भांगरभूंय | प्रतिनिधी
पालिकेन केलो रस्तो येरादारी खातीर बंद
भांगरभूंय । प्रतिनिधी
म्हापशें: खोर्लेचो पोरणो सांकव नेमिल्ल्यान तो येरादारी खातीर म्हापशें पालिकेन बंद केला. ते भायर नेमिल्ल्या सांकवाचेर व्हड फोंडकूल पडलां.
आयतारा सकाळीं पडिल्ल्या पावसाक लागून पोरणो जाल्लो सांकव नेमलो आनी ताचेर व्हड फोंडकूल पडलें. बर्डे हांच्या घरा कुशीचो हो सांकव तारानगर आनी सारस्वत विद्यालय वाठाराक जोडटा.
हो सांकव सुमार चार ते पांच दसकां आदलो. ताचे फातर हे आदींच व्हाळांत पडल्यात. मान्सूनपूर्व नितळसाणी वेळार पालिकेचे नदरेक ही गजाल आयिल्ली.
घडणुकेची म्हायती मेळटाच नगराध्यक्ष प्रिया मिशाळ, उपनगराध्यक्ष विराज फडके, नगरसेविका शुभांगी वायंगणकार हांणी पालिकेच्या अभियंत्यां सयत घडणुकेचे सुवातेक भेट दिवन पळोवणी केली. ह्या वेळार थळावे संजय बर्डे आनी हेर लोक हाजीर आशिल्ले.
स्थितीची पळोवणी करून पालिकेन हो रस्तो येरादारी खातीर बंद दवरला. दोनूय वटांनी फातर दवरून रस्तो आडायला. मजगतीं, हो सांकव पोरणो जावन कोसळपाचे स्थितींत आशिल्ल्याचें हालींच पालिकेचे नदरेक आयिल्लें. तरी लेगीत पालिकेन कसलीच कार्यवाही करूंक ना. वेळ बरो म्हूण कसलीच दुर्घटणा जावंक ना. पालिकेच्या घाळपणाचेर थळाव्या लोकांनी नाराजी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
