भांगरभूंय | प्रतिनिधी
सांकवाचें उक्तावण; वेळा आदीं काम पुराय
भांगरभूंय । प्रतिनिधी
म्हापशें: खोर्ली म्हापशेंच्या उसपकार जंक्शन मार्ग येरादारी खातीर उक्ता जालो. पुनर्बांदकाम केल्ल्या ह्या रस्त्या वयल्या सांकवाचें उपसभापती ज्योशुआ डिसोझा हांचे हस्तुकीं उक्तावण जालें.
ह्या वेळार नगराध्यक्ष प्रिया मिशाळ, उपनगराध्यक्ष विराज फडके, हेर नगरसेवक आनी अधिकारी वर्ग हाजीर आशिल्लो. फाटलो म्हयनोभर आसगांव, वागातोर, हणजूणें दिशेन वचपी हो रस्तो सांकवाच्या बांदकामा खातीर बंद केल्लो.
घाटेश्वरनगर ते हुतात्मा चौक मेरेनच्या रस्त्याचें हॉटमिक्सींग 90 लाख मंजूर जाल्ले. त्याच निधींतले 20 लाख मोडून सांकवाचें काम केलां. हें काम करपाक तीन म्हयन्यांचो काळ आशिल्लो, पूण 28 दिसांनीच हें काम पुराय करून रस्तो येरादारी खातीर उक्तो केला, अशें उपसभापती डिसोझा हांणी सांगलें.
थळाव्या लोकांच्या आदाराक लागून हें काम वेळा आदीं पुराय जावपाक शकलें. पावसाळ्यांत ह्या वाठारांत एकसारकें उदक सांचतालें. ह्या वाठारांत जावपी हुवारा सारकी परिस्थितीची दखल घेवन ह्या सांकवाचें बांदकाम केलां. हाका लागून प्रभाग 17 आनी 18 तल्या लोकांक थाकाय मेळटली, असो विस्वास उपसभापती डिसोझा हांणी उक्तायलो. मजगतीं, कंत्राटदार रुपेश पांगम, कार्यकारी अभियंते सुभाष बेळगांवकार, सहाय्यक अभियंते महेश शेट्टी तशेंच पुराय पंगडाची उपसभापती डिसोझा हांणी तोखणाय केली.
रवींद्र भवना खातीर जमीन मेळ्ळीः ज्योशुआ
रवींद्र भवना खातीर आमी बार्देसांत जमीन पळयल्या. कला आनी संस्कृती मंत्री गोविंद गावडे ह्या रवींद्र भवना खातीर इत्सूक आसा. कुचेली कोमुनिदादीन बार्देस रवींद्र भवना खातीर आपली जमीन दिवपाची तयारी दाखयल्या. रोखडीच मंत्री गावडे हांचे वांगडा ते जमनीची पळोवणी करतले, अशें उपसभापती ज्योशुआ डिसोझा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
