भांगरभूंय | प्रतिनिधी
डॉ. आश्विनी जांभेकर कुळकर्णीः केप्यां रंगली ‘पेटूल’
भांगरभूंय । प्रतिनिधी
केपें: शिक्षणा बगर आपले कडेन हेर गूण आसत जाल्यार ताचो निश्चीत फायदो जाता. फुडारांत खेळ, संस्कृतीक म्हत्व आसतलें. तें जिणेचें एक आंग आशिल्ल्यान ताका म्हत्व दियात, अशें डॉ. आश्विनी जांभेकर कुळकर्णी हांणी सांगलें.
कोंकणी भाशा मंडळ आनी केपें म्हाविद्यालय हांच्या जोडपालवान पेटूल कार्यावळ आयोजीत केल्ली. त्या वेळार मुखेल सोयरी म्हूण डॉ. जांभेकर कुळकर्णी हांणी सांगलें. तांचे वांगडा माचयेर साहित्यीक जेस फर्नांडीस, सेवरीन पिंटो. डॉ. जॉयदीप भट्टाचार्य, कोंकणी भाशा मंडळाची अध्यक्ष अन्वेषा सिंगबाळ, पोब्र फर्नांडीस आनी हेर मानेस्त हाजीर आशिल्ले.
कोंकणी भाशा मंडळ ल्हान भुरग्यां खातीर वावर करता ती खूब बरी गजाल. आपल्या भुरग्यान बरें शिकचें, आपले करियर घडोवचें, अशें दरेका पालकाक दिसता. ते खातीर तांणी फक्त इंग्लीश, गणीत अशेच विशय शिकचे आनी फक्त अभ्यासूच करचो, असो तांचो आगरो आसता. नाचप गावप उपरांत केन्ना तरी पळोवचें म्हूण ताचेर लक्ष दिनात, पूण मनशाक जियेवपा खातीर पयसो आनी करियर इतलेंच चलना, जाल्यार कितें तरी वेगळें जाय पडटा. तें तुमी करतात, अशें जांभेकर कुळकर्णी हांणी सांगलें.
जी उमेद, सृजनशिलता हांगा आसा ती पुण्यांत दिसना. कोंकणी भाशा मंडळा वांगडा काम करपाची आपली इत्सा आसा. फुडारांत पेटूल सारकी कार्यावळ पुण्यांत आयोजीत जातली, अशेंय जांभेकर कुळकर्णी हांणी सांगलें. ह्या वेळाप केंपें, सांगें, कुडचडें, हायस्कुलाच्या विद्यार्थ्यांनी नाच सादर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
