भांगरभूंय | प्रतिनिधी
भांगरभूंय । प्रतिनिधी
म्हापशेंः खोब्रावाडो- कळंगुटे हांगा मोडून वडयल्ल्या 200 वर्सां आदीच्या वडाचें येता त्या पंदरा दिसांत पुनर्रोपम करपाची मागणी पर्यावरण मोगी आनी थळाव्या लोकांनी केल्या. ना जाल्यार न्यायालयांत वचपाची शिटकावणी तांणी संबंदितांक दिल्या. फाटल्या सोमारा वडाच्या संवर्धना खातीर कळंगुटे मतदारसंघ मंचा वतीन जाग्रुताय सभा आयोजीत केल्ले. त्या वेळार मनीस माळ तयार करून संबंदीत बिल्डर आनी प्रशासनाचो लोकांनी खर निशेध केलो.
वड मोडून वडोवपाचो प्रकार पंदरा दिसां पयलीं जाल्लो. जे सुवातेर व्हो वड आसा थंय दोन प्रकल्प उबारतात. ताका लागून वड मोडला असो थळाव्यांचो आरोप आसा. जे कोणे हें काम केलां ताचेर कारवाय करपाची मागणी सभेत लोकांनी केल्या, मतदारसंघ मंचाचो संयोजक प्रेमानंद दिवकारान घडणुकेची म्हायती दितना सांगलें की 4 जूनाक व्हो वड कोसळून पडलो. मुळा कडली माती काडिल्ल्यान तो सकल पडलो असो तांचो दावो आसा.
दोंगोर पोखरप, शेत जमनींत अतिक्रमण करून भराव घालप, पोरणी झाडां मारप हे आतां सदचें जालां. पर्यावरण मोगी आनी थळाव्या लोकांनी एकठांय येवंन हे बेकायदेशीर प्रकार थांबोवपाक जाय अशें पर्यावरण मोगी प्रा. प्रजल साखरदांडेन सांगले. गोंय सरकारान म्हादय वोगडायल्या, आतां झाडांची कत्तल करपाक सरकार फुडें सरता. वड कापपाचो जो प्रकार जाला ताका सरकार, प्रशासकीय अधिकारी जापसालदार आसात असो आरोप तनुज अडवलपालकारान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
