खोर्जुवें जमीन हडप; दोगांक अटक

भांगरभूंय | प्रतिनिधी

सत्र न्यायालयान जामीन न्हयकारले उपरांत पुलिसांची कारवाय

भांगरभूंय । प्रतिनिधी

म्हापशें : खोर्जुवें, बार्देसचे अनंत नारायण कामत हांचे बनावट मृत्युपत्र आनी बोगस कागदपत्रां तयार करप आनी वारसदारांचो विस्वासघात तशेंच फटवणूक करून तांची हजारांनी चौखण मिटर जमीन कटकारस्थान करून हजप केल्ल्या प्रकरणांत दुबावीत देविदास गोपीनाथ पणजीकार आनी वामन श्रीधर पोळे हांकां म्हापशें पुलिसांनी अटक केली.

दुबावितांचो जामीन अर्ज 28 जुलयाक मेरशी न्यायालय संकुलांतली अतिरिक्त सत्र न्यायाधीश क्षमा जोशी हांणी भायर मारिल्लो. ते उपरांत पुलिसांनी बिरेस्तारा 31 जुलयाक वयल्या दोनूय दुबावितांक अटक केली. जाल्यार जामीन न्हयकारिल्ल्या हेर दुबावितांचो पुलीस सोद घेतात.

दुबावीत वामन पोळे, देविदास पणजीकार हांचे सयत सुहासिनी सुहास पडवळ, प्रकाश वासुदेव म्हांबरे, विशांत रामचंद्र कामत (जमीन ब्रोकर, रा. मडगांव), रामजी बु्ध्दू गुप्ता (नोटरी, रा. वडाला मुंबय) आनी प्रदीप कुमार पाठक (वकील, रा. वडाला महाराष्ट्र) हांचो ह्या प्रकरणांत न्यायालयान जामीन अर्ज भायर मारला.

मजगतीं, ह्या प्रकरणांत रिचा रूपेश शिरोडकार (रा. पत्रादेवी- तोरशें), शैलेश श्रीकृष्ण म्हांबरे (क्रांतीनगर- आल्तो पर्वरी), राजेश वसंत शिरोडकार, रिया राजेश शिरोडकार, रूपेश वसंत शिरोडकार, निलेश वसंत शिरोडकार, नेहा निलेश शिरोडकार, (रा. पत्रादेवी- तोरशें), राधाकृष्ण दत्ताराम शेटये, शुभांगी राधाकृष्ण शेटये (रा. तोरशें – पेडणें), विजय काशिनाथ मंत्री, विजया विजय मंत्री (रा. आरवली- सिंधुदुर्ग), वामन वासुदेव म्हांबरे, स्मिता वामन म्हांबरे (रा. सोनारभाट साळगांव), प्रिया कृष्णा पै, कृष्णा विश्वनाथ पै (रा. भोम माशेल), संध्या शैलेश म्हांबरे, सुगंधा श्रीकृष्ण म्हांबरे (रा. क्रांतीनगर पर्वरी) हांणी पुलिशेंत कागाळ दाखल केल्या.

जमीन हडप प्रकरणाचो हो प्रकार नोव्हेंबर 2024 आदीं घडला. कागाळदाराचे वारसदार आशिल्लो पोडवाळ- खोर्जुवेंचे अनंत कामत हें मे 2021 जाल्यार तांची घरकान्न प्रभावती अनंत कामत जून 2009 त भायर पडल्या. तांकां भुरगें बाळ ना. तशेंच अनंत कामत हाचो आंकवार भाव लेगीत भायर पडला. ताका लग्न करून दिल्ल्यो तीन भयणीं आसात. कामत जोडप्यान आपले स्थावर आनी जंगम मालमत्ते संबंदांत मृत्यूपत्र तयार करूंक नाशिल्लें. वयल्या दुबावितांनी अनंत कामत हांचें बनावट मृत्यूपत्र आनी बोगस दस्तावेज तयार करून सर्व्हे नं. 52/0, 51/3, 50/7, 100/7, 100/1, 53/8, 55/8, 55/9, 28/1(पार्ट), 140/1(पार्ट) तले हजारांनी चौखण मिटर जमनीचें म्युटेशन करून ही जमीन हडप केल्या.

हें बनावट मृत्यूपत्र मुंबयचे नोटरी दुबावीत आर. बी. गुप्ता आनी अ‍ॅड. पी. के पाठक हांच्या बऱ्यापणान दुबावितांनी मुंबयंत तयार केल्ल्याचें दिसून आयिल्ल्यान वयलो नोटरी आनी वकिलाची ह्या प्रकरणांत चवकशी करची, अशें फिर्यादींनी कागाळेंत नमूद केल्लें. हे कागाळेच्या आदारान म्हापशें पुलिसांनी मार्च 2025 त वयल्या दुबावितां आड भा.न्या.सं.च्या 319(2), 336(3), 338, 340(2) आनी 318(4) कलमां खाला गुन्यांव नोंद केल्लो. पुलीस फुडलो तपास करतात.