भांगरभूंय | प्रतिनिधी
मानशेचीं दारां मोडिल्ल्यान उदकाक वाट, शेतकारांक लुकसाण
भांगरभूंय । प्रतिनिधी
म्हापशें: खोर्जुवेंच्या आसनय मानशेचीं दारां मोडिल्ल्यान न्हंयेचें खारें उदक शेंकड्यांनी हॅक्टर शेतांनी तशेंच बांयांनी भरलां. हाचो मार शेतकारांक तशेंच थळाव्या लोकांक बसला. हे समस्ये कडेन शेतकी तशेंच महसूल अधिकाऱ्यांनी लक्ष दिवचें, अशी मागणी लुकसाण पिडेस्त शेतकारांनी केल्या.
हालींच उसकय आनी मयडेंच्या शेतकारांक अशेच समस्येक फुडो करचो पडिल्लो. खोर्जुवेंच्या खाजन शेतजमनीचे मानशेची दारां पेड्डेर जावन ती मोडल्यांत. ताका लागून न्हंयेचें खारें उदक शेतांनी घुसलां. हाका लागून पुराय शेत लागवड पेड्डेर जाल्या. जाल्यार उरिल्ले जमनीर शेतकारांक शेतां ओंपपाक मेळना. तेचवरी बांयच्या उदकांत लेगीत खारें उदक मिसळिल्ल्यान तें पिवपाक योग्य ना. मानशेचीं दारां मोडून व्हांवून गेल्ल्यान खरीप आनी वायंगण शेत लावप कुस्तार जालां, अशी म्हायती शेतकारांनी दिल्या.
शेतकार दीपाली पाळणी हांणी सांगलें, आमी अंदूं हळसांदे लायिल्ले. मात खारें उदक शेतांत घुशिल्ल्यान तें पीक पेड्डेर जालां. फाटल्या दोन वर्सां सावन मोडिल्ल्या दारांक लागून आमकां लुकसाण सोंसचें पडटा. कांय काळा आदीं तीं दारां दुरुस्त केल्लीं, पूण आतां तीं परतून मोडिल्ल्यान मामलेदारान लक्ष घालून तीं दुरुस्त करची, अशी तांणी मागणी केल्या.
मजगतीं, मेळिल्ले म्हायती प्रमाण खोर्जुवेंच्या आसनय खाजन कूळ शेतकार संघटणेची समिती सक्रीय ना. ताका लागून मानशेच्या दारांची कुयदाद सारकी जायना. ते खातीर संघटणेची नवी समिती नेमपाची गरज आसा. प्रशासकीय यंत्रणा लेगीत ताचे कडेन आडनदर करता.
हळदोणेंचे आमदार अॅड. कार्लोस फेरेरा हांणी हे संबंदांत उलयतना सांगलें, ही समस्या थळाव्या शेतकारांनी आपले कडेन मांडल्या. तशेंच विवीध वाठारांनी कूळ शेतकार संघटणा निश्क्रीय आसात. ह्यो संघटणा जिवीत दवरचे खातीर मामलेदारा कडेन प्रत्यक्ष शेतकारांचीं नांवां नोंद करपाची गरज आसा. मानशेची पावणी जाता, पूण पावणी घेवप्या कडल्यान मानशेची देखभाल जायना. हे मुद्दे आपूण विधानसभा अधिवेशनांत मांडटलों. गोंय मुक्ती आदीं आमच्या पुर्वजा कडल्यान मानशेचीं दारां, बांद आनी शेतांचो सांबाळ तशेंच राखण जाताली. ताका लागून पीक लेगीत बरें मेळटालें. आतां आमी खंय चुकल्यात, हाचो विचार सगळ्यांनीच करपाक जाय, अशें अॅड. फेरेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
