भांगरभूंय | प्रतिनिधी
चिंतन – 19
तुकोबा म्हणटात —
ऊंस बाहेरी दिसे काळा ।
आंत रसाचा आगळा ॥
तुका म्हणे मोल गोडी ।
काय चाड वरील्या खोडी ॥
अर्थ : ऊस वयल्यान काळसर, खरखरीत दिसता, पूण भितर मात खूब गोड रोस आसता. तुकाराम महाराज म्हणटात – मनशाचे खरें मोल ताच्या अंतरात्म्यातल्या गोडसाणींत आसता. वयले वयले खोडीक कांयच म्हत्व ना.
चोखोबा म्हणटात —
ऊस डोंगा परी रस नोहे डोंगा ।
काय भुललासी वरलिया रंगा ॥
अर्थ : ऊस दिसपाक एखाद्या डोंग्यासारको म्हणल्यार उंच, राठ, खडबडीत दिसता, पूण भितर गोड रोस आसता. म्हणून फक्त वयल्या रुपाक भुलून ताची अस्सल गोडसाण वळखुपाची ना? मनीसूय तसोच आसता – वयल्यान खडबडीत आसलो तरी भितर गोड आसपाक शकता.
ह्या दोनूय संतांच्यो ओळी एकेच गजालीची शिकवण दितात-
आमच्या आयच्या जिवितांत आमी जायते फावटी लोकां कडेन तांच्या मुखामळाक लागून, रंगाक, उंचाय वा दिव्यांगत्वाक लागून आडनदर करतात. पूण खरो मनीस ताच्या रुपांत नासता– ताच्या कामांत आसता.
स्टेफन हॉकिंग — नांव आयकलें काय आमच्या दोळ्यां मुखार येता तो एक अशक्त, व्हीलचॅराचेर बशिल्लो मनीस, जाचा आवाज संगणकांतल्यान येता, ताचें शरीर हालना, पूण मात्शे रावात…. ताच्या मेंदवाचें तेज कल्पने पलतडचें आशिल्लें.
ज्या वेळार तांकां ALS (Amyotrophic Lateral Sclerosis) नांवाचो भिरांकूळ रोग जालो, तेन्ना दोतोरांनी सांगिल्लें, “फक्त दोन वर्सां जगतलो.” त्यावेळार तांची पिराय आशिल्ली फक्त 21 वर्सां. पूण, हाॅकिंग हार मानप्यां मदले नासले. कुडींत शक्त उरली ना, पूण विचारांची आकाशगंगा तांणी उबी केली. तांणी काळ, विश्व, ब्लॅक होल, सापेक्षता हाचेर खूब म्हत्वाचे सिद्धांत मांडले. तांचें पुस्तक A Brief History of Time संवसारांतल्या कोट्यांनी लोकांनी वाचलां.
ते दिसपाक “ग्लॅमरस” नाशिल्ले. तांची हालचाल कदेला पुरती मर्यादीत आशिल्ली. पूण तांचे तकलेंतल्यो कल्पना अफाट मळबा सारक्यो मुक्त आशिल्ल्यो. एके मुलाखतींत विचारलें, “तुमकां दिसता की तुमची कूड अशक्त आशिल्ल्यान तुमी कितें तरी वगडायलें?” ताचेर हाॅकिंग हासले आनी तांणी म्हणलें, “ म्हजी कूड थांबल्या, पूण म्हजी बुद्द धावंता. म्हाका आनीक कितें जाय?”
हे गजालीचो नेमको अर्थ कितें?
मनीस वळखुपाचो आसल्यार ताच्या कपड्यां वयल्यान न्हय,
ताच्या मुखामळा वयल्यान न्हय –
ताचे कृतीन, मनान आनी गोडसाणीन वळखात.
– ह भ प देवदत्त परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
