल्ली. म्हापशें पुलिसांनी असैमीक कूड म्हूण हें प्रकरण नोंद केलां. मरणा उपरांतचे तपासणे उपरांतच्या अहवाला उपरांत मयताच्या मरणाचें कारण स्पश्ट जातलें. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
