भांगरभूंय | प्रतिनिधी
पणजीः धुळापी- खोर्लेच्या रवळनाथ देवळाच्या दोन गटांचो वाद शुक्रारा मामलेदार कचेरेंत पावलो. देवळाचो विशय न्यायालयांत प्रलंबीत आसतना लेगीत नवहिंदू गटाक देवळाची चावी दिल्ल्याचो आरोप करीत थळाव्यांच्या एका गटान मामलेदार कचेरेंत घेराव घालून जाब विचारलो.
कांय दीस पयलीं खोर्लेच्या रवळनाथ देवळांत पुजेच्या मानावेल्यान नवहिंदू गट आनी थळाव्यांच्या एका गटा मदीं वाद निर्माण जाल्लो. देखून मामलेदारान दोनाय गटांचेर निर्बंध घालून देवळांक कुलूप मारिल्लें. मात नवहिंदू गटाच्या एका वांगड्यान देवूळ उक्तें केल्ल्याचो आरोप करून थळाव्यांच्या दुसर्या गटान मामलेदाराक जाब विचारपा खातीर मामलेदार कचेरेंत घेराव घालो.
नवहिंदू गट बेकायदो गजाली करतात, ते समितीचे वांगडी वा जल्मी नात. तांणी जबरदस्ती कब्जो करून दवरला, असो गंभीर आरोप एका थळाव्यान केलो.
रवळनाथाच्या देवळाक १५० वर्सां जावन गेलीं. कायद्या प्रमाण थंयसर एकलोच जल्मी पुजा करता. मात सरकारान वेंचिल्ले तात्पुरते समितीक आनी जल्मींक विचारी नासतना मामलेदारान रातच्या रातीं तलाठ्यांक सांगून नवहिंदू गटाक चावी दिता. देवस्थानांत कोणाकूच हक्क ना. मामेलदारान काडिल्ले आदेश आमकां मान्य आसा. मात मामलेदार आपलोच आदेश भायरायत तांकां व्हरून चावी दिता आनी त्या चावयेचे मजतीन नवहिंदू गटान जबरदस्तीन देवूळ उक्तें करून देवाची पुजा सुरू केल्या, असो आरोप थळाव्यांनी केला.
मामलेदारान दोन दिसां पयलीं समितीक आनी जल्मीक सांग नासतना देवळाचें कुलूप मोडून चावी आनी कुलूप बदल्लले. आमी हे विशीं पुलिशेंत कागाळ केले उपरांत आपली चुक लिपोवपा खातीर एक चावी जल्मी आनी दुसरी चावी आपल्या ताब्यांत दवरली आनी आपल्या ताब्यांतली चावी दुसर्या गटाक दिली. तातूंतल्या एक वांगड्यान जल्मी येवचे पयलींच येवन देवूळ उक्तें करून पुजा केली, अशी कागाळ थळाव्यांनी केली.
मामलेदाराक आमी हे विशीं जाब विचारल्यार तो आमकां न्यायालयांत वचपाक सांगता. पयशे, भांगरा वस्ती आनी ताबो देवळाची जी समिती बरखास्त जाल्या तांचे कडेन आसा. ज्या लोकांनी हें देऊळ उक्तें केलां तांकां अटक करून आमकां न्याय दिवचो, अशी मागणी थळाव्यांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
