भांगरभूंय | प्रतिनिधी
म्हापशेंः खोर्ले – मळार रेल्वे पुला लागसार पोरण्यां गोंय पुलिसांची धाड घालून 2.35 लाखांचो 2.35 किल गांजो जप्त केलो. ह्या प्रकरणांत दुबावित नीरजकुमार अरूणकुमार सिंग (38, माशेल, मुळ हसपुरा-बिहार) आनी उपेंद्र धुपसागर राम (40, आमोण्यां, मुळ जलापूर बिहार) हांकां अटक केल्या.
25 तारखेर, शुक्रारा रातीं पुलिसांनी ही कारवाय केली. मळार रेल्वे पुला लागसार ड्रग्साची तस्करी जाता अशी म्हायती खबरी कडल्यान पोरण्यां गोंय पुलिसांक मेळिल्ली. ते प्रमाण पुलीस निरिक्षक सतीश पडवळकार हांच्या मार्गदर्शना खाला उपनिरिक्षक साईश भंडारी आनी दीप्तराज गावडे हांणी घडणुकेच्या थळार सापळो घालो.
दुबावीत घडणुकेच्या सुवातेर पावतकच पुलीस पंगडान ताका ताब्यांत घेतलो. सोद घेतना दुबावीत नीरज कुमार सिंगाकडेन 1.20 किल गांजो आनी उपेंद्र राम हाचे कडेन 1.15 किल गांजो मेळ्ळो. ह्या गांजाचे मोल आंतरराष्ट्रीय बाजारांत 2 लाख 35 हजार रुपया आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
