भांगरभूंय | प्रतिनिधी
नाल्लाचें म्हणल्यार खोबरेल तेल आमकां सगळ्यांक खबर आसा. आमी दर दिसा ताचो वापर केंसांक लावपाक करतात. पूण हें तेल फकत केंसांकूच फायद्याचें न्हय, ताचे हेर जायते उपेगूय आसात. फकत केंसांक नाल्लाचें तेल वापरतात जाल्यार ताचे हेर जायते फायदे तुमकां जायनात. खोबरेल तेलाचे हेर म्हत्वाचे उपेग जाणून घेवया…
ओंठां खातीर बरें
तुमचे ओंठ काळे पडल्यात वा फुटल्यात जाल्यार दिसांतल्यान उण्यांत उणें दोन फावटीं, रातच्या वेळार न्हिदेच्या आदीं आनी सकाळीं उठटना खोबरेल ओंठाचेर लावचें. हाचो फायदो जातलो.
बरो मेकअप रिमूव्हर
तोंडाचो मेकअप काडपाक खोबरेल तेल सगळ्यांत बरें. मेकअप करतना आमी जायतीं प्रसाधनां वापरतात. पूण हो मेकअप सारको काडलो ना जाल्यार तोंडार फोड, पुळेर येवं शकता. देखून मेकअप काडपा खातीर खोबरेल हो सगळ्यांत बरो पर्याय. ताचें पोशक तत्व मेकअपाक लागून खरखरीत जाल्ली सुकी कात मोवूय करता.
हाताच्या कोपरा वयले दाग काडप
परत परत आडनदर जाल्ल्यान हाताच्या कोपरांचेर काळो थर तयार जाता वा तो काळो जाता. ताका बारीक पुरेळ कसो येता. हें काडपाक अर्द चमचो खोबरेल अर्द लिंबाच्या रोसांत घालून हाताच्या कोपराक आनी हेर दाग आशिल्ल्या जाग्यांचेर तें मिश्रण लावचें.
खोटांक फटीं पडटात
खोटांक फटी, भेगो पडल्यात जाल्यार रातीं न्हिदचे पयलीं पेट्रोलियम जेली भरसून केल्ल्या खोबरेल तेलान मालिश केल्यार फायद्याचें थारता. सकाळीं हुळहुळीत उदकान पांय निवळ करात.
न्हांवचे पयलीं आंगाक खोबरेल लावचें.
जायत्या जाणांक न्हाले उपरांत आंगाक खाज येता. तांणी खोबरेल तेल मात्शें हुन करून न्हांवचे पयलीं मालिश करचें. उपरांत उटणें लावन न्हांवचें. कांय दीस तशें केल्यार आंगाक खाज येवची ना. खोबरेल तेलांत कापूर भरसून कातीचेर लावप लेगीत फायद्याचें थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
