खोतीगांवच्या लोकांचें पासियेंस पळोवचें न्हय

भांगरभूंय | प्रतिनिधी

जागरूक नागरीक संघटणेची रान खात्याक शिटकावणी

भांगरभूंय । प्रतिनिधी

काणकोण : काणकोण म्हालांतल्या पिंपळामळ खोतीगांवच्या रस्त्या कुशीक रान खात्यान तपासणी नाक्या खातीर बांदकाम सुरू केलां. ह्या बांदकामाक थळाव्या लोकांनी विरोध केला. पूण हें काम अजून लेगीत चालूच आसा. रान खात्यान खोतीगांवच्या लोकांचें पासियेंस पळोवचें न्हय, अशी शिटकावणी काणकोणच्या जागरूक नागरीक संघटणेन पत्रकार परिशदेंत दिल्या.

पत्रकार परिशदेक संघटणेचे सचीव कल्पेश गांवकार, पदाधिकारी भिवा गांवकार, गजानन वेळीप, शाबू गांवकार, नागेश गांवकार, दिलखुश गांवकार, दयानंद फळदेसाय, केशव गांवकार, कृष्णा गांवकार हाजीर आशिल्ले.

एका लोकप्रतिनिधीन आरोप करतना म्हणिल्लें, जे लोक तपासणी नाक्याक विरोध करतात तातूंतल्या कांय लोकांचो लांकडांचेर दोळो आसा. हो आरोप खोडून काडटना भिवा गांवकार हांणी त्या लोकप्रतिनिधीच्या विधानाचो निशेध केलो.

रान खाच्याचे पर्तगाळ, भाटपाल आनी आंबेघाट वाठारांत तपासणी नाके आसात. अशें आसतना लांकडाची चोरी कशी कितें जावं येता, असो प्रस्न कल्पेश गांवकार हांणी उपस्थीत केलो.

गांवांतलो एक कंत्राटदार ट्रक भरून लांकडां हाडटा, अशी कारणां रान अधिकारी दितात, पूण खोतीगांवांतले लोक जळवा खातीर सुक्या लांकडांचो वापर करता, अशें शाबू गांवकार आनी नागेश गांवकार हांणी सांगलें.

रानखातें रान संरक्षम आनी रान संवर्धनाचें काम करिनासतना फकत कायद्याचेर बोट दवरून लोकांक सतयतात, असो आरोप संघटणेन केलो.