भांगरभूंय | प्रतिनिधी
काश्मिरी तरणाटो गरज नासतना बदनाम
काणकोण: आवळी खोतीगांव इश्टाच्या घरा जेवण करून परततना मणे हांगा दुसर्या एका मनशा वांगडा जाल्ल्या वादा उपरांत प्रकरण हाता भायर गेल्ल्यान काणकोण पुलिसांनी खोतीगांव आवळीच्या प्रदिप मोनो गांवकार, नितेश कृष्णा गांवकार, सुरेश मोनो गांवकार तशेंच हिमाचल प्रदेशच्या सचीन संजीव शर्मा आनी मध्य प्रदेशच्या रमेश गणपत रायकार ह्या तरणाट्यांक ताब्यात घेतले.
मजगतीं, एका चॅनलान ब्रेकिंगन्यूज करतना ह्या झगड्यांत काश्मीरी मनीस वांटेकार आशिल्ल्याचो उल्लेख केल्ल्यान थंय कांय वेळ तणावाचें वातावरण जालें. निमाणें काणकोणच्या पत्रकारांनी पुलीस स्टेशनाचेर वचून चवकशी केली तेन्ना हातूंत काश्मिरी मनशाचो कांयच हात नाशिल्ल्याचें स्पश्ट जालें.
मजगतीं, पर्यटन वेवसायांत आशिल्ले गोवा फॉरवर्ड पार्टीच्या पर्यावरण विभागाचे मुखेली विकास भगत हांणी काणकोण पुलीस स्टेशनाक भेट दिवन प्रकरण समजून घेतलें. ह्या झगड्यांत काश्मिरी मनीस वांटेकार नाशिल्ल्याचें तांकां पुलिसां कडल्यान कळ्ळें.
पहलगामचे घडणुकेक लागून देशांत कांय प्रमाणांत वातावरण इबाडलां. पर्यटनाचेर हाचो परिणाम जाल्ल्याचें सांगून ज्या मणे हांगच्या मनशान कायदो हातांत घेवपाचो यत्न केलो, ताकाय काणकोण पुलिसांनी ताब्यांत घेवचो अशी मागणी भगत हांणी केली.
निमाणें काणकोण पुलिसांनी ज्या पाच तरणाट्यांक ताब्यांत घेतिल्ले तांतल्या थळाव्या तिगां तरणाट्यांक कांय कायदेशीर सोपस्कार करुन सोडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
