भांगरभूंय | प्रतिनिधी
म्हापशें ः खोर्जुवें, बार्देसच्या स. अनंत नारायण कामत हांचें बनावट मरणाचें पत्र आनी बोगस कागदपत्रां तयार करप आनी वारसदारांचो विस्वासघात आनी फटींगपणां करून तांची हजारांनी चौ. मी. जमिन कटकारस्थानान हडप केल्ल्या प्रकरणांत दुबावीत देविदास गोपीनाथ पणजीकर आनी वामन श्रीधर पोळे हांकां म्हापशें पुलिसांनी अटक केली.
दुबाविताचो जामीन अर्ज २८ जुलयाक मेरशी न्यायालय संकुलांतले अतिरीक्त सत्र न्यायाधीश क्षमा जोशी हांणी भायर मारलो. उपरांत पुलिसांनी बिरेस्तारा ३१ जुलयाक वयर नांवां दिल्ल्या दोनूय दुबावितांक अटक केली. जाल्यार जामीन भायर मारिल्ल्या हेर दुबावितांचो सोद पुलीस घेतात.
दुबावीत वामन पोळे, देविदास पणजीकार हांचे सयत सुहासिनी सुहास पडवळ, प्रकाश वासुदेव महांबरे, विशांत रामचंद्र कामत (जमीन ब्रोकर, रा. मडगांव), रामजी बु्ध्दू गुप्ता (नोटरी, रा. वडाला मुंबय) आनी प्रदीप कुमार पाठक (वकिल, रा. वडाला महाराष्ट्र) हांचो न्यायालयान ह्या प्रकरणांतलो जामीन अर्ज भायर मारला.
मजगतीं, ह्या प्रकरणांत रिचा रूपेश शिरोडकार (रा. पत्रादेवी- तोरसे), शैलेश श्रीकृष्ण महांबरे (क्रांतीनगर- आल्तो पर्वरी), राजेश वसंत शिरोडकार, रिया राजेश शिरोडकार, रूपेश वसंत शिरोडकार, निलेश वसंत शिरोडकार, नेहा निलेश शिरोडकार, (रा. पत्रादेवी- तोरसे), राधाकृष्ण दत्ताराम शेटये, शुभांगी राधाकृष्ण शेटये (रा. तोरसे – पेडणे), विजय काशिनाथ मंत्री, विजया विजय मंत्री (रा. आरवली- सिंधुदुर्ग), वामन वासुदेव महांबरे, स्मिता वामन महांबरे (रा. सोनारभाट साळगाव), प्रिया कृष्णा पै, कृष्णा विश्वनाथ पै (रा. भोम माशेल), संध्या शैलेश महांबरे, सुगंधा श्रीकृष्ण महांबरे (रा. क्रांतीनगर पर्वरी) हांणी पुलिशेंत कागाळ केल्या.
हो जमीन हडप प्रकरणाचो प्रकार नोव्हेंबर २०२४ पयलीं घडला. कागाळदारांचे वारसदार आशिल्ले पोडवाळ- खोर्जुवेंच्या मरण आयिल्ले अनंत कामत हांकां मे २०२१ वर्सा जाल्यार तांची घरकान्न प्रभावती अनंत कामत हांकां जून २००९ वर्सा मरण आयिल्लें. ह्या मरण आयिल्ल्या जोडप्याक भुरगीं नाशिल्लीं. तशेंच अनंत कामत हांच्या आंकवार भावाकूय मरण आयलां. जाल्यार तांच्यो तीग भयणी लग्न जाल्यात. कामत जोडप्यान आपले मालमत्ते संबंदीं मरणपत्र तयार करूंक नाशिल्लें.
तरी दुबावितांनी मरण आयिल्ल्या अनंत कामत हांचें बनावट मरणपत्र आनी बोगस दस्तावेज तयार करून सर्वे क्रमांक ५२/०, ५१/३, ५०/७, १००/७, १००/१, ५३/८, ५५/८, ५५/९, २८/१(पार्ट), १४०/१(पार्ट) तले हजारांनी चौ. मीटर जमिनीचें म्युटेशन करून ही जमीन बळकायली.
हें बनावट मरणपत्र मुंबयच्या नोटरी आर.बी. गुप्ता आनी ऍड. पी. के पाठक हांच्या संगनमतान दुबावितांनी मुंबय तयार केल्ल्याचें कळिल्ल्यान वयली नोटरी आनी वकिलाची ह्या प्रकरणांत चवकशी करची, अशें फिर्यादींनी कागाळींत नमूद केलां.
हे कागाळीच्या आदारार म्हापशें पुलिसांनी फाटल्या मार्च २०२५ वर्सा वयल्या दुबावितां आड भा.न्या.सं.च्या ३१९(२), ३३६(३), ३३८, ३४०(२) आनी ३१८(४) कलमा खाला गुन्यांव नोंद केला. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
